ပွႆးၵႂၢႆးတေႃး ပွႆးၾိင်ႈထုင်းၸိုဝ်ႈသဵင်ယႂ်ႇၼႂ်းမိူင်းတႆးပွတ်းဢွၵ်ႇ ပီၼႆႉ တေၸတ်းႁဵတ်းယႂ်ႇလူင်တီႈ ဝဵင်းမိူင်းယၢင်း ။

ပွႆးၼႆႉတေပဵၼ်ၼႂ်း ဝၼ်းတီႈ 31/1/2023 တေႃႇထိုင် 5/2/2023 ၊ ယူႇတီႈ ၵူၼ်းပိုၼ်ႉတီႈ မိူင်းယၢင်း တေဢွၼ်ၵၼ် ၸတ်းႁဵတ်းပွႆး ၵႂၢႆးတေႃး ယႂ်ႇလူင် တီႈပၢင်လဵၼ်ႈမၢၵ်ႇၼင် ဝဵင်းမိူင်းယၢင်း ၸိုင်ႈတႆးပွတ်းဢွၵ်ႇၶူင်း ပီၼႆႉ တေမီးၵႂၢႆးၶဝ်ႈၶဵင်ႇၵၼ် ဢမ်ႇယွမ်း 30 တူဝ်။

ၸၢႆးလိူၼ်ၶမ်း ၽူႈတူင်ႉၼိုင် တူင်ႇဝူင်းၵူၼ်း ဝဵင်းမိူင်းယၢင်း လၢတ်ႈတီႈၽူႈတွႆႇႁွၵ်ႈဝႃႈ – “ပွႆးၵႂၢႆးတေႃး တီႈဝဵင်းမိူင်းယၢင်း ပီၼႆႉ ပေႃးဢဝ်ငဝ်းလၢႆးမိူဝ်ႈလဵဝ်ၼႆႉ ဝႃႈၸိုင် ပီႈၼွင်ႉတၢင်းမိူင်းၽႅၼ်၊ ႁူဝ်တဝ်း၊ သိူဝ်လိုဝ်း၊ တၢင်းဢိူင်ႇမိူင်းလူၺ် ၸိူဝ်းၼႆႉ တေမႃး ၶဝ်ႈႁူမ်ႈၼမ်။ ယွၼ်ႉတေၸတ်းယႂ်ႇလူင်၊ ၵူၼ်းၶၢႆၶူဝ်း ၶွင်ၵိၼ်ယႅမ်ႉၶဝ် ၸိူဝ်းၼႆႉၵေႃႈ ပေႃးႁၢင်ႈႁႅၼ်းမၢႆတီႈၵၼ်ဝႆႉ တင်းၼမ်ယဝ်ႉ”- ဝႃႈၼႆ။

ပွႆးၵႂၢႆးတေႃး ဝဵင်းမိူင်းယၢင်းၼႆႉ တေတႄႇတေႃး ၼႂ်းဝၼ်းတီႈ 31/1/2023 ဝၼ်းၼိုင်ႈ ပေႃးထိုင်မႃး ဝၼ်းတီႈ 5/2/2023 သမ်ႉ တေတေႃးထႅင်ႈၵမ်းၼိုင်ႈ၊ ပွႆးၵၢတ်ႇ ပွႆးၶၢႆၶူဝ်းတႄႉ တေၸတ်းတင်း 5 ဝၼ်း။

ပွႆးၵႂၢႆးတေႃးၼႆႉ ပေႃးဢဝ်ၸွမ်းပိုၼ်းၵူၼ်းပိုၼ်ႉတီႈ ဝဵင်းမိူင်းယၢင်း ယုမ်ႇယမ်ၸိုင် ဢွၼ်တၢင်းသုတ်း တေလႆႈၸတ်းႁဵတ်း တီႈ ဢိူင်ႇမိူင်းလူၺ် ယဝ်ႉၵေႃႈ မိူင်းယၢင်း လိုၼ်းသုတ်းယဝ်ႉတီႈ မိူင်းၵွႆ။

“ပွႆးၵႂၢႆးတေႃးၼႆႉ ၸတ်းႁဵတ်းမႃးၵူႈပီပီယဝ်ႉ မိူဝ်ႈၽွင်းတၢင်းပဵၼ်ၶူဝ်ႊဝိတ်ႉ ၽႄႈလၢမ်းၼၼ်ႉၵေႃႈ ၸတ်းႁဵတ်းယူႇ ၵူၺ်း ဢမ်ႇၸတ်းႁဵတ်းယႂ်ႇလူင်။ ၸတ်းႁဵတ်းၸွမ်းၼင်ႇ ၾိင်ႈထုင်းမီးဝႆႉ တေဢဝ်ၵႂၢႆး 4-5 တူဝ်သေ မႃးတေႃးၵၼ် ၵူၺ်း။ ပီၼႆႉ ပေႃးယဝ်ႉ တီႈမိူင်းယၢင်းယဝ်ႉ တေသိုပ်ႇၵႂႃႇတီႈမိူင်းၵွႆ။ တီႈမိူင်းၵွႆၼၼ်ႉ တေၸတ်းမိူဝ်ႈလႂ်တႄႉ ပႆႇႁူႉၶဝ်တေတူၺ်းဝၼ်း လီမၼ်းထႅင်ႈၵမ်ႉၵွၼ်ႇ” – ၸၢႆးလိူၼ်ၶမ်း သိုပ်ႇလၢတ်ႈၼႄၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 29/12/2022 တီႈဢိူင်ႇမိူင်းလူၺ်တႄႉ ၸတ်းႁဵတ်းယဝ်ႉ ပွႆးၵႂၢႆးတေႃးဝၼ်းၼိုင်ႈ တေမီးၵႂၢႆး ၶဝ်ႈၶဵင်ႇၵၼ် ဢမ်ႇယွမ်း 20 တူဝ်။