ၼႂ်းတိုဝ်ႉတၢင်းပၢင်ပွႆးသၢင်ႇလွင်း/ ၸၢင်းလွင်း တီႈဝတ်ႉလူင်ဝၢၼ်ႈသေႃႉ ၸႄႈဝဵင်းမိူင်းသူႈ မီးပၢင်တၢၼ်ႈၶႆႈလႄႈ ပၢင်ထမ်းတြႃး။ မီးသင်ၶၸဝ်ႈၸိုဝ်ႈယႂ်ႇ လႄႈၸဝ်ႈပၢႆးမေႃ မွၵ်ႇလၢတ်ႈတၢၼ်ႈၶႆႈ ပၼ်ပိုၼ်ႉႁူႉလႄႈ သွၼ်ပွၼ်ႈထမ်းတြႃး ၼႂ်းပၢင်ပွႆး။

တင်ႈတႄႇဝၼ်းတီႈ 4-8/04/2018 (ၶၢဝ်းတၢင်း 5 ဝၼ်းၼႆႉ) မီးပၢင်ပွႆးသၢင်ႇလွင်း တီႈဝတ်ႉလူင်ဝၢၼ်ႈသေႃႉ ၸႄႈဝဵင်းမိူင်းသူႈ။ ဝၼ်းႁႅၵ်ႈသုတ်း ဝၼ်းတီႈ 4 တင်ႈတႄႇၵၢင်ၼႂ်ယၢမ်း 8 မူင်းထိုင်ဝၢႆးဝၼ်းႁူဝ်ၶမ်ႈ 4 မူင်းၼၼ်ႉ မီးပၢင်တၢၼ်ႈၶႆႈ။ မီးၸဝ်ႈသြႃႇၼၼ်ႇတဝၼ်ႇသ ၵျွင်းလေးၵျွၼ်းၸၵျႃႇ၊ ဝဵင်းတႃႈၵုင်ႈ။ ၸဝ်ႈၶူးသီႇရိထမ်ႇမ ဝတ်ႉၾႃႉဝဵင်းဢိၼ်း။ ႁိုၼ်း ၵႃယၢင်း (ၸၢႆးလႃႉ)။ ၸရေးၸၢႆးၵေႃႇမိူင်း ၼမ်ႉပႅၼ်ႈ သီႇပေႃႉ ၸိူဝ်းၼႆႉၶဝ်ႈႁူမ်ႈ ပၼ်ပိုၼ်ႉႁူႉ ပၢင်တၢၼ်ႈၶႆႈ-ၼႆယဝ်ႉ။

ၸဝ်ႈၶူးသီႇရိထမ်ႇမ ၸဝ်ႈၽူႈလႆႈႁပ်ႉသူး/ ရၢင်းဝလ်း ၸဝ်ႈၼၢင်းသုၸၼ်ႇတီႇ၊ ၾၢႆႇႁွင်ႈၼႄၶူဝ်းပိုၼ်း လၢတ်ႈဝႃႈ- “တွၼ်ႈတႃႇၸဝ်ႈႁဝ်းတႄႉ လႆႈလိူၵ်ႈႁူဝ်ၶေႃႈဝႃႈ ပုတ်ႉထၸဝ်ႈလႄႈလွင်ႈၽွမ်ႉႁူမ်ႈ။ ယိူင်းဢၢၼ်းဢၼ်လႆႈလိူၵ်ႈ ႁူဝ်ၶေႃႈၼႆႉ ယွၼ်ႉဝႃႈၸဝ်ႈတႃႇၼလူင် ပဵၼ်ၼႂ်းၸုမ်းႁဵတ်းၵၢၼ်ၸိူဝ်ႉၵၢၼ်ၶိူဝ်း ၵမ်ႈၽွင်ႈ။ ၼင်ႇႁိုဝ်ၼႂ်းမိူင်းႁဝ်း သမ်ႉပေႃးဢမ်ႇမီးလွင်ႈတႅၵ်ႇယၢႆႈၵၼ်သေ တေမီးလွင်ႈၽွမ်ႉႁူမ်ႈၼၼ်ႉ ၸဝ်ႈၶဝ်လႆႈဢဝ်ထမ်းတြႃး ၽြႃးပဵၼ်ၸဝ်ႈသေ လၢတ်ႈႁေႃးၼႄၸီႉၼႄသဵၼ်ႈတၢင်း တႃႇလွင်ႈၽွမ်ႉႁူမ်ႈ။ ပုတ်ႉထၽြႃးပဵၼ်ၸဝ်ႈႁဝ်းၼႆႉ ဢမ်ႇၸႂ်ႈႁေႃးၼႄ လွင်ႈၽွမ်ႉႁူမ်ႈၵူၺ်း၊ ၽွမ်ႉႁူမ်ႈၵၼ်ၼႆႉ မၼ်းမီးၽွၼ်းလီသင်ၸိူင်ႉႁိုဝ် ၸိူဝ်းၼႆႉ”- ဝႃႈၼႆ။

မၼ်းၸဝ်ႈသိုပ်ႇလၢတ်ႈဝႃႈ-“ၵၢၼ်ဢမ်ႇၽွမ်ႉႁူမ်ႈၵၼ်ၼႆႉသမ်ႉ တေတူၵ်းတႅမ်ႇလူႉသုမ်း မွၵ်ႈၵႃႈႁိုဝ်ၼႆၵေႃႈ ၽြႃးပဵၼ်ၸဝ်ႈႁဝ်းယၢမ်ႈႁေႃးၼႄ ယၢမ်ႈၸီႉၼႄမႃးယူႇ။ ၵွပ်ႈၼၼ်လႄႈ လွင်ႈတေၵႂႃႇႁေႃးထမ်းတြႃး တီႈဝၢၼ်ႈသေႃႉၼႆႉတႄႉ ယိူင်းဢၢၼ်းထိုင်ၵူၼ်းႁဵတ်းၵၢၼ်သိုၵ်း ၵၢၼ်မိူင်း တေႃႇပေႃးထိုင်ၵူၼ်းႁဵတ်းၵၢၼ် ၸၼ်ႉတူင်ႇဝူင်းၵူၼ်း ႁႂ်ႈပေႃးႁၼ်ၽွၼ်းလီလွင်ႈၽွမ်ႉႁူမ်ႈလႄႈ ႁႂ်ႈပေႃးႁၼ်ၽွၼ်းႁၢႆႉ လွင်ႈဢၼ်ႁဝ်း တႅၵ်ႇၵၼ် လွင်ႈႁဝ်းဢမ်ႇၽွမ်ႉၵၼ်လႆႈၼၼ်ႉ။ လွင်ႈၽွမ်ႉႁူမ်ႈၼႆႉ ဢမ်ႇၸႂ်ႈၸဝ်ႈႁဝ်းတေၵႂႃႇႁေႃး တီႈဝၢၼ်ႈသေႃႉၵူၺ်း၊ ၵႃႈပူၼ်ႉမႃးၵေႃႈ လႆႈႁေႃးမႃးလၢႆတီႈလၢႆဝဵင်းယဝ်ႉၼင်ႇၵဝ်ႇ။ လၢႆးတၢင်းတႃႇတေ ၽွမ်ႉႁူမ်ႈၵၼ် ၸမ်ၸႂ်ၵၼ်ၸိူဝ်းၼႆႉ တေႁဵတ်းႁိုဝ်တႄႇတီႈလႂ် ဢဝ်ထမ်းတြႃးဢၼ်ၼႆႉသေ တေၵႂႃႇႁေႃး”- လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

တွၼ်ႈပၢင်တၢၼ်ႈၶႆႈၼႆႉ ဝၼ်းတီႈ 04/04/2018 ၶၢဝ်းယၢမ်း 08:00-08:30 မူင်း ၸဝ်ႈသြႃႇၼၼ်ႇတဝမ်ႇသ (ၸဝ်ႈသြႃႇမိူင်းၵုတ်ႈ)။ ပွတ်းၼႂ်ယၢမ်း 08:30-11:00 မူင်း ၸၢႆးလႃႉ (ႁိုၼ်း ၵႃယၢင်း)။ ဝၢႆးဝၼ်းယၢမ်း 13:00-14:30 မူင်း ၸရေးၸၢႆးၵေႃႇမိူင်း။ ယၢမ်း 14:30-16:00 မူင်း ၸဝ်ႈၶူးသီႇရိထမ်ႇမ။

တွၼ်ႈပၢင်ထမ်းတြႃးၸမ်း-05/04/2018 ၵၢင်ၶမ်ႈယၢမ်း 7 မူင်း မီးပၢင်ထွမ်ႇထမ်းတြႃး ၸဝ်ႈသြႃႇၼၼ်ႇတဝမ်ႇသ။ 06/04/2018 ၵၢင်ၶမ်ႈယၢမ်း 7 မူင်း မီးပၢင်ထွမ်ႇထမ်းတြႃး ၸဝ်ႈၶူးၼၼ်ႇတိယ ဝတ်ႉမူၺ်ႇတေႃႇ ဝဵင်းပၢင်လူင်။

ပၢင်ပွႆးသၢင်ႇလွင်း ၸၢင်းလွင်း တီႈဝတ်ႉလူင်ဝၢၼ်ႈသေႃႉပွၵ်ႈၼႆႉ မီးသၢင်ႇလွင်း 108 တူၼ်၊ ၸၢင်းလွင်း 2 တူၼ်။ ဝၢၼ်ႈသေႃႉ ဢိူင်ႇဝၢၼ်ႈသေႃႉ ယူႇၼႂ်းၸႄႈဝဵင်းမိူင်းသူႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။