ပလိၵ်ႈထႆးမႄႈသွတ်ႇၸိုင်ႈထႆး ၵူတ်ႇထတ်းႁွင်ႈထႅဝ်တီႈႁႅင်းၵၢၼ်ယူႇသဝ်း တီ့ၺွပ်း လႆႈ ၵူၼ်းဢမ်ႇမီးဝတ်းဝႂ်သင်၊ ယင်းပိုၼ်ၽၢဝ်ႇပႃးဝႃႈ တီ့လႆႈပႃးယႃႈမဝ်းၵမ်ဝႃႈၼႆ ။
ၶၢဝ်ႇ ThaiPBS ဢွၵ်ႇဝႆ့ဝႃႈ ဝၢႆးၶူဝ်မိုတ်ႈၵိုဝ်းလႅၼ်လိၼ် ထႆး-မၢၼ်ႈ တီႈမျႃႉဝတီႇ ပိုတ်ႇယဝ့်ၼၼ့် မိူဝ်ႈ ဝၼ်းတီႈ 18 /1 / 2023 ပလိၵ်ႈထႆး ၶဝ်ႈၵူတ်ႇထတ်းႁွင်ႈ ထႅဝ်ႁႅင်းၵၢၼ် ၼႂ်းပွၵ်ႉယွမ်ႇ ၸႄႈဝဵင်း မႄႈသွတ်ႇ ၊ တီ့ၺွပ်းလႆႈသွင်ၵေႃ့ၽူဝ်မေး ၵူၼ်းမိူင်းမၢၼ်ႈ ယူႇသဝ်းလူၺ်ႈဢမ်ႇမီးဝတ်းဝႂ်သင်။ ၵေႃႉပဵၼ်မေး ၼၼ်ႉ မီးၾၢင်ႁၢင်ႈ မဝ်းယႃႈဝႆႉလႄႈ ပလိၵ်ႈသိုပ်ႇသွၵ်ႈတူၺ်းၼႂ်းႁွင်ႈ လႆႈႁၼ်ႁေႃႇ ယႃႈမ လၢႆလၢႆသႅၼ်း တင်းမူတ်းယႃႈမ မီး 75000 မဵတ့် – ပလိၵ်ႈပိုၼ်ၽၢဝ်ႇဝႆႉၼင်ႇၼႆ ။
သွင်ၵေႃႉၽူဝ်မေးၼၼ့် လၢတ်ႈဝႃႈ ၸင်ႇႁႃဢဝ်ယႃႈမ ၶဝ်ႈမိူင်းထႆး ပဵၼ်ပွၵ်ႈဢွၼ်တၢင်းသုတ်း ဝႃႈၼႆ။ ၵူၺ်းၵႃႈ ၾၢႆႇပလိၵ်ႈထႆး ၵူတ်ႇသွၵ်ႈထတ်းထၢမ်သေ ပိုၼ်ၽၢဝ်ႇဝႃႈ – လႅပ်ႈတေမီး ၸုမ်းၵႃႉယႃႈမ ဢဵၼ်ႁႅင်းယႂ်ႇယူႇၾၢႆႇလင်ဝႆႉ ဝႃႈၼႆ။
မိူဝ်ႈလဵဝ် ၾၢႆႇပလိၵ်ႈထႆး တီ့ၺွပ်းႁႅင်းၵၢၼ်သွင်ၵေႃ့ၽူဝ်မေးၼၼ့်သေ တေပၼ်တၢင်းၽိတ်းၸွမ်းၼင်ႇ မၢႆမီႈၸိုင်ႈမိူင်းမီးဝႆ့ဝႃႈၼႆ။
ႁူဝ်ပီ 2023 ၼႆ့ ၸဝ်ႈၼႃႈတီႈထႆး တီ့ၺွပ်းလႆႈ ၵူၼ်းၶၢမ်ႈလႅၼ်ၽိတ်းပၵ်းပိူင်လႄႈ ယႃႈမဝ်းၵမ်ၼမ်လၢႆ။
မိူဝ်ႈဝၼ်းတီႈ 12/1/2023 ၼၼ့်ၵေႃႈ ၸဝ်ႈၼႃႈတီႈထႆး ၾၢႆႇၵူတ်ႇထတ်းၵူၼ်းၶဝ်ႈမိူင်း တီႉၺွပ်းလႆႈ ၵူၼ်းၶၢမ်ႈလႅၼ်လိၼ်ၶဝ်ႈမိူင်းထႆး 32 ၵေႃႉ တီႈဝဵင်းဢူမ်ႊၵွႆ(อำเภอมก๋อย) ၸႄႈဝဵင်းၵဵင်းမႆႇ။ဝၼ်းၼၼ့်ၼင်ႇၵဝ်ႇ ၵူၼ်းတေႃႉယႃႈမဝ်းၵမ်ၶၢမ်ႈလႅၼ်လိၼ် ၺႃးၸဝ်ႈၼႃႈတီႈ ထႆးယိုဝ်းတၢႆ 5 ၵေႃႉ တီႈဢိူင်ႇႁူၺ်ႈၶႆ့ ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆးၸိုင်ႈထႆး။
ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆ့ ၸုမ်းတေႃ့ယႃႈၶဝ်ႈမိူင်းထႆး မီးၵူႈဝၼ်း။ၸုမ်းတေႃ့ယႃႈမၢင်ၸုမ်း ယိပ်းပႃးၵွင်ႈၵၢင်ႇသေ မၢင်ပွၵ်ႈပဵၼ်လွင်ႈပိုတ်းယိုဝ်းၵၼ်တင်း ၸဝ်ႈၼႃႈတီႈထႆးၾၢႆႇပႂ်ႉလႅၼ်လိၼ်ၵေႃႈမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ