တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း မီးၵူၼ်းဢမ်ႇႁူႉၾၢႆႇ သိုပ်ႇၾူၼ်းလွၵ်ႇငိုတ်ႈယွၼ်းငိုၼ်း လိူင်ႇၼမ် မႃးႁႅင်း ၵူၼ်းမိူင်းၵူဝ်ဢမ်ႇမီးလွင်ႈႁူမ်ႇလူမ်ႈ။
လွင်ႈလွၵ်ႇၵိၼ်ၵၼ်တၢင်းဢွၼ်ႊလၢႆႊၼႆႉ တႄႇမီးၼမ်မႃး တင်ႈတႄႇႁၢင်ပီ 2022 လိူၼ် တီႊသိမ်ႊပိူဝ်ႊမႃး ။
ၼၢင်းယိင်းဢႃယု 40 ပၢႆ ၵူၼ်းပွၵ့်ပႃႇလႅင် ၵဵင်းတုင်ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ထူဝ်းမႃးလွၵ်ႇၵိၼ်ငိုၼ်း ၵူၼ်းႁိမ်းႁိူၼ်းႁဝ်းၼႆ့ၵေႃ့ၼိုင်ႈဢေႃႈ။ ၾၢႆႇပုၼ်ႉလၢတ်ႈမႃးဝႃႈ -သူပဵၼ်ၵူၼ်း ႁဵတ်းၵၢၼ်မိူင်းလႄႈ ၸၢင်ႈၺႃးတီႉၺွပ်းဢိူဝ်ႈ- ၼႆဢေႃႈ။ ၶဝ်ဝႃႈ မီးၵူၼ်းၵႂႃႇတိူင်ႇလၢတ်ႈ ၶဝ် လႄႈၶဝ်ႁူႉၼႆဝႃႇ။ ပေႃးဢမ်ႇၶႂ်ႈၺႃးၺွပ်းၵေႃႈ ပၼ်ငိုၼ်းၶဝ် 7 လၢၼ့်ငိုၼ်းမၢၼ်ႈၼႆဢေႃႈ။ ႁဝ်းဢွၼ်ၵၼ်ၵႂႃႇလၢတ်ႈပူႇၵႄႇၼႂ်းဝၢၼ်ႈသေ ပူႇၵႄႇၶဝ်ထူဝ်းႁႃၶဝ်ၶိုၼ်းယူႇ ဢမ်ႇဝႃႈႁိုဝ်ၶိုၼ်း ”- ဝႃႈၼႆ။
ၵူၼ်းၸိူဝ်းယိပ်းမၢႆၾူၼ်း လုၼ်ႈၵဝ်ႇ ဢၼ်တႄႇ မၢႆ 09525၊ 09524 ၸိူဝ်းၼႆ့ ၶႅၼ်းမီးၾူၼ်းထူဝ်းႁႃ ယွၼ်းငိုၼ်းၼမ်။
ၵူၼ်းၵဵင်းတုင်ၵေႃ့ၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မၼ်းဝႃႈ မၼ်းပဵၼ် ၽူႈမီးၸၼ့် ၼႂ်းတပ့်သိုၵ်းဝႃႇ။ မီးၵူၼ်းမႃးတၢင်ႇလၢတ်ႈမၼ်းဝႃႈ – ၼႂ်းပၢင်ၼႄၵၢင်ၸႂ်ပူၼ်ႉမႃးၼႆႉ ပႃးၽႂ်လၢႆလၢႆၼႆလႄႈ ၶဝ်မီးၶေႃႈမုလ်းမူတ်းယဝ်ႉ ၼႆဝႃႇ။ မၼ်းဝႃႈ မၼ်းၶႂ်ႈၸွႆးတြႃးႁဝ်း မိူဝ်ႈလႂ်ၵေႃႈလႆႈၼႆဝႃႇ။ ပေႃးၼင်ႇမၼ်းဝႃႈၼၼ်ႉတႄႉတႄႉၸိုင်မၼ်းၶႂ်ႈတီႉႁဝ်းၶၢဝ်းလႂ်ၵေႃႈမႃးၸူးၽူႈၵွၼ်းပွၵ်ႉႁဝ်းသေ မႃးတီႉႁဝ်းလႆႈလူးၼေႃႈ။ ၼႆႉတႄႉ မၼ်းပဵၼ်ၵၢၼ်လႅၼ်ၵိၼ်ၵၼ်ၵူၺ်းၼႆ ၶႃႈလၢမ်းႁူႉႁေၵေႃႈၶႃႈပိၵ်ႉၾူၼ်းပႅတ်ႈ။ ၵူၼ်းၼႂ်းၵၢတ်ႇလူင်ၵဵင်းတုင်ၸိူဝ်းၼႆ့ ၺႃးလွၵ်ႇၸိူင့်ၼႆၼမ်ယဝ့် ။ မၢင်ၵေႃ့ ပဵၼ်ၵူၼ်းထဝ်ႈၵူၼ်းၵႄႇၸိူဝ်းဢမ်ႇႁူႉၵႂၢမ်းမၢၼ်ႈၼၼ့် သမ့်ၵူဝ်ၼၼ့်ၼႃႇၼေႃ ဝႃႈတေမႃးႁဵတ်းၶဵၼ်တေႃႇၶဝ်ႁႃ့ၸိူဝ်းၼႆ့ဢေႃႈ ” – ဝႃႈၼႆ။
ၵူၼ်းၸိူဝ်းယၢမ်ႈတူင့်ၼိုင်ႈၼႂ်းပၢင်ၼႄၵၢင်ၸႂ်ၸိူဝ်းၼၼ့် လွမ်ၵူဝ်ယူႇၽႂ်မၼ်း ယွၼ့်ၵူဝ်မီးၽေး ထိုင်တူဝ်ၵဝ်ႇႁိုဝ် ဢမ်ႇၼၼ် ၵူၼ်းၼႂ်းၼႃႈႁိူၼ်း။တေႃႈၼင်ႇ မုၼ်ႈၸဝ်ႈၼင်ႈၵျွင်း ထၢတ်ႈၸွမ်သီႇရိ( ဝတ့်မၢၵ်ႇမူင်ႈၶမ်း ) ဝဵင်းၵဵင်းတုင် ၼၼ့်ၵေႃႈ ၺႃးလွၵ်ႇငိုတ်ႈၼင်ႇၼၼ်။
မုၼ်ၸဝ်ႈၼင်ႈၵျွင်းဝတ့်ထၢတ်ႈၸွမ်သီႇရိ လၢတ်ႈၼႄဝႃႈ- “ ၸႂ်ႈယဝ့် ထူဝ်းမႃးဝႃႈ ႁဝ်းပဵၼ်ၵူၼ်းၵမ့်ထႅမ် PDF ၼႆဝႃႇ။ ၶဝ်တေမႃးၺွပ်းႁဝ်းသႂ်ႇၶွၵ်ႈၼႆ။ပေႃးဢမ်ႇၶႂ်ႈတူၵ်းၶွၵ်ႈပၼ်ငိုၼ်းၶဝ် သႅၼ်ႁွမ်း 50 ၼႆဝႃႈ။ထၢမ်ၶဝ်ပဵၼ်ၽႂ်ၼႆၵေႃႈ သမ့်ဝႃႈပဵၼ် ၸယၽ ၼႆဝႃႇ။ ႁဝ်းၵႂႃႇၸႂ်ႉပူဝ်ႇမူးတပ့် 529 ဢၼ်မီးႁိမ်းႁဝ်းၼႆ့ ထူဝ်းႁႃတူၺ်းၵွၼ်ႇဢေႃႈ။ ပူဝ်ႇၼႂ်းတပ့်ၶဝ်ဝႃႈ မၼ်းဢမ်ႇၸႂ်ႈ ၸယၽ တေ့ ပဵၼ်ၵူၼ်းလႅၼ်ၵိၼ်ငိုၼ်းၵူၺ်းၼၼ့် ၼႆဢေႃႈ ” – ဝႃႈၼႆ။
မၢႆၾူၼ်းဢၼ်သိုပ်ႇၸူးၵူၼ်းမိူင်းသေ လွၵ်ႇငိူတ်ႇယွၼ်းငိုၼ်းၼၼ့် ပဵၼ် 09 401090892 ပေႃးမၢႆၾူၼ်းၼႆ့ ၵပ်းသိုပ်ႇၶဝ်ႈမႃး ၶဝ်တေလၢတ်ႈဝႃႈ ပဵၼ် ၽူႈမီးၸၼ့်ၼႂ်းတပ့် ဢမ်ႇၼၼ် ၸုမ်း ၸယၽ ၼႆယဝ့်။
မိူဝ်ႈပူၼ့်မႃး ၶၢဝ်းတၢင်း 2 လိူၼ်ၼၼ့်ၵေႃႈ တီႈဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း မီးၵူၼ်းဢၢင်ႈၸိုဝ်ႈဝႃႈ ပဵၼ်ၸုမ်းၵႅတ်ႇၶႄၵူၼ်းမိူင်း PDF ၼႆသေ ႁဵတ်းလိၵ်ႈသူင်ႇၸူး ၽူႈမၢၵ်ႈၵူၼ်းမီး ၸဝ်ႈၶဝ်ၵၢၼ်ပၢႆးမၢၵ်ႈမီးၶဝ်လူၺ်ႈတၢင်း Viber ၶိူဝ်းယႂ်း ၊ သင်ဢမ်ႇဢူၼ်းပၼ်ငိုၼ်း ဢမ်ႇႁဵတ်းၸွမ်းၶေႃႈ တုၵ်းယွၼ်းၸိုင် တေမႃးတီႉၺွပ်း ၶႃႈႁႅမ်တၢႆပႅတ်ႈ ဝႃႈၼႆ။
ငဝ်းလၢႆးဝၢၼ်ႈမိူင်းဢမ်ႇၼိမ်သဝ်းလႄႈ ၵၢၼ်ႁႃၵိၼ်လဵင့်တွင့်ယၢပ်ႇၽိုတ်ႇ မၢင်ၸိူဝ်းႁဵတ်းၵၢၼ် ၸွမ်းသိုဝ်ႈ ယူဝ်းပူင်ႇသႂ်သေတႃ့ မၢင်ၸိူဝ်းလႄႇႁႃပႅတ့်လႅၼ်လွၵ်ႇငိုတ်ႈၵိၼ်ငိုၼ်းလၢႆၵူၼ်းမိူင်း။ မိူဝ်ႈလဵဝ် ၵူၼ်းၸိူဝ်း လႅၼ်ၵိၼ်ၼိူဝ်ဢွၼ်ႊလၢႆႊၵေႃႈ လိူင်ႇၽႄႈမႃးၼမ် မိူၼ်ၼင်ႇတၢင်ႇၽူသ့်ၶၢႆၶူဝ်းၶွင်သေ ယွၼ်းငိုၼ်း လူင်ႈၼႃႈ ဝႆ့ၸိူဝ်းၼၼ့်လႂ်၊ ႁဵတ်းပၢင်တေႃႇလွင်း ၼႂ်းဢွၼ်ႊလၢႆႊ ၸႂ်ႉသူင်ႇငိုၼ်းသေ ပလွၵ့်ပႅတ်ႈၸိူဝ်းၼၼ့်လႂ် ၸိူဝ်းၼႆ့။လွင်ႈယွၵ်ႇလႅၼ် ယွၼ်းငိုၼ်းၸိူင့်ၼႆၼႆ့ လိူင်ႇၼမ်ၶႂ်ႈတူဝ်ႈမိူင်းတႆးယဝ်ႉ ၵူၼ်းၼုမ်ႇႁဵတ်းၵၢၼ်ၵႃႉၶၢႆတၢင်း ဢွၼ်ႊလၢႆႊၵေႃႉၼိုင်ႈၵေႃႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ