ပွႆးၵႂၢႆးတေႃး ပီၼႆႉ တီႈၸႄႈဝဵင်းမိူင်းယၢင်း ၸတ်းယႂ်ႇ မီးပီႈၼွင်ႉတီႈၸမ်/ ၵႆၶဝ်ႈႁူမ်ႈ ၵိုၼ်းၶွၼ်ႈ မီးၵႂၢႆးၶဝ်ႈတေႃး ၶဵင်ႇၵၼ် ဢမ်ႇယွမ်း 20 တူဝ်။

ပူၼ်ႉမႃး မိူဝ်ႈဝၼ်းတီႈ 29/12/2022 ၼၼ်ႉ ယူႇတီႈပီႈၼွင်ႉမိူင်းလူၺ် ႁူမ်ႈၵၼ် ၸတ်းႁဵတ်း ပွႆးၵႂၢႆးတေႃး တီႈၼႂ်းဢိူင်ႇမိူင်း လူၺ် ၸႄႈဝဵင်းမိူင်းယၢင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇၶူင်း ၸွမ်းၼင်ႇ ၾိင်ႈႁိတ်ႈႁွႆးမီး ပီၼႆႉ ပီႈၼွင်ႉတီႈၸမ်ၵႆ ၶဝ်ႈႁူမ်ႈ ၵိုၼ်းၶွၼ်ႈလိူဝ်ၵူႈပီ။

ၸၢႆးလိူၼ်ၶမ်း ၽူႈတူင်ႉၼိုင်ၼႂ်းတူင်ႇဝူင်းၵူၼ်း ဝဵင်းမိူင်းယၢင်း လၢတ်ႈတီႈၽူႈတွႆႇႁွၵ်ႈဝႃႈ – “ပေႃးဢဝ်ပိုၼ်း ၼႂ်းပိုၼ်ႉတီႈဝႃႈ ၸိုင် ပွႆးၵႂၢႆးတေႃးၼႆႉ တေလႆႈၸတ်းႁဵတ်း 3 ဢွင်ႈတီႈ။ ဢွၼ်တၢင်းသုတ်း တေလႆႈၸတ်းႁဵတ်းတီႈမိူင်းလူၺ်၊ မိူင်းယၢင်း ယဝ်ႉ ၵေႃႈ မိူင်းၵွႆ။ တီႈမိူင်းလူၺ်တႄႉ ၸတ်းႁဵတ်းၵႂႃႇယဝ်ႉ။ တေႃႈလဵဝ် ၵိုတ်းတီႈမိူင်းယၢင်းလႄႈမိူင်းၵွႆ သွင်ဢွင်ႈတီႈၼႆႉ”- ဝႃႈၼႆ။

ပီၼႆႉ တီႈဢိူင်ႇမိူင်းလူၺ် မီးၵႂၢႆးတေႃးၵၼ် ဢမ်ႇယွမ်း 20 တူဝ် ။ တေပဵၼ်ၵႂၢႆး ၵူၼ်းပိုၼ်ႉတီႈ ၼႂ်းမူႇဝၢၼ်ႈ ဢိူင်ႇမိူင်းလူၺ် မႃးၶႅင်ႇတေႃးၵၼ်။

ယၢမ်းလဵဝ် ၼႂ်းၼႃႈလိၼ်ၶိုၵ်ႉတွၼ်ႈမၢႆ 4 မိူင်းလႃးသမ်ႉ ပိၵ်ႉဢိုတ်းဝႆႉ ပႆႇပိုတ်ႇလႄႈ တႃႇပီႈၼွင်ႉမိူင်းယၢင်း တေၸတ်းႁဵတ်း ပွႆး ၵႂၢႆးတေႃးၼႆႉ ပႆႇပဵၼ်ၸတ်း တေပႂ်ႉတူၺ်းငဝ်းလၢႆးထႅင်ႈ ၵမ်းၼိုင်ႈ ဝႃႈၼႆ။

“တီႈမိူင်းယၢင်းၼႆႉ တေပႂ်ႉတူၺ်းထႅင်ႈဢိတ်းၼိုင်ႈ ပေႃးတၢင်းဢိူင်ႇၽိၽဵတ်ႇမၢႆ 4 သိူဝ်လိုဝ်း – မိူင်းလႃး ပိုတ်ႇပၼ်တၢင်းမႃး ၼႆ ၵူၼ်းတေမႃးၶဝ်ႈႁူမ်ႈၼမ်။ ၵွပ်ႈၼႆ တေပႂ်ႉတူၺ်းထႅင်ႈဢိတ်းၼိုင်ႈ ဝၼ်းမၼ်းတႄႉ ပႆႇလႆႈလိူၵ်ႈ။ တီႈၼႆႈတႄႉ တေ ၸတ်းႁဵတ်း ၼႂ်းပၢင်လဵၼ်ႈမၢၵ်ႇၼင် ၵၢင်ဝဵင်း။ တီႈမိူင်းၵွႆၵေႃႈ ပႆႇၸၢင်ႈၸတ်း ယွၼ်ႉယူႇဝႆႉၼႂ်းဢိူင်ႇသိူဝ်လိုဝ်းဝႆႉလႄႈ”- ၸၢႆး လိူၼ်ၶမ်း သိုပ်ႇလၢတ်ႈၼႄၼင်ႇၼႆ။

ၶၢဝ်းတၢင်း 2-3 ပီ ပူၼ်ႉမႃးၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 သေ ပွႆးၵႂၢႆးတေႃးၼႆႉ ဢမ်ႇလႆႈၸတ်းႁဵတ်းယႂ်ႇလူင် မိူၼ်မိူဝ်ႈ ၵူႈ ပီ ပူၼ်ႉမႃး။ ၵူၺ်းၵႃႈ ၸတ်းႁဵတ်းၸွမ်းၾိင်ႈႁိတ်ႈႁွႆးမီးဝႆႉ 1 ပီတေႃးၵၼ် 4-5 တူဝ်  ၵူၺ်း ဝႃႈၼႆ။

ၸွမ်းၼင်ႇ ၾိင်ႈယုမ်ႇယမ် ၵူၼ်းပိုၼ်ႉတီႈ မီးၼၼ်ႉသေ ၶွပ်ႈၶူပ်ႇပီလႂ် ၼိုင်ႈပွၵ်ႈ ယူႇတီႈပီႈၼွင်ႉမိူင်းလူၺ် – မိူင်းယၢင်း တေ ဢွၼ်ၵၼ် ၸတ်းႁဵတ်း ပွႆးၵႂၢႆးတေႃး မႃးၵူႈပီ။ ၼိုင်ႈပီ တေၸတ်းႁဵတ်းပွႆးၵႂၢႆးတေႃး 15 ဝၼ်း။ ၼႂ်းၼၼ်ႉ 5 ဝၼ်းလႂ် တေဢဝ် ၵႂၢႆးတေႃးၵၼ် ၼိုင်ႈပွၵ်ႈ။

ပွႆးၵႂၢႆးတေႃး တီႈဝဵင်းမိူင်းယၢင်းၼႆႉ တေၸတ်းႁဵတ်းၵူႈပီ ၸွမ်းၾိင်ႈႁိတ်ႈႁွႆးမီး ၵမ်ႈၼမ် တေၸတ်းႁဵတ်းဝၢႆးလိူၼ်ၸဵင် ၽွင်း ၶၢဝ်းၵတ်း။ တေမီးပီႈၼွင်ႉ တီႈၸမ်ၵႆ တၢင်းပွတ်းဢွၵ်ႇၶူင်း ၶဝ်ႈႁူမ်ႈၼမ်။ ယွၼ်ႉငဝ်းလၢႆး တၢင်းပဵၼ်ၶူဝ်ႊဝိတ်ႉ 19 လႄႈ ငဝ်း လၢႆး ဝၢၼ်ႈမိူင်း ပႆႇၼိမ်ယဵၼ် ၸိူင်ႉၼႆသေ ၼႂ်းၶၢဝ်းတၢင်း 2-3 ပီၼႆႉ ဢမ်ႇလႆႈၸတ်းႁဵတ်းယႂ်ႇလူင် မိူၼ်မိူဝ်ႈၵူႈပီ ပူၼ်ႉမႃး ၼႆ ယဝ်ႉ။

ပေႃးဝႃႈ ထိုင်ၶၢဝ်းမႃးလႄႈ ဢမ်ႇၸတ်းႁဵတ်းပွႆးၵႂၢႆးတေႃးၸိုင် ၵႂၢႆးတေပဵၼ်တၢင်းပဵၼ် မၢၵ်ႇၶဝ်ႈတဝ်ႈၼမ်ႉ တေဢမ်ႇလိူင်ႇ ၼမ်။ သင်ဝႃႈ ၸတ်းႁဵတ်းၸိုင် မၢၵ်ႇၶဝ်ႈတဝ်ႈၼမ်ႉၵေႃႈ တေလီ၊ တၢင်းပဵၼ်တူဝ်သတ်း ၸိူဝ်းၼႆႉၵေႃႈ တေဢမ်ႇမီး။ ဝၢၼ်ႈ မိူင်းၵေႃႈ တေၵတ်းယဵၼ် ၸိူဝ်းၼႆႉမႃး ၵူၼ်းပိုၼ်ႉတီႈ ဝဵင်းမိူင်းယၢင်း ယုမ်ႇယမ်လၢတ်ႈၼႄၼင်ႇၼႆ။