Sunday, June 16, 2024

သိုၵ်းမၢၼ်ႈ သင်ႇၵူၼ်းမိူင်းၵဵင်းတုင် ႁဵတ်းဝၼ်းၸိူဝ့်ၸၢတ်ႈၸိုင်ႈတႆးၶိုၵ့်ယႂ်ႇ

Must read

သိုၵ်းမၢၼ်ႈယိုတ်းမိူင်း သင်ႇၵူၼ်းမိူင်းၵဵင်းတုင် ၸတ်းႁဵတ်းပၢင်မၢႆတွင်းဝၼ်းၸိူဝ့်ၸၢတ်ႈၸိုင်ႈတႆး လႄႈ ဝၼ်းမိူင်းႁူမ်တုမ်ၶိုၵ့်ယႂ်ႇ ဢၼ်ၶွပ်ႈၶူပ်ႇ 76 ပီတဵမ်ၶိုၵ်ႉယႂ်ႇ ။

ပေႃးထိုင်မႃး ဝၼ်းတီႈ 6 ထိုင် ဝၼ်းတီႈ 12/2/2023  ၶၢဝ်းတၢင်း 6 ဝၼ်း သိုၵ်းမၢၼ်ႈႁွင်ႈၵၢၼ် ၵူႈၾၢႆႇၾၢႆႇ(ထႃႇၼသႅင်ႇယႃႇ) ႁူမ်ႈၵူၼ်းမိူင်းၵဵင်းတုင် ၸတ်းႁဵတ်းပၢင်မၢႆတွင်း ဝၼ်းၸိူဝ့်ၸၢတ်ႈၸိုင်ႈတႆး လႄႈ ဝၼ်းမိူင်းႁူမ်ႈတုမ် ၶွပ်ႈၶူပ်ႇ 76 ပီတဵမ် ႁႂ်ႈၶိုၵ့်ယႂ်ႇသေၵူႈပီပီ။

- Subscription -

ၵူၼ်းၼုမ်ႇၵဵင်းတုင်ၵေႃ့ၼိုင်ႈလၢတ်ႈဝႃႈ – “ တပ့်တိူင်းလူင်တီႈၵဵင်းတုင်ၼၼ့်ယဝ့် ဢၼ်သင်ႇႁဵတ်းၵေႃႈ။ သင်ႇႁႂ်ႈ မေႃသွၼ် လုၵ်ႈႁဵၼ်း လႄႈ ထႃႇၼသႅင်ႇယႃႇၶဝ် တင်းသဵင်ႈ ၶိုင်ၵၢၼ်ၸတ်းႁဵတ်းၼၼ့်ယဝ့်။ ၽႂ်ဢမ်ႇၶႂ်ႈႁဵတ်းၵေႃႈ တိုၼ်းတေလႆႈႁဵတ်းယူႇယဝ့်ၼၼ့်” – ဝႃႈၼႆ။

ၵူၼ်းမိူင်းတႄႉမႆႈၸႂ်တၢင်းပဵၼ်ၶူဝ်ႊဝိတ်ႉသေဢမ်ႇၵႃး မႆႈၸႂ်ၵူဝ်မီးပႃးပၢင်တေႃႇလွင်း ယွၼ်ႉဢမ်ႇမီးလွင်ႈႁူမ်ႇလူမ်ႈ။

ၵူၼ်းပိုၼ့်တီႈဝႅင်းၵဵင်းတုင်လၢတ်ႈတီႈၽူႈတွႆႇႁွၵ်ႈဝႃႈ- “ ၸႂ်ႈယဝ့် သိုၵ်းမၢၼ်ႈၼၼ့်ယဝ့် သင်ႇႁႂ်ႈ ၸုမ်းသၢင်ႇသီႈၶဝ် ၼမ်းႁဵတ်းၵႂႃႇဢိူဝ်ႈၼၼ့်။ မိူဝ်ႈတႄႇမၼ်း ဢၢင်ႈမီးပႃးပၢင်တေႃႇလွင်းႁေဢိူဝ်ႈ ၼၼ့်။ၵူၺ်းၼႃႇ ၼႂ်းၸုမ်းသၢင်ႇသီႈသမ့်မီးၵူၼ်းၼုမ်ႇတႆးဝႆ့ၽွင်ႈလႄႈ သၢၼ်ၶတ်းယႃႇႁႂ်ႈ မီးပၢင်တေႃႇလွင်းၼႆ။ႁဵတ်းၼၼ်လႄႈ ပၢင်လဵၼ်ႈပိင်းၵူဝ်းတႄ့တေမီးယူႇၼႆဝႃႈၼၼ့် ” -ဝႃႈၼႆ။

ၼႂ်းပၢင်ပွႆးၼႆ့ တေမီး ပၢင်ၶႅင်ႇႁွင့်ၵႂၢမ်းသေ တေမီးသူးထီ့ၼိုင်ႈ 300000 ပျႃး သူးထီ့သွင် 150000 ပျႃး သူးထီ့သၢမ် 100000။လိူဝ်ၼၼ့် တေမီးဝၢင်းၶၢႆ ၶိူင်ႈၶူဝ်းမၢႆတွင်းၸၢဝ်းၶိူဝ်းၵူႈသႅၼ်းသႅၼ်း။

ၵူၼ်းပိုတ်ႇႁၢၼ့်ၶၢႆၶဝ်ႈသွႆးၼႂ်းၵၢတ်ႇလူင်ၵဵင်းတုင်ၵေႃ့ၼိုင်ႈလၢတ်ႈဝႃႈ- “ ၵူႈပီပီ ဢမ်ႇႁၼ်ၸတ်းႁဵတ်း ယႂ်ႇသေပွၵ်ႈ ပေႃးဝႃႈဝၼ်းၸိူဝ့်ၸၢတ်ႈၸိုင်ႈတႆးလႃႈ တေႃႈၼင်ႇဝၼ်းပျီႇထွင်ႇၸု ၶဝ်ယင်းဢမ်ႇႁဵတ်းၵိုၼ်းသေပွၵ်ႈ ပေႃးႁဵတ်းၵေႃႈ ဢမ်ႇႁိုင်လူင် ႁဵတ်းပွတ်းၼႂ် ပွတ်းဝၼ်းၵေႃႈယဝ့်ယဝ့်။မိူဝ်ႈလဵဝ်သမ့်ႁဵတ်းပဵၼ် 6 ဝၼ်း။ ၶဝ်ၶႂ်ႈႁဵတ်းၼႄဝႃႈ မိူင်းတႆးတိုၵ့်ၵျေႃႇယူႇ တိုၵ့်ၵတ်းယဵၼ်ယူႇ ႁႂ်ႈၵူၼ်းတင်းၵမ်ႇၽႃႇႁူ့ဝႃႈ မိူင်းတႆးပွတ်းဢွၵ်ႇၼႆ့ ဢမ်ႇမီးလွင်ႈသုၵ့်သၵ့်သင် ၼႆၼၼ့်ၼႃႇ” – ဝႃႈၼႆ။

ၽူႈပွင်ၵၢၼ်ပၢင်ပွႆး တိုၵ်းသူၼ်း ႁႂ်ႈၸၢဝ်းၶိူဝ်းၸိူဝ်းယူႇ ၼႂ်းပွတ်းဢွၵ်ႇၶူင်း မႃးၶဝ်ႈႁူမ်ႈ မိူၼ်ႇၼင်ႇ တႆးၶိုၼ် ၊ တႆးလိုဝ့် ၊တႆးၼိူဝ် ၊တႆးလွႆ ၊ ဢႃႇၶႃႇ ၊ ဢႃႇၶိုဝ်ႇ ၊ လႃးႁူႇ ၊ လီသူး ၊ ဝႃႉ ၊ မၢၼ်ႈ ႁႂ်ႈၸၢဝ်းၶိူဝ်းတၢင်းသဵင်ႈ မႃးၼႄ ၾိင်ႈငႄႈၾိင်ႈထုင်း။

ဢွင်ႈတီႈၸတ်းႁဵတ်းပၢင်မၢႆတွင်းဝၼ်းၸိူဝ့်ၸၢတ်ႈၸိုင်ႈတႆးလႄႈ ဝၼ်းမိူင်းႁူမ်ႈတုမ် ၼႆ့ ပဵၼ်တီႈ ပၢင်လဵၼ်ႈဢဵၼ်ႈႁႅင်း ဢၼ်မီးၵၢင်ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း