ၸဝ်ႈၶူးဝႃးဝုၼ်းၸုမ်ႉ ယေႃးမုၼ်ႁွတ်ႈထိုင် ဝဵင်းမိူင်းၾၢင် ၸိုင်ႈထႆး

မိူဝ်ႈၼႆႉ ဝၼ်းတီႈ 11/1/2023 ယၢမ်းဝၢႆးဝၼ်း 2:23 မူင်း ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ယေႃးမုၼ် ႁွတ်ႈၽႅဝ်ထိုင် တီႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ ၸိုင်ႈထႆးသေ မဵတ်ႉတႃႇထမ်းပၼ် တၵ်ႉၵႃႇသတ်ႉထႃး ၼႂ်း 3 ၸႄႈဝဵင်း (မႄႈ ဢၢႆး – မိူင်းၾၢင် – ၶျႆးပရၵၢၼ်း) ၵႂႃႇ ၼႆယဝ်ႉ။

ပႃႈၼၢင်းၶမ်း ၽူႈၶဝ်ႈႁူမ်ႈ ႁပ်ႉတွၼ်ႈဝႆႈသႃ လၢတ်ႈတီႈၽူႈတွႆႇႁွၵ်ႈဝႃႈ – “ၸဝ်ႈၶူးဝႃးဝုၼ်းၸုမ်ႉ မႃးႁွတ်ႈၽႅဝ် မိူင်း ၾၢင် ယၢမ်းဝၢႆးဝၼ်း 2:23 မူင်းၼႆႉသေ ယင်ႉလိုဝ်ႈမွၵ်ႈ 3 မိၼိတ်ႉၵေႃႈ မၼ်းၸဝ်ႈသိုပ်ႇႁေႃးတြႃးၵႂႃႇၵမ်းလဵဝ် ႁိုင်ၸူဝ်ႈမူင်းပၢႆ။ ဝၢႆးယဝ်ႉၼႆႉ ၸဝ်ႈၶူးဝႃး သိုပ်ႇၶၢဝ်းတၢင်းၵႂႃႇၵမ်းလဵဝ်။ လွင်ႈၶၢဝ်းတၢင်းၸဝ်ႈႁဝ်းတႄႉ ဢမ်ႇလႆႈႁူႉၸွမ်းၶႃႈ ဝႃႈတေၵႂႃႇ တၢင်းလႂ်။ မၼ်းၸဝ်ႈၵေႃႈ ဢမ်ႇလၢတ်ႈဝႆႉၶႃႈ ဝႃႈတေဢွၵ်ႇၶၢဝ်းတၢင်းၵႂႃႇတၢင်းလႂ် ၸိူဝ်းၼႆႉ”- ဝႃႈ ၼႆ။

တႄႇဢဝ် မိူဝ်ႈဝႃး ဝၼ်းတီႈ 10/1/2023 ယၢမ်းဝၢႆးဝၼ်း ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တႄႇဢွၵ်ႇၶၢဝ်းတၢင်း တီႈဝဵင်း ၵဵင်းသႅၼ် ၸႄႈတွၼ်ႈၵဵင်းႁၢႆးသေ ၵႂႃႇတၢင်းမႄးသလွင်း။ မိူဝ်ႈၼႆႉ ဝၼ်းတီႈ 11 ယၢမ်းဝၢႆးဝၼ်း သိုပ်ႇၶၢဝ်းတၢင်း ဢိူင်ႇတႃႈ တွၼ်း – မႄႈဢၢႆး – မိူင်းၾၢင် ယဝ်ႉၵေႃႈ သိုပ်ႇဢွၵ်ႇၶၢဝ်းတၢင်းထႅင်ႈယဝ်ႉ ၵူၺ်းၵႃႈ သိုပ်ႇၵႂႃႇတၢင်းလႂ်တႄႉ ၽႂ်ပႆႇႁူႉ။

ပၢင်မဵတ်ႉတႃႇထမ်း ၸဝ်ႈသိလ်ထမ်းၶူးဝႃး ဝုၼ်းၸုမ်ႉ တီႈဝဵင်းမိူင်းၾၢင်ၼၼ်ႉ မီးတၵ်ႉၵႃႇသတ်ႉထႃး တီႈၸမ်ၵႆ ၶဝ်ႈႁူမ်ႈဝႆႈသႃ ၼပ်ႉႁူဝ်မိုၼ်ႇလႄႈ မီးလွင်ႈၸႃႇၵ လဵင်ႉလူထႅင်ႈ တင်းၼမ်။