မႄႈလုၵ်ႈဢွၼ်ႇဢၼ်ၺႃးသိုၵ်းမၢၼ်ႈပၼ်တူတ်ႈတၢမ်ႇတူၵ်းၶွၵ်ႈတီႈမိူင်းတူၼ် ၶိုၼ်းလွတ်ႈဢွၵ်ႇမႃးၶိုၼ်း။
ၼၢင်းၺူဝ်ႇမီႇဢွင်ႇ ဢႃယု 40 ပီပၢႆ မႄႈလုၵ်ႈဢွၼ်ႇ 3 ၵေႃႉ ဢၼ်ပလိၵ်ႈမၢၼ်ႈ ၼႄးဝႃႈ ၵဵဝ်ႇၶွင်ႈ ၵၢၼ်မိူင်းသေ ၺႃးပိုၼ်ၽၢဝ်ႇဝႆႉလူၺ်ႈမတ်ႉတႃ 505 (ၵ) ယဝ့် တီႉၺွပ်းၵုမ်းၶင်ၶွၵ်ႈဝႆ့ၼၼ့် ၶိုၼ်းလွတ်ႈဢွၵ်ႇမႃးၶိုၼ်း မိူဝ်ႈဝၼ်းတီႈ 4/1/2023 ၼႂ်းဝၼ်းလွတ်ႈလႅဝ်းမိူင်းႁူမ်ႈတုမ် ။
ၵူၼ်းၸမ်ၸႂ်ၼၢင်းၺူဝ်ႇမီႇဢွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ဢၼ်ၶိုၼ်းလွတ်ႈဢွၵ်ႇမႃး မီးမွၵ်ႈသွင်ၵေႃ့ ၼႆ့ၵွႆး ဢေႃႈ။ ဢၼ်ပဵၼ်ၽူႈၸွပ်ႇၶၢဝ်ႇ DVB ၼၼ့်ၵေႃႈပႃး ၼၼ့်ၼႃႇၼေႃႈ။ ၵူၼ်းၸိူဝ်း ဢၼ်သိုၵ်းမၢၼ်ႈၶဝ်ႈၼႄးဝႃႈ ပဵၼ်ၸုမ်းၵမ့်ထႅမ် PDF သေ ၺႃးၺွပ်းၸိူဝ်းၼၼ့်တႄ့ ဢမ်ႇႁၼ် လွတ်ႈမႃး သေၵေႃ့ၶႃႈ။ ၵူၼ်းဢၼ်လွတ်ႈဢွၵ်ႇမႃးၶဝ် လၢတ်ႈဝႃႈတႄ့ ဢၼ်ဢမူ့မၼ်းဢမ်ႇပေႃးယႂ်ႇၼၼ့်ၵွႆး ဢၼ်ပၼ်လွတ်ႈဢွၵ်ႇမႃး ၼႆဢေႃႈ” – ဝႃႈၼႆ။
ဢၼ်သိုၵ်းမၢၼ်ႈယိုတ်းမိူင်း ပွႆႇၵူၼ်းတူၵ်းၶွၵ်ႈမိူင်းတူၼ်လွတ်ႈဢွၵ်ႇမႃးၼၼ့် ၼၢင်းၺူဝ်ႇမီႇဢွင်ႇ ဢႃယု 40 ပၢႆ လႄႈ ဢူးဢွင်ႇဝုၼ်းထေး ( ၽူႈသိုဝ်ႇၶၢဝ်ႇၵဝ်ႇ DVB ) ဢႃယု 40 ပၢႆ ။
ၼၢင်းၺူဝ်ႇမီႇဢွင်ႇ ၼႆ့ ၺႃးတီႉၺွပ်း ၶင်ၶွၵ်ႈ တီႈၸႄႈဝဵင်းမိူင်းတူၼ် မိူဝ်ႈဝၼ်းတီႈ 21/10/2022 ပလိၵ်ႈ မၢၼ်ႈၶိုၼ်းသူင်ႇတူဝ် ၵုမ်းၶင်တီႈၶွၵ်ႈလူင်မိူင်းသၢတ်ႇ ၶၢဝ်းတၢင်းမွၵ်ႈ 5 လိူၼ်သေ ၶိုၼ်းလွတ်ႈ ဢွၵ်ႇ မႃးၶိုၼ်း။မိူဝ်ႈလဵဝ် လုၵ်ႈၸၢႆး 3 ၵေႃႉ ၸိူဝ်းပႆႇပေႉတူဝ်လႄႈ ဢမ်ႇမီးၽႂ် လုမ်းလႃးတူၺ်းထိုင် ၵူၼ်းႁိမ်းႁွမ်း ႁိူၼ်းလႆႈၸွႆႈၵၼ်တူၺ်းလူၸိူဝ်းၼၼ့် ဢွၼ်ၵၼ်ၸူမ်းႁပ့်။
သိုၵ်းမၢၼ်ႈယိုတ်းမိူင်း ပွႆႇၵူၼ်းတူၵ်းၶွၵ်ႈ ၵမ်းၼႆႉ တင်းမူတ်းပဵၼ် 7000 ပၢႆဝႃႈၼႆသေတႃႉ ၵူၼ်းတူၵ်းၶွၵ်ႈၵၢၼ်မိူင်း ပႃးၵမ်ႈဢေႇ။ၵူၼ်းမိူင်းတူၼ် ၸိူဝ်းဢၼ် ၺႃးပလိၵ်ႈမၢၼ်ႈတီႉၺွပ်း ၵုမ်းၶင်ဝႆႉ(အကျယ်ချူပ်) ၸိူဝ်းၼၼ့်ၵေႃႈ ပႆႇလွတ်ႈမႃး။ တေႃႇထိုင်ယၢမ်းလဵဝ်တိုၵ်ႉလႆႈတေႃႇသူႈ ဢမူႉ ၶၻီႊယူႇ။
