မိူဝ်ႈၼႆႉ ဝၼ်းတီႈ 1/2/2023 ယၢမ်းၵၢင်ၼႂ်မွၵ်ႈ 8:50 မူင်း မၢၵ်ႇတႅၵ်ႇ ႁိမ်းၶူင်ႇႁိူဝ်းမိၼ်ၵဝ်ႇ တီႈပွၵ်ႉၼိူဝ် ဝဵင်းမူႇၸေႊ လႅၼ်လိၼ်တႆး – ၶႄႇ လုၵ်ႈၼိုင်ႈ သဵင်လင်ႁႅင်းလႄႈၵူၼ်းပိုၼ်ႉတီႈတူၵ်းၸႂ်။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇတႅၵ်ႇ တီႈႁိမ်းပၢင်ႇႁိူဝ်းမိၼ်ၵဝ်ႇ ပွၵ်ႉၼိူဝ် လုၵ်ႈ ၼိုင်ႈ သဵင်တႅၵ်ႇႁႅင်းတႄႉဢေႃႈ။ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်း လူႉတၢႆဢမ်ႇမီး ယဝ်ႉၵေႃႈ တုမ်ႉတိူဝ်ႉၶူဝ်းၶွင်ႁိူၼ်းယေး ၵူၼ်းဝၢၼ်ႈ လူႉသုမ်ႉ ၸိူဝ်းၼႆႉၵေႃႈ ဢမ်ႇမီးၶႃႈ”- ဝႃႈၼႆ။

မၢၵ်ႇၼႆႉပဵၼ် ၼမ်ႉမိုဝ်းၽႂ်မႃးႁၢင်ႈၵၢင်ဝႆႉတႄႉ ဢမ်ႇႁူႉ။ ဝၢႆးလင်မၢၵ်ႇတႅၵ်ႇယဝ်ႉ ၸွမ်းသဵၼ်ႈတၢင်းၵႂႃႇမႃး ႁိမ်းႁွမ်းၼၼ်ႉ တႄႉ လႆႈပိၵ်ႉဢိုတ်းဝႆႉၵမ်ႉၼိုင်ႈ။

“ဝၢႆးမၢၵ်ႇတႅၵ်ႇယဝ်ႉၼၼ်ႉ ပလိၵ်ႈသိုၵ်းမၢၼ်ႈၶဝ် ထူပ်းႁၼ်မၢၵ်ႇပႆႇတႅၵ်ႇထႅင်ႈသေ ၶဝ်ပိၵ်ႉဢိုတ်းသဵၼ်ႈတၢင်း ဢမ်ႇပၼ်ၵူၼ်း ၵႂႃႇမႃး တေႃႇထိုင်မွၵ်ႈ 10 မူင်းၵၢင်ၼႂ်ၼႆႉ”- ၵူၼ်းပိုၼ်ႉတီႈဝဵင်းမူႇၸေႊ သိုပ်ႇလၢတ်ႈၼင်ႇၼႆ။

ၵဵဝ်ႇၵပ်း မၢၵ်ႇတႅၵ်ႇၼႆႉသေ ၵူၼ်းမိူင်းၵႂႃႇမႃး ၼႂ်းပိုၼ်ႉတီႈ လူတ်းယွမ်းၵႂႃႇမႃးၼမ်။ ယဝ်ႉၵေႃႈ တီႈၵၢတ်ႇလူင် မၢႆ 1 – မၢႆ 2 ႁၢၼ်ႉၶၢႆၶူဝ်း ၼႂ်းၵၢတ်ႇၸိူဝ်းၼႆႉ ၵူၼ်းၶၢႆၵၢတ်ႇ ဢွၼ်ၵၼ်ပိၵ်ႉႁၢၼ်ႉၼမ်။ ထိုင်မႃး ယၢမ်းၵၢင်ၼႂ် 10 မူင်းၼႆႉ ဢွင်ႈတီႈၶၢႆၵၢတ်ႇ ၵၢင်ၶမ်ႈၼၼ်ႉၵေႃႈ ၸဝ်ႈၶွင်ႁၢၼ်ႉ ဢွၼ်ၵၼ်ပိၵ်ႉဢိုတ်းႁၢၼ်ႉၽႂ်မၼ်း ပွၵ်ႈႁိူၼ်းမူတ်း ၵူၼ်းၶၢႆၵၢတ်ႇ ဝဵင်းမူႇၸေႊလၢတ်ႈ။

ပူၼ်ႉမႃး မိူဝ်ႈဝၼ်းတီႈ 9/1/2023 ယၢမ်းၵၢင်ၶမ်ႈ 7 မူင်းၶိုင်ႈ ၼၼ်ႉၵေႃႈ မၢၵ်ႇတႅၵ်ႇထပ်းၵၼ် 2 ၵမ်း တီႈပၢင် တေႃႇလွင်း ဢၼ်မီးၼႂ်းပွၵ်ႉၸွၼ်ႊၸူဝ်ႇ ဝဵင်းမူႇၸေႊ ။ တီႈၼၼ်ႈၵေႃႈ ပဵၼ်မၢၵ်ႇၽႂ် ၼမ်ႉမိုဝ်းၽႂ်ႁဵတ်းၵေႃႈ ဢမ်ႇႁူႉ ႁၢၼ်ႉ တေႃႇထိုင်ယၢမ်းလဵဝ်။

မိူဝ်ႈၼႆႉ ဝၼ်းတီႈ 1/2/2023 ပဵၼ်ဝၼ်းသိုၵ်းမၢၼ်ႈ ယိုတ်းဢႃႇၼႃႇ ဝၢၼ်ႈမိူင်းမႃး ၶွပ်ႈတဵမ် 2 ပီ ၸွမ်းၼႂ်းဝဵင်းယႂ်ႇ/ လူင် ၼႂ်းမိူင်းတႆး မိူင်းမၢၼ်ႈ မိူၼ်ၼင်ႇ တႃႈၵုင်ႈ – ဝဵင်းလိူဝ်ႇ ၸိူဝ်းၼႆႉ သိုၵ်းပလိၵ်ႈမၢၼ်ႈ ဢဝ်ဢဵၼ်ႁႅင်းတင်းၼမ်သေ ပႂ်ႉၸွမ်း ၼႂ်းၵိဝ်ႇသဵၼ်ႈတၢင်း ၵၢင်ဝဵင်း တီႈၵူၼ်းၶွၼ်ႈၼမ် ၸဵမ်ၸိူဝ်းၼႆႉတင်းၼမ်လၢႆ။