ၸဝ်ႈၶူးဝႃးဝုၼ်းၸုမ်ႉ ၶဝ်ႈတိုဝ်းၵမ်သိလ်ထႅင်ႈ တီႈထမ်ႈလူင် မိူင်းၵႅတ်ႇ

ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ယေႃးမုၼ် ၶဝ်ႈတိုဝ်းၵမ်သိလ် တီႈထမ်ႈမိူင်းၵႅတ်ႇထႅင်ႈ တႃႇၶၢဝ်းတၢင်း 10 ဝၼ်းပၢႆ။

တႄႇဢဝ် ႁၢင်လိူၼ်ၵျႅၼ်ႊၼိဝ်ႊရီႊ 2023 ၼႆႉမႃး ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ယေႃးမုၼ် ၶဝ်ႈတိုဝ်းၵမ်သိလ် တီႈထမ်ႈ မိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇဝႆႉ ပေႃးထိုင်မႃးလိူၼ်သၢမ်မူၼ်း ၸဝ်ႈတေယေႃးမုၼ် မႃးတၢင်ႇထီးထၢတ်ႈလွႆ ယူၼ်း တီႈဝဵင်းတႃႈၶီႈလဵၵ်း။

ၸဝ်ႈၶူးလူင် ၺႃႇၼသီႇရိ ႁူဝ်ပဝ်ႈၵိင်ႇၽႄငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈ တႆးပွတ်းဢွၵ်ႇၶူင်း လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၶူးဝႃးပေႃႈ ၵႂႃႇဢတိတ်ႉထၢၼ်ႇ တီႈထမ်ႈမိူင်းၵႅတ်ႇထႅင်ႈၵမ်ႉၼိုင်ႈ။ တေႁိုင်မွၵ်ႈ 10 ဝၼ်းပၢႆ။ ပေႃးထိုင်မႃး လိူၼ်သၢမ်မူၼ်းၼႆႉ ၶူးဝႃးပေႃႈ တေဢွၵ်ႇမႃးတၢင်ႇထီး တီႈထၢတ်ႈလွႆယူၼ်း မိူင်းၽူင်းထႅင်ႈၵမ်ႉၼိုင်ႈ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 5/1/2023 ၼၼ်ႉ မႅၼ်ႈဝၼ်းၵိူတ်ႇၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢႃယုၶွပ်ႈတဵမ် 60 ပီ ယူႇတီႈ သင်ၶၸဝ်ႈ – တၵ်ႉၵႃႇ ႁူမ်ႈၵၼ်သေ ၸတ်းႁဵတ်းပၼ်ဝၼ်းၵိူတ်ႇၸဝ်ႈ တီႈဝတ်ႉၽရႃႉထၢတ်ႈသီႊၻွၼ်ႊရိူင်ႊ ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၶိုၵ်ႉယႂ်ႇလူင်။

ဝၢႆးသေ ဝၼ်းၵိူတ်ႇၸဝ်ႈယဝ်ႉ ထိုင်မႃး ဝၼ်းတီႈ 7 ၼၼ်ႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ယေႃးမုၼ် သိုပ်ႇၶၢဝ်းတၢင်းၵႂႃႇ မဵတ်ႉတႃႇထမ်း၊ သူႇၸႂ်းလုၵ်ႈၼွင်ႉပွင်ႈပၢႆလႄႈ ၵူတ်ႇထတ်းပၢႆးယူႇလီၸဝ်ႈ တီႈၼႂ်းၸႄႈတွၼ်ႈၵဵင်းႁၢႆး – ၵဵင်းမႆႇ ၸိုင်ႈထႆး။ ဝၢႆး ၼၼ်ႉယဝ်ႉ ၸဝ်ႈယေႃးမုၼ် ပွၵ်ႈမႃးၶိုၼ်း။ ထိုင်မႃး ဝၼ်းတီႈ 21 ၼႆႉ ၸဝ်ႈသိုပ်ႇဢတိတ်ႉထၢၼ်ႇ ၶဝ်ႈတိုဝ်းၵမ်သိလ် တီႈထမ်ႈ လူင်မိူင်းၵႅတ်ႇ ၵႂႃႇထႅင်ႈ ၼႆယဝ်ႉ။

တီႈထမ်ႈလူင် မိူင်းၵႅတ်ႇ ၸႄႈဝဵင်းမိူင်းသၢတ်ႇၼႆႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၶဝ်ႈတိုဝ်းၵမ်သိလ်မႃးယဝ်ႉ ၵမ်ႈၼိုင်ႈ တႃႇၶၢဝ်းတၢင်း 3 ပီ 3 လိူၼ် 3 ဝၼ်း။ ၸဝ်ႈတႄႇၶဝ်ႈထမ်ႈ မိူဝ်ႈဝၼ်းတီႈ 28/4/2019 ၼၼ်ႉမႃး တေႃႇထိုင်ဝၼ်းတီႈ 31/7/2022 ၶွပ်ႈတဵမ်ၵႂႃႇ ၸွမ်းၼင်ႇ ဢတိတ်ႉထၢၼ်ႇၸဝ်ႈ မီးဝႆႉၼၼ်ႉ။