မိူဝ်ႈၼႆႉ ဝၼ်းတီႈ 30/1/2023 ယၢမ်းၵၢင်ၼႂ်ၸဝ်ႉ 4 မူင်းပၢႆ ၾႆးမႆႈႁိူၼ်းလုင်းၵွၼ်းတႆႇၺ – ပႃႈယုမ်ႉလႄႈ လုင်းၸိင်ႇၼ – ပႃႈ မီးဢွင်ႇ တီႈဝၢၼ်ႈၵုၼ်မူင်ႈ ပွၵ်ႉ 1 ဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၶူဝ်းႁိူၼ်းယေး ဢမ်ႇတၼ်း လႆႈ လူႉသုမ်းၼမ် လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီး။

ၵူၼ်းၼုမ်ႇ ပိုၼ်ႉတီႈ ဝဵင်းၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၾႆးမႆႈၼႆႉ ယွၼ်ႉသင်လႄႈမႆႈတႄႉ ဢမ်ႇႁူႉ တႅတ်ႈၼႅတ်ႈလီ။ ၵမ်ႈၽွင်ႈဝႃႈ ၾႆးၾႃႉသျွတ်ႉ။ ၶူဝ်းႁိူၼ်းယေးတႄႉ ဢမ်ႇတၼ်းလႆႈသင် မႆႈမူတ်း။ လွင်ႈလူႉသုမ်း မီးၵႃႈႁိုဝ် တႄႉ ပႆႇႁူႉ တိုၵ်ႉၼပ်ႉသွၼ်ႇတူၺ်းယူႇ။ လိူဝ်ၼၼ်ႉ မႆႈပႃးၵႃး လုင်းၵွၼ်းတႆႇၺ – ပႃႈယုမ်ႉ ဢၼ်ၵိုတ်းဝႆႉ ၼႂ်းဝၢင်းႁိူၼ်းသေ ဢမ်ႇတၼ်းၶၢႆႉဢွၵ်ႇ လမ်းၼိုင်ႈ။ မႆႈၼႆႉ လုၵ်ႉမႆႈတီႈႁိူၼ်း လုင်းၵွၼ်းတႆႇၺ မႃးၶႃႈ”- ဝႃႈၼႆ။

ႁိူၼ်းယေးၵူၼ်းဝၢၼ်ႈ သွင်လင် ဢၼ်လႆႈထုၵ်ႇၾႆးမႆႈၵႂႃႇၼႆႉ ပဵၼ်ႁိူၼ်းသွင်ၸၼ်ႉ။ ၸၼ်ႉတႂ်ႈပဵၼ်ဢုတ်ႇ ၸၼ်ႉၼိူဝ်ပဵၼ်မႆႉ ပႅၼ်ႈ ယဝ်ႉၵေႃႈ ယူႇဝႆႉၼႂ်းဝၢင်းလဵဝ်ၵၼ် ဝႃႈၼႆ။

ၵူၼ်းဝၢၼ်ႈၼႂ်းပွၵ်ႉယွမ်ႇလႄႈ ၵႃးၶႄၾႆး သွင်လမ်း ႁူမ်ႈၵၼ် ၸွႆႈႁူတ်း ၾႆးမွတ်ႇၵႂႃႇ ယၢမ်းၵၢင်ၼႂ် 6:30 မူင်းၼႆႉ ။

ယၢမ်းလဵဝ် ယူႇတီႈ ၽူႈမီးပုၼ်ႈၽွၼ်း ၼႂ်းပိုၼ်ႉတီႈ တိုၵ်ႉဢွၼ်ၵၼ်ၵူတ်ႇထတ်း လွင်ႈပိူင်ပဵၼ်ငဝ်ႈႁၢၵ်ႈ လွင်ႈၾႆးမႆႈ ၸိူဝ်းၼႆႉ ယူႇ။ ယဝ်ႉၵေႃႈ တိုၵ်ႉဢွၼ်ၵၼ်ၵူတ်ႇထတ်းၼပ်ႉသွၼ်ႇလွင်ႈလူႉသုမ်း ၶူဝ်းႁိူၼ်းယေး ၸိူဝ်းၼႆႉဝႆႉယူႇ ဝႃႈၼႆ။

ၵူၼ်းပိုၼ်ႉတီႈၵမ်ႈၼမ် ထတ်းသၢင်ဝႃႈ ၸူဝ်ႈသိုၵ်းမၢၼ်ႈ ယိုတ်းမိူင်းမႃးၼႆႉ ၾႆးၾႃႉၵႆႉမွတ်ႇ ၵဵဝ်ႇၵပ်းလွင်ႈၾႆးမႆႈႁိူၼ်းယေး ၵူၼ်းဝၢၼ်ႈၼႆႉ ယွၼ်ႉၾႆးၾႃႉၼႆႉၵူၺ်း ဝႃႈၼႆ။

ဝဵင်းၵဵင်းတွင်းၼႆႉ တင်းမူတ်းမီး 7 ပွၵ်ႉ 3 ဢိူင်ႇ ႁူဝ်ၵူၼ်းမီး 8,000 ပၢႆ ဝႃႈၼႆ။