ၽူႈၵွၼ်းပွၵ့် ဝဵင်းလႃႈသဵဝ်ႈ ဢွၵ်ႇလိၵ်ႈပိုၼ်ၽၢဝ်ႇ ၸိသင်ႇၵူၼ်းမိူင်းပွၵ်ႉယွမ်ႇပူၵ်းတုင်း(ၸွမ်ပိဝ်) မၢၼ်ႈၼႃႈႁိူၼ်းၽႂ်မၼ်းလႄႈၸွမ်းသဵၼ်ႈတႃႈသၢႆတၢင်းၵူႈၵိဝ်ႇၵူႈငွၼ်ႈတႃႇၶၢဝ်းတၢင်း 10 ဝၼ်းပၢႆ တေႃႇထိုင်ဝၼ်းလွတ်ႈလႅဝ်းၵွၼ်းၶေႃမိူင်းမၢၼ်ႈ။
တုင်းၸိုင်ႈမိူင်းဢၼ်တပ်ႉသိုၵ်းမၵ်းမၼ်ႈၸႂ်ႉမႃးၸဵမ်မိူဝ်ႈပီ 2008 ဢၼ်မီးသီလိူင်ၶဵဝ်လႅင် ၼႂ်းၵၢင် လုၵ်ႈလၢဝ်လုၵ်ႈလဵဝ်ၼၼ်ႉ တၵ်းလႆႈပူၵ်းတင်ႈၼႃႈႁိူၼ်းၽႂ်မၼ်း တႄႇဝၼ်းတီႈ 23/12/2022 ထိုင် 4/1/2023 ။ ႁႂ်ႈပဵၼ်လွင်ႈယုၵ်ႉယွင်ႈ ဢဝ်ၵုင်ႇမုၼ် ဝၼ်းလွတ်ႈလႅဝ်းမိူင်းမၢၼ်ႈ ၶွပ်ႈတဵမ် 75 ပီ- ဝႃႈၼႆ။
ၵူၼ်းပိုၼ်းတီႈ ၽူႈၸၢႆးဢႃယု 40 ပီ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ လိၵ်ႈတႄ့ ဢွၵ်ႇဝႆ့ ၸိူင့်ၼၼ် ယဝ့်။ ၵူၺ်းၼႃႇ ႁၼ်လုမ်းလႄႈ ႁိူၼ်းထႃႇၼသႅင်ႇယႃႇဝုၼ်ႇထၢၼ်း( ၶႃႈႁၢပ်ႇၵၢၼ်ၶုၼ်) ၶဝ်ၵူၺ်း ဢၼ် ပူၵ်းတုင်းဝႆႉ။ ႁိူၼ်းပီႈၼွင်ႉတႆးတႄ့ ဢမ်ႇႁၼ်ၽႂ်ပၵ်း ။ ၵူႈပီတႄ့ ၶဝ်ဢမ်ႇႁဵတ်းၸိူင့်ၼႆ ။ ယဝ့်ပီၼႆႉသမ့်ပၢႆ ၸႂ်ႉပူၵ်းတုင်းဝႆႉလူင်ႈၼႃႈ ႁိုင်ဝႃႈႁိုင်ၼေႃႈ။ ပေႃးဢမ်ႇပူၵ်းတုင်းၼႆ တေမႂ်ၸိူင်ႉၼၼ် ၸိူင်ႉၼႆ ၼႆတႄႉၵေႃႈ ဢမ်ႇႁၼ်ၶဝ်လၢတ်ႈဝႆႉသင်။ ၵူၺ်းၵႃႈၸိူင်ႉၼၼ်ႁူႉယူႇၼၼ်ႉၶႃႈၼႃႇ တေမၢပ်ႇတေမႂ်ၼႆတႄ့ၵေႃႈ ပႆႇငိၼ်းဝႃႈႁိုဝ်ၼင်ႇၵဝ်ႇ ”- ဝႃႈၼႆ။
လိၵ်ႈပိုၼ်ၽၢဝ်ႇၼႆ့ ၽူႈၵွၼ်းပွၵ်ႉ 12 လႃႈသဵဝ်ႈ ဢွၵ်ႇမိူဝ်ႈ ဝၼ်းတီႈ 22/12/2022 ။ သင်ႇႁႂ်ႈ ၶဵတ်ႇ/ၼႃႈလိၼ် 3 / 4 / 5 / 6 / 7 / 8 / 12 /13 / 14 / 15 / 16 /17/ 18 /19 / 20 / 21 ၸိူဝ်းၼႆႉ ႁႂ်ႈပၵ်းတုင်း သွင် ၾၢၵ်ႇၶၢင်တၢင်း ၸွမ်းၼႃႈႁိူၼ်းၽႂ်မၼ်း ဝႃႈၼႆဝႆႉ။
ၼႂ်းလိၵ်ႈပိုၼ်ၽၢဝ်ႇၼၼ့် ပႃးဝႆ့ဝႃႈ တွၼ်ႈတႃႇတေပဵၼ် လွင်ႈဢဝ်ၵုင်ႇမုၼ် ဝၼ်းလွတ်ႈလႅဝ်းၵွၼ်းၶေႃမိူင်းမၢၼ်ႈၶွပ်ႈတဵမ် 75 ပီ ႁႂ်ႈလႆႈပူၵ်းတုင်းဝႆႉသွင်ၾင်ႇၶၢင်ႈတၢင်း ၼႂ်းဝဵင်း ဝႃႈၼႆ။
တၢင်ႇပွၵ်ႉတႄႉပႆႇႁၼ်ၸိသင်ႇႁႂ်ႈႁဵတ်း။ ပွၵ်ႉ 12 တီႈတႆးယူႇၼမ်သုတ်းၼႆႉၵူၺ်း တိုၵ်ႉလႆႈႁၼ်ၶေႃႈၸိသင်ႇၼႆႉ – ၵူၼ်းလႃႈသဵဝ်ႈၵေႃႉၼိုင်ႈၵေႃႈလၢတ်ႈၼင်ႇၼႆ။
ဝၼ်းလွတ်ႈလႅဝ်းၵွၼ်းၶေႃ(ဢၼ်လႆႈလူင်ႇမွၵ်ႇလွတ်ႈလႅဝ်းတႂ်ႈမိုဝ်းဢိင်းၵလဵတ်ႈၽွင်းငမ်းမိူင်း) တေၶွပ်ႈထိုင် 75 ပီ ၼႂ်းဝၼ်းတီႈ 04/01/2023 တေမႃးၼႆႉ ဝႃႈၼႆသေတႃႉ တွၼ်ႈတႃႇဝၢၼ်ႈမိူင်း ၸၢဝ်းၶိူဝ်းတႄႉ တေႃႇထိုင်ယၢမ်းလဵဝ် ပႆႇလႆႈလွင်ႈၽဵင်ႇပဵင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ