သိုၵ်းမၢၼ်ႈ ၸႂ်ႉၽူႈၵွၼ်းပွၵ်ႉ လူင်းၵဵပ်းသဵၼ်ႈမၢႆႁူဝ်ၵူၼ်းၼႂ်းပွၵ်ႉ/ ယွမ်ႇ တႃႇပၢင်လိူၵ်ႈတင်ႈ ပီ 2023 ၼႆႉ ၵူၼ်းပိုၼ်ႉတီႈ ၸႄႈဝဵင်းလွႆလႅမ် မႆႈၸႂ် သင်ဢမ်ႇသႂ်ႇသဵၼ်ႈမၢႆၸိုဝ်ႈ ၵူဝ်ၶဝ်ဢဝ်ၸိုဝ်ႈၸဝ်ႈၵဝ်ႇ ၵႂႃႇလိူၵ်ႈၽူႈတႅၼ်းတၢင်ႇၵေႃႉပႅတ်ႈ။

တႄႇဢဝ် ဝၼ်းတီႈ 9/1/2023 ၼႆႉမႃး ၶွင်ႇသီႇသိုၵ်းမၢၼ်ႈ ယိုတ်းမိူင်း ၸီႉသင်ႇ ႁႂ်ႈၵူၼ်းလူင်ၼႂ်းပွၵ်ႉတင်း မေႃသွၼ် ၼႂ်း ႁူင်းႁဵၼ်းလူင်ပွင်ၸိုင်ႈ လူင်းၵဵပ်းသဵၼ်ႈမၢႆႁူဝ်ၵူၼ်း ၸွမ်းၼႂ်းပွၵ်ႉယွမ်ႇ/ ဢိူင်ႇ ၼႂ်းဝဵင်းပၢင်လူင်လႄႈ ဝဵင်းလွႆလႅမ် ၸိူဝ်းၼႆႉ မႃး တႃႇပၢင်လိူၵ်ႈတင်ႈ ပီ 2023 ဢၼ်ယူႇတီႈ သိုၵ်းမၢၼ်ႈ ယိုတ်းမိူင်း တေဢွၼ်ၸတ်းႁဵတ်း ၸွမ်းၼင်ႇပိူင် PR ၼၼ်ႉ ဝႃႈ ၼႆ။

ၵူၼ်းပိုၼ်ႉတီႈ ဝဵင်းလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ – “ၵွၼ်ႇၶဝ် တေမႃးၵဵပ်းသဵၼ်ႈမၢႆၼႆႉ ၵူၼ်းလူင်ပွၵ်ႉယွမ်ႇ မႃးလၢတ်ႈဝႆႉ 10 လင်ႁိူၼ်း ႁႂ်ႈႁူမ်ႈၵၼ်ဝႆႉတီႈလဵဝ်သေ တေၵဵပ်းၵႂႃႇ။ ၼင်ႇႁိုဝ် တေဢမ်ႇသုမ်းၶၢဝ်းယၢမ်း။ ၵူၼ်းဢၼ်မႃးၵဵပ်းၼႆႉ ပဵၼ် ၵူၼ်းလူင်ပွၵ်ႉမေႃသွၼ် ၸိူဝ်းၼႆႉ။ ၾၢႆႇသိုၵ်းမၢၼ်ႈတင်း ပလိၵ်ႈ(ယေး) တႄႉ ဢမ်ႇလႆႈႁၼ်။ ဢၼ် ၶဝ်ၵဵပ်းၵႂႃႇတႄႉ ပဵၼ် သဵၼ်ႈမၢႆၵူၼ်းဢၼ်မီးတီႈႁိူၼ်း၊ ၵူၼ်းဢၼ်လူႉသဵင်ႈလႄႈ ၵူၼ်းဢွၵ်ႇၶၢဝ်းတၢင်းဝႆႉ ၸိူဝ်းၼႆႉ။ ယွၼ်ႉလွင်ႈၸိူဝ်းၼႆႉသေ ၵူၼ်း မိူင်းတႄႉ ဢမ်ႇႁူႉဝႃႈ သဵၼ်ႈသၢႆမၢႆၵူၼ်းတၢႆလႄႈ ၵူၼ်းဢွၵ်ႇၶၢဝ်းတၢင်းၵႆၼႆႉ ၶဝ်တေဢဝ်ၵႂႃႇႁဵတ်းသင်”- ဝႃႈၼႆ။

ၵၢၼ်ၵဵပ်းသဵၼ်ႈမၢႆႁူဝ်ၵူၼ်းၼႆႉ မၢင်ၸႄႈဝဵင်း ၵဵပ်းမႃး တင်ႈတႄႇႁၢင်ပီ 2022 လႄႈ ႁူဝ်ပီ 2023 ၼႆႉ ။ ၵမ်ႈၼမ် တေပဵၼ် သိုၵ်းမၢၼ်ႈ၊ ၾၢႆႇၵူတ်ႇထတ်းၵူၼ်းၶဝ်ႈမိူင်း (လဝၵ) လႄႈ ၵူၼ်းလူင်ၼႂ်းပွၵ်ႉ ၸိူဝ်းၼႆႉ။ မၢင်ၸႄႈဝဵင်း မီးၸုမ်းယိပ်းၵွင်ႈၵၢင်ႇ မႃးယိုဝ်း ၽွင်းဢွၵ်ႇၵဵပ်းသဵၼ်ႈမၢႆ ၸိူဝ်းၼႆႉၵေႃႈမီး ၼႆယဝ်ႉ။

ၼႂ်းၸႄႈဝဵင်းလွႆလႅမ်ၼႆႉ မီး 4 ပွၵ်ႉ ၵိင်ႇၽႄၸႄႈဝဵင်းပၢင်လူင်သမ်ႉမီးထႅင်ႈ 4 ပွၵ်ႈ။ တႂ်ႈၸႄႈဝဵင်းလွႆလႅမ်သမ်ႉ မီးထႅင်ႈ 27 ဢိူင်ႇ။ ႁူဝ်ၵူၼ်း ဢၼ်ယူႇသဝ်းသမ်ႉ တေပဵၼ်ၸၢဝ်းတႆး၊ ပဢူဝ်း၊ ထၼု၊ တွင်ႇလိူဝ်း၊ တဢၢင်း၊ ယၢင်း၊ ၶႄႇလႄႈ မၢၼ်ႈ ၸိူဝ်းၼႆႉ။