Thursday, February 9, 2023

တႆး – ထႆး လႅၵ်ႈလၢႆႈ ၾိင်ႈႁိတ်ႈႁွႆးၵၼ် ပွၵ်ႈၵမ်းႁႅၵ်ႈ တီႈဝဵင်းၵဵင်းမႆႇ

Must read

ၸၢဝ်းတႆး – ထႆး (ယူၼ်း) တေႁူမ်ႈၵၼ် ၸတ်းႁဵတ်းပၢင်ပွႆးဢုပ်ႇဢူဝ်းလႅၵ်ႈလၢႆႈ ပိုၼ်းႁူႉ ၵဵဝ်ႇၵပ်းလွင်ႈၾိင်ႈႁိတ်ႈႁွႆးတႆး – ထႆး ပွၵ်ႈၵမ်းႁႅၵ်ႈ ၼႂ်းၸႄႈတွၼ်ႈၵဵင်းမႆႇ ၸိုင်ႈထႆး။

ပေႃးထိုင်မႃး ဝၼ်းတီႈ 4-5/3/2023 ၸိုင် ၸုမ်းလၢႆးတႆး ႁူႉၵႅမ်တူဝ်တင်း ၸၢဝ်းထႆး (ယူၼ်း) သေ တေႁူမ်ႈၵၼ် ၸတ်း ႁဵတ်းပၢင်ပွႆးဢုပ်ႇဢူဝ်းလႅၵ်ႈလၢႆႈ ၾိင်ႈႁိတ်ႈႁွႆးတႆး – ထႆး တီႈဝတ်ႉသၼ်မၢၵ်ႇၵဵင် ၸႄႈဝဵင်းလွႆသၵဵတ်း ၸႄႈတွၼ်ႈၵဵင်းမႆႇ ၸိုင်ႈထႆး ၼႆယဝ်ႉ။

ၸၢႆးၼုမ်ႇတႆး ၸုမ်းလၢႆးတႆး ႁူႉၵႅမ်တူဝ် လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈတင်း ဝတ်ႉႁူမ်ႈပႃး ၵေႃၵမ်ၵၢၼ်ဝတ်ႉသေ တေ ႁူမ်ႈၵၼ် ၸတ်းပၢင်ပွႆးဢုပ်ႇဢူဝ်းလႅၵ်ႈလၢႆႈ ၾိင်ႈႁိတ်ႈႁွႆးတႆး – ထႆး ၶၢဝ်းတၢင်း 2 ဝၼ်း။ ၼႂ်းပၢင်ပွႆးၼႆႉ တေမႃးလႅၵ်ႈလၢႆႈ ၵၼ် မိူၼ်ၼင်ႇ ၾိင်ႈထုင်းတႆး မိူၼ်ၼင်ႇ ၾိင်ႈၵိၼ်ယႅမ်ႉ ၶွင်ၵိၼ်တႆး၊ ၶူဝ်းၼုင်ႈတင်းဝႂ်၊ တၢင်းၵႃႈယိူင်း/ ၸိူင်း၊ လၢႆးမိုဝ်း၊ လၢႆးလႅဝ်း၊ ၼူၵ်ႉတူဝ်း ၸိူဝ်းၼႆႉ။ ယဝ်ႉၵေႃႈ တၢင်းၾၢႆႇပီႈၼွင်ႉထႆး – ယူၼ်းၶဝ်ၵေႃႈ တေဢဝ်ၾိင်ႈၶဝ် မႃးလႅၵ်ႈလၢႆႈၼႄၵႂႃႇ မိူၼ်ၵၼ်”- ဝႃႈၼႆ။

ပၢင်ၵုမ် ပွႆးၾိင်ႈႁိတ်ႈႁွႆးတႆး တီႈဝတ်ႉသၼ်မၢၵ်ႇၵဵင်ၼႆႉ လႆႈၸတ်းႁဵတ်းၵႂႃႇ မိူဝ်ႈဝၼ်းတီႈ 15/1/2023 ယၢမ်းဝၢႆးဝၼ်း 3 မူင်း ထိုင် 6 မူင်းႁူဝ်ၶမ်ႈ ၼႆယဝ်ႉ။

ၼႂ်းဝၼ်းပၢင်ပွႆးဢုပ်ႇဢူဝ်းလႅၵ်ႈလၢႆႈၾိင်ႈႁိတ်ႈႁွႆးတႆး – ထႆး ဢၼ်တေၸတ်းႁဵတ်း ၼႂ်းဝၼ်းတီႈ 4-5/3/2023 ၼၼ်ႉ တေ မီးၸုမ်းတူင်ႉၼိုင်တူင်ႇဝူင်းတႆး ၼႂ်းၸႄႈဝဵင်းၵဵင်းမႆႇ လၢႆမူႇၸုမ်း ၶဝ်ႈႁူမ်ႈတူင်ႉၼိုင် ၼႄတၢင်းၵႃႈယိူင်း/ ၸိူင်း။ ယဝ်ႉၵေႃႈ တေမီး ၵေႃလိၵ်ႈလၢႆး ဝဵင်းၵဵင်းမႆႇ၊ ၶူးသၢင်ႇၶမ်း၊ ၽူႈယႂ်ႇဝၢၼ်ႈလႄႈ ၽူႈၵွၼ်းဝတ်ႉ တေၶဝ်ႈႁူမ်ႈပိုတ်ႇပၢင်ပွႆးၵႂႃႇ ၸၢႆးၼုမ်ႇတႆး လၢတ်ႈၼႄၼင်ႇၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- SHAN's Apps -spot_img

ၶၢဝ်ႇလိုၼ်းသုတ်း