ၵူၼ်းဝဵင်းမူႇၸေႊ တုၵ်းယွၼ်းထိုင် ၽူႈၼမ်းၸုမ်းပျီႇတူႉၸိတ်ႉ ႁႂ်ႈဢဝ်ပုၼ်ႈၽွၼ်း ၵုမ်းလုၵ်ႈၼွင်ႉၽႂ် မၼ်း ယႃႇလႃႈလီႈယိုဝ်းၵွင်ႈၶိုၼ်ႈၾႃႉ ၽွင်းပွႆးၵျေႃႇပွႆးမူၼ်ႈလႄႈပွႆးပီမႂ်ႇၸိူဝ်းၼႆႉ မီးလွင်ႈတုမ်ႉတိူဝ်ႉၵူၼ်းမိူင်း ။

ၽွင်းၶၢဝ်း ပီမႂ်ႇၶႄႇ 21-23/1/2023 မႃး ၸုမ်းပျီႇတူႉၸိတ်ႉ ၸုတ်ႇမူၵ်ႇၾႆး (မွၵ်ႇၾႆး) ႁပ်ႉပီမႂ်ႇ ယိုဝ်းၵွင်ႈၵူႈဝၼ်း မၢၵ်ႇၵွင်ႈ တူၵ်းသႂ်ႇႁိူၼ်းယေးၵူၼ်းဝၢၼ်ႈ ၼႂ်းဝဵင်းမူႇၸေႊ ၊ ၵူၼ်းမိူင်းမႆႈၸႂ် ၵူဝ်တုမ်ႉတိူဝ်ႉထိုင်သၢႆၸႂ်လႄႈ တုၵ်းယွၼ်းထိုင် တီႈႁူဝ်ၼႃႈပျီႇတူႉၸိတ်ႉ ၵူႈၸုမ်းၼႂ်းဝဵင်းမူႇၸေႊ ႁႂ်ႈဢွၼ်ၵၼ် ဢဝ်ပုၼ်ႈၽွၼ်းၵုမ်းၵမ် တူၺ်းထိုင်လုၵ်ႈၼွင်ႉၽႂ်မၼ်း။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈၵူၼ်းမိူင်းတႄႉ လႆႈမႆႈၸႂ်တႄႉတႄႉ။ မၢၵ်ႇၵွင်ႈ ဢၼ် ၶဝ်ယိုဝ်းၼၼ်ႉမႃးတူၵ်းသႂ်ႇႁိူၼ်းယေးၵူၼ်းဝၢၼ်ႈ ။ သိုၵ်းမၢၼ်ႈ ၸိူဝ်းၼႆႉၵေႃႈ ၶဝ်ထုၵ်ႇလီၵူတ်ႇထတ်း ၵုမ်းၵမ်ယူႇ ၸုမ်းပျီႇတူႉၸိတ်ႉ ၸိူဝ်းၼၼ်ႉ။ ၽူႈဢွၼ်ႁူဝ်ၸုမ်းပျီႇတူႉၸိတ်ႉၵေႃႈ ၶဝ်မီးပုၼ်ႈ ၽွၼ်း ထုၵ်ႇလီႁၢမ်ႈလုၵ်ႈၼွင်ႉ ၶဝ် လွင်ႈယိုဝ်းၵွင်ႈၶိုၼ်ႈၾႃႉၼႆႉ။ ပေႃးဢမ်ႇၸႂ်ႈပၢင်တိုၵ်း တေဢမ်ႇလႆႈယိုဝ်းၼႆ ထုၵ်ႇလီမီးပၵ်းပိူင်ၵုမ်းၵမ်ဝႆႉၸိူင်ႉၼႆ။ ၽႂ်မီး ငိုၼ်းသေ သိုဝ်ႉလႆႈၵွင်ႈၵေႃႈ လႃႈလီႈယိုဝ်းၸိူင်ႉၼႆၼႆႉ မၼ်းဢမ်ႇတူၵ်းထုၵ်ႇၶႃႈ”- ဝႃႈၼႆ။

မိူဝ်ႈၽွင်ႈ ၶၢဝ်းပီမႂ်ႇၶႄႇၼၼ်ႉ မၢၵ်ႇၵွင်ႈတူၵ်းသႂ်ႇႁိူၼ်းယေး ၵူၼ်းဝၢၼ်ႈ ၼႂ်းဝဵင်းမူႇၸေႊ ပဵၼ်လၢႆတီႈ/ လၢႆပွၵ်ႉ။ မၢင်ႁိူၼ်း မၢၵ်ႇၵွင်ႈတူၵ်းသႂ်ႇ မီးပဵၼ် 4-5 လုၵ်ႈ။ ယဝ်ႉၵေႃႈ ၸွမ်းၼႂ်းဝၢင်းႁိူၼ်း၊ ၸွမ်းၼႂ်းသူၼ် ၸိူဝ်းၼႆႉ တင်းၼမ်။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၵွင်ႈၼႆႉ ပေႃးတူၵ်းသႂ်ႇ တိူဝ်ႉၵူၼ်းမိူင်းလူး ၽႂ်တေဢဝ်ပုၼ်ႈၽွၼ်း မၢတ်ႇလၢႆလၢႆ တၢႆလၢႆလၢႆၵူၺ်းၶႃႈဢေႃႈ။ ၵွပ်ႈၼႆ မၼ်းတေလႆႈမီး ပၵ်းပိူင်မၢႆမီႈသုမ်ႇငမ်း ၸုမ်း ယိပ်းၵွင်ႈၵၢင်ႇ ၸိူဝ်းၼၼ်ႉဝႆႉ။ ယၢမ်းလဵဝ် ဢမ်ႇမီးလွင်ႈတၢင်းသင်သေ ယိုဝ်းၸိူင်ႉၼႆၼႆႉ ဢမ်ႇထုၵ်ႇလီပဵၼ် ၵမ်ႈၼမ် ပဵၼ် ၸုမ်းပျီႇတူႉၸိတ်ႉယဝ်ႉ ဢၼ်ယိုဝ်းၼႆႉ”- ဝႃႈၼႆ။

ယွၼ်ႉဝႃႈ မိူဝ်ႈၽွင်းၶၢဝ်းပီမႂ်ႇၶႄႇ ၽွင်းၸုတ်ႇမူၵ်ႇၾႆး(မွၵ်ႇၾႆး) ၸိူဝ်းၼၼ်ႉ သမ်ႉယိုဝ်းပႃးၵွင်ႈလႄႈ ၵမ်ႈၼမ် ၵူၼ်းမိူင်း တေ ႁူႉဝႃႈ ပဵၼ်သဵင်ၸုတ်ႇမူၵ်ႇၾႆးၵၼ်ၵူၺ်း ဝႃႈၼႆ။

ၵူၼ်းၼုမ်ႇ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်းပီမႂ်ႇၶႄႇၼၼ်ႉ ႁဝ်းၶႃႈ ၵႂႃႇၼင်ႈၵိၼ်ၼႂ်းသႅင်ႇ တီႈပွၵ်ႉၸွၼ်ႊ ၸူဝ်ႊၼၼ်ႉ ၶႃႈႁၼ်တႂ်ႈတႃၵမ်းလဵဝ် ပဵၼ်ပျီႇတူႉၸိတ်ႉယိုဝ်းၵွင်ႈၶိုၼ်ႈၾႃႉၵမ်းသိုဝ်ႈ မိူဝ်ႈၶဝ်ၸုတ်ႇမွၵ်ႇၾႆးယူႇၼၼ်ႉ။ ၼႂ်း လုၵ်ႈၸုမ်း ပျီႇတူႉၸိတ်ႉ ၸိူဝ်းၼၼ်ႉသမ်ႉ ၵမ်ႈၼမ် ပဵၼ်ၸၢဝ်းၶႄႇ။ လၢဝ်းပၢၼ်း ဢၼ်မႃးႁဵတ်းၵၢၼ် ပၢႆးမၢၵ်ႈမီးၸိူဝ်းၼႆႉ ၵေႃႈ ပဵၼ်ၵူၼ်းၸၢဝ်းၶႄႇ လုၵ်ႈတၢင်းမိူင်းၶႄႇမႃး ယူႇၼႂ်းၸုမ်းပျီႇတူႉၸိတ်ႉ ၸိူဝ်းၼႆႉသေ ႁဵတ်းၵၢၼ်။ ပေႃးလၢတ်ႈသိုဝ်ႈ သိုဝ်ႈၵေႃႈ မိူင်းႁဝ်းၼႆႉ မၼ်းဢမ်ႇမီးပၵ်းပိူင်မၢႆမီႈသင်ယဝ်ႉ ႁဝ်းၵေႃႈ သိုဝ်ႉလႆႈယူႇ ၵွင်ႈၼႆႉ ပေႃးသိုဝ်ႉလႆႈၵေႃႈ ယိုဝ်းလႆႈယဝ်ႉ လူး။ ၵွပ်ႈၼႆလႄႈ လူဝ်ႇလႆႈမီးပၵ်းပိူင်သုမ်ႇငမ်းဝႆႉ တႃႇၸုမ်းယိပ်းၵွင်ႈ ၸိူဝ်းၼၼ်ႉ ၶဝ်တေလႆႈယူႇတႂ်ႈပၵ်းပိူင်မၢႆမီႈ ၵူႈၵေႃႉ/ ၵူႈၸုမ်းဢေႃႈ။ ဢမ်ႇၸႂ်ႈဝႃႈ မီးၵွင်ႈယဝ်ႉ လႃႈလီႈယိုဝ်းၸိူင်ႉၼႆ”- ဝႃႈၼႆ။

ဢမ်ႇၸႂ်ႈဝႃႈ ၽွင်းၶၢဝ်းပီမႂ်ႇၶႄႇၼႆႉၵူၺ်းဢၼ်ၶဝ်ယိုဝ်းၵွင်ႈၼႆႉ၊ မိူၼ်ၼင်ႇ ပွႆးပၢင်ၶႅၵ်ႇ၊ ၶိုၼ်ႈႁိူၼ်းမႂ်ႇလႄႈ ဝၼ်းၵိူတ်ႇၶဝ် ၸိူဝ်း ၼၼ်ႉၵေႃႈ ၸုတ်ႇမူၵ်ႇၾႆးသေ ယိုဝ်းၵွင်ႈၸွမ်း မိူၼ်ၵၼ်။

ဝဵင်းမူႇၸေႊၼႆႉ တင်းမူတ်းမီး 9 ပွၵ်ႉ ၼႂ်းၼၼ်ႉ ၸုမ်းပျီႇတူႉၸိတ်ႉ ဢၼ်ယူႇသဝ်းၼမ်တီႈသုတ်းသမ်ႉ ပဵၼ်ပွၵ်ႉ ၸွၼ်ႊၸူဝ်ႊ၊ ၵွင်းမူးတူင်ႈ၊ ၵွင်းမူးလွႆ ၸိူဝ်းၼႆႉ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းၸမ် 2 ပီ တႄႇဢဝ် ဝၼ်းတီႈ 1/2/2021 မႃးၼႆႉ ယိုင်ႈၶႅၼ်းပၼ်ႁႅင်း ၸုမ်းပျီႇတူႉ ၸိတ်ႉ ယိပ်းၵွင်ႈၵၢင်ႇ ၼႂ်းပိုၼ်ႉတီႈ ၸွမ်းလႅၼ်လိၼ် ၸိူဝ်းၼႆႉ ထၢင်ႇႁၢင်ႈၵႂႃႇမႃးလွတ်ႈလႅဝ်း။ ထၢင်ႇႁၢင်ႈပိုတ်ႇပၢင်တေႃႇလွင်းလႄႈ ၵၢၼ်လႅၼ်ၵိၼ်ပိူၼ်ႈ ၼိူဝ်ဢွၼ်ႊလၢႆႊ ၸိူဝ်းၼႆႉၼမ်။ ယဝ်ႉၵေႃႈ ယႃႈမဝ်းၵမ် ၸိူဝ်းၼႆႉထႅင်ႈ။