ဝၢၼ်ႈတႆး – ၶၢင် 3 ဝၢၼ်ႈ ၼႂ်းၸႄႈဝဵင်းၽႃၵၢၼ်ႉ ထုၵ်ႇသိုၵ်းမၢၼ်ႈ ယိုတ်းမိူင်း ဝႆႉပဝ်ႉမၢႆ မၵ်းတတ်း ပဵၼ်ပိုၼ်ႉ တီႈသီလမ်သေ ယိုဝ်းၵွင်ႈလူင်သႂ်ႇၵူႈၶမ်ႈ ႁဵတ်းႁႂ်ႈၵူၼ်းဝၢၼ်ႈမႆႈၸႂ် ၵူဝ်ၺႃးၸၢၵ်ႇမၢၵ်ႇ ဢွၼ်ၵၼ်ပၢႆႈၶဝ်ႈဝဵင်း။
တႄႇဢဝ် ႁၢင်လိူၼ်ၻီႊသႅမ်ႊပိူဝ်ႊ 2022 ၼၼ်ႉမႃး တေႃႇထိုင်ယၢမ်းလဵဝ် သိုၵ်းမၢၼ်ႈ ဢၼ်ပၵ်းဝႆႉတီႈ တပ်ႉပၢင်သဝ်းၶဝ်ဢၼ်မီးႁိမ်း မၸုပ်းယၢင်ႇ ၼၼ်ႉသေ ယိုဝ်းၵွင်ႈသႂ်ႇဝၢၼ်ႈမေႃႇပုင်ႇ၊ ဝၢၼ်ႈသင်ႇၶႃႇလႄႈ ဝၢၼ်ႈမၸုပ်ႉယၢင်ႇ ဢၼ်ယူႇယၢၼ်ၵႆဝဵင်းမွၵ်ႈ 8 လၵ်း ၾၢႆႇၸဵင်ႇႁွင်ႇဝၼ်းဢွၵ်ႇ ၸႄႈဝဵင်းၽႃၵၢၼ်ႉၼၼ်ႉ ၵူႈၶမ်ႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ လူႉတၢႆ 1 ၵေႃႉ၊ မၢတ်ႇၸဵပ်း 6 ၵေႃႉ ၼႆယဝ်ႉ။
ၵူၼ်းပိုၼ်ႉတီႈ ဝဵင်းၽႃၵၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ မၵ်းတတ်းဝႃႈ 3 ဝၢၼ်ႈၼႆႉ ပဵၼ်ပိုၼ်ႉတီႈသီလမ်ၼႆ သေ ၶဝ်ယိုဝ်းၵွင်ႈလူင်သႂ်ႇ ၶိူဝ်းယႂ်း။ ၵမ်ႈၼမ် တေပဵၼ်ယၢမ်းၵၢင်ၶမ်ႈ 9 – 10 မူင်း။ 1 ၶမ်ႈၼႆႉ ၶဝ်တေယိုဝ်းမၢၵ်ႇလူင်သႂ်ႇ ဢမ်ႇယွမ်း 4-5 လုၵ်ႈ။ ဢၼ်ၶဝ်ဝႃႈ မၵ်းတတ်း ပဵၼ်ပိုၼ်ႉတီႈသီလမ်ၼႆ ၶဝ်ႁဵတ်းႁိုဝ်လႄႈ မၵ်းတတ်းတႄႉ ဢမ်ႇႁူႉ။ ၶဝ် တင်ႈၸႂ် ဝႆႉၵူၼ်းမိူင်းပဵၼ်ပဝ်ႉမၢႆသေ ယိုဝ်းသႂ်ႇၵူၺ်း။ ၶဝ်ယိုဝ်းၾၢႆႇလဵဝ် ပၢင်တိုၵ်းၵေႃႈဢမ်ႇပဵၼ် ဢဝ်ၵၢင်ၸႂ်ၶဝ်ဝႃႈ မၢင်ပွၵ်ႈ မႃး ၵၢင်ၼႂ်၊ ၵၢင်ဝၼ်း ၸိူဝ်းၼႆႉၵေႃႈ ယိုဝ်းဢေႃႈ”- ဝႃႈၼႆ။
လွင်ႈသိုၵ်းမၢၼ်ႈ ယိုဝ်းၵွင်ႈလူင်သႂ်ႇ ၸိူင်ႉၼႆၼႆႉ ၸၢၵ်ႇမၢၵ်ႇလူင် တူၵ်းသႂ်ႇ ၵူၼ်းဝၢၼ်ႈသင်ႇၶႃႇ ဢၼ်ပၢႆႈၵႂႃႇသွၼ်ႈဝႆႉ တီႈၵျွင်း ၶရိတ်ႉယၢၼ်ႇၼၼ်ႉ မၢတ်ႇၸဵပ်း 5 ၵေႃႉ။ ၼႂ်းၼၼ်ႉ လူႉတၢႆ 1 ၵေႃႉ။ ယဝ်ႉၵေႃႈ လုၵ်ႈဢွၼ်ႇ ဢႃယုမွၵ်ႈ 6 ၶူပ်ႇ 1 ၵေႃႉ လႆႈ တိူဝ်ႉမၢတ်ႇၸဵပ်းႁႅင်း။ မိူဝ်ႈဝၼ်းတီႈ 2/1/2023 ၼၼ်ႉ မွၵ်ႇလူင်တူၵ်းတႅၵ်ႇ ၼႂ်းဝၢၼ်ႈမေႃႇပုင်ႇ တိူဝ်ႉသႂ်ႇၵူၼ်းဝၢၼ်ႈမၢတ်ႇ ၸဵပ်း 1 ၵေႃႉ၊ ၼႂ်းဝၼ်းၼၼ်ႉၵူၺ်း မၢၵ်ႇလူင်တူၵ်းတႅၵ်ႇထႅင်ႈ ၼႂ်းဝၢၼ်ႈသင်ႇၶႃႇ ၵူၼ်းဝၢၼ်ႈမၢတ်ႇၸဵပ်း 1 ၵေႃႉ ။ ယဝ်ႉၵေႃႈ တူၵ်းသႂ်ႇႁိူၼ်းယေး ၵူၼ်းဝၢၼ်ႈလူႉၵွႆ ၸွမ်းထႅင်ႈပဵၼ်လၢႆလင်။
ပေႃးထိုင်ၶၢဝ်းႁူဝ်ၶမ်ႈမႃး ၵူၼ်းဝၢၼ်ႈ 3 ဝၢၼ်ႈၼႆႉ လႆႈႁႅၼ်းၶူဝ်း ၶၢႆႉၵႂႃႇၼွၼ်းၸွမ်းႁိူၼ်းယေး ပီႈၼွင်ႉၽႂ်မၼ်း ၸွမ်းၶႅပ်ႇဝဵင်း ၼႂ်းဝဵင်းၽႃၵၢၼ်ႉ ။ ပေႃးထိုင်မိူင်းလႅင်းမႃးၸိုင် ၸင်ႇဢွၼ်ၵၼ်ပွၵ်ႈၶိုၼ်းႁိူၼ်းယေး မႃးႁဵတ်းၵၢၼ်ၽႂ်မၼ်း။
“ယွၼ်ႉၶဝ်ယိုဝ်းၵွင်ႈလူင်ၵူႈၶမ်ႈလႄႈ ပေႃးထိုင်ႁူဝ်ၶမ်ႈမႃး ႁဝ်းၶႃႈ ၵူၼ်းဝၢၼ်ႈဢွၼ်ၵၼ်ဢဝ်ၵႃးၽႂ်မၼ်းသေ ပၢႆႈၵႂႃႇ ၼွၼ်း ၸွမ်းႁိူၼ်းယေး ပီႈၼွင်ႉၽႂ်မၼ်းၼႂ်းဝဵင်း။ ဢမ်ႇမီးၽႂ်ႁတ်းယူႇၶႃႈ ၵူဝ်မၢၵ်ႇလူင်ၶဝ်တူၵ်းသႂ်ႇ။ ယၢပ်ႇၸႂ်ၼႃႇ ပေႃးတေပၢႆႈၵႂႃႇ ယူႇတၢင်ႇတီႈ ၵၢၼ်ႁႃၵိၼ်လဵင်ႉတွင်ႉႁဝ်းသမ်ႉ မီးတီႈဝၢၼ်ႈၼႆႉ လူဝ်ႇႁဵတ်းႁႃၵိၼ်တီႈၼႆႈ။ ထႅင်ႈလွင်ႈၼိုင်ႈ ၵူဝ်ၶဝ်ဢဝ်ၶိူင်ႈ မိၼ်မႃးယိုဝ်း မိူၼ်ၼင်ႇ တၢင်းတီႇပေးယဵၼ်း(ဒီပဲယင်း)၊ ၶိၼ်ႇဢူး(ခင်ဉီး) ၼၼ်ႉ ၶဝ်ဢဝ် ၾႆးၾႃႉသျွတ်ႉၶႃႈဢေႃႈ။ ႁဝ်းၶႃႈ ၵူဝ်ပဵၼ်ၸိူင်ႉၼၼ်ၶႃႈ ”- ၵူၼ်းပိုၼ်ႉတီႈ ဝဵင်းၽႃၵၢၼ်ႉ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းဝၢၼ်ႈ 3 ဝၢၼ်ႈၼႆႉ ယၢပ်ႇၸႂ် တႃႇႁဵတ်းၵၢၼ်ႁႃလဵင်ႉတွင်ႉ ယွၼ်ႉဝႃႈ ပေႃးထိုင်ၶၢဝ်းၵၢင်ၶမ်ႈသမ်ႉ လႆႈပၢႆႈ ဢွၵ်ႇဝၢၼ်ႈ ၵူဝ်မၢၵ်ႇလူင်တူၵ်းသႂ်ႇ ၵၢင်ဝၼ်းမႃး ၸင်ႇလႆႈၶိုၼ်းပွၵ်ႈမႃးႁဵတ်းၵၢၼ် ၼႆၸိူဝ်းၼႆႉ ဝႃႈၼႆ။
တၢင်းပွတ်းတွၼ်ႈ ဝၢၼ်ႈမေႃႇပုင်ႇ၊ ဝၢၼ်ႈသင်ႇၶႃႇလႄႈ ဝၢၼ်ႈမၸုပ်ႉယၢင် ၸိူဝ်းၼႆႉ မီးဝႆႉ သိုၵ်းမၢၼ်ႈ ယိုတ်းမိူင်း၊ သိုၵ်းၶၢင် KIA လႄႈ PDF ၸိူဝ်းၼႆႉ တူင်ႉၼိုင်ယူႇဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ