ပၢင်ၶဝ်ႈဝၢတ်ႈ/ တိုဝ်းၵမ် သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်း ပွၵ်ႈထူၼ်ႈ 71 ၼႆႉ တေၸတ်းႁဵတ်းတီႈဝတ်ႉဝၢၼ်ႈငႅၼ်း ဝဵင်း ၸႄႈၵဵင်းတုင်။
တႄႇဢဝ် ဝၼ်းတီႈ 26/12/2022 တေႃႇထိုင် 6/1/2023 ယူႇတီႈသင်ၶၸဝ်ႈလႄႈ တၵ်ႉၵႃႇသတ်ႉထႃး ဝၢၼ်ႈငႅၼ်း ဢိူင်ႇ ၵၢတ်ႇတဝ်ႇ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းသေ တေဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ၶဝ်ႈဝၢတ်ႈတိုဝ်းၵမ် တႃႇသင်ၶၸဝ်ႈ ၶၢဝ်းတၢင်း 10 ဝၼ်း တီႈဝတ်ႉဝၢၼ်ႈငႅၼ်း ပွၵ်ႈထူၼ်ႈ 71 ပွၵ်ႈၵမ်း 4 ၼႆယဝ်ႉ။
ၸဝ်ႈၶူးဢၵ်ႉၵသေၼ လႅင်းတႆး ၽူႈၵွၼ်းဝတ်ႉလႄႈ ၽူႈၵွၼ်းႁူင်းႁဵၼ်းဝတ်ႉဝၢၼ်ႈငႅၼ်း (ပၵ) လၢတ်ႈတီႈၽူႈတွႆႇႁွၵ်ႈဝႃႈ -“ပၢင်ၶဝ်ႈဝၢတ်ႈ တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းၼႆႉ ၸတ်းႁဵတ်းမႃးတေပဵၼ်ပွၵ်ႈထူၼ်ႈ 71 ယဝ်ႉ။ ပေႃးဢဝ် တီႈ ဝတ်ႉဝၢၼ်ႈငႅၼ်းဝႃႈၸိုင် တေပဵၼ်ပွၵ်ႈၵမ်း 4 ယဝ်ႉ။ ပၢင်ၶဝ်ႈဝၢတ်ႈတိုဝ်းၵမ် တီႈဝတ်ႉဝၢၼ်ႈငႅၼ်းၼႆႉ တေၶဝ်ႈ ၼႂ်းလိူၼ်ၵမ်မႂ်ႇ 5 ၶမ်ႈ တေႃႇထိုင်လိူၼ်ၵမ်မူၼ်း။ ဝၼ်းယၢတ်ႇၼမ်ႉသမ်ႉ တေပဵၼ်လိူၼ်ၵမ်လွင်ႈ 1 ၶမ်ႈ။ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်းလႄႈ ပူၼ်ႉမႃးၶၢဝ်းတၢင်း 2 ပီၼႆႉ တီႈဝဵင်းၵဵင်းတုင် ဢမ်ႇလႆႈၸတ်းႁဵတ်းပၢင်ၶဝ်ႈဝၢတ်ႈမႃး”- ဝႃႈၼႆ။
ပၢင်ၶဝ်ႈဝၢတ်ႈ ပွၵ်ႈထူၼ်ႈ 71/4 တီႈဝတ်ႉဝၢၼ်ႈငႅၼ်းၼႆႉ တင်းမူတ်းတေမီးႁူဝ်ၵျွင်း/ ဝတ်ႉ ၶဝ်ႈတိုဝ်းၵမ် 42 ဝတ်ႉ။ ၼႂ်းၼၼ်ႉ တီႈဝဵင်းၵဵင်းတုင် 28 ဝတ်ႉ၊ ဝဵင်းတႃႈၶီႈလဵၵ်း 4 ဝတ်ႉ၊ မိူင်းပဵင်း 5 ဝတ်ႉ၊ မိူင်းၶၢၵ်ႇ 1 ဝတ်ႉလႄႈ မိူင်းယၢင်း 2 ဝတ်ႉ ၼႆယဝ်ႉ။
ၶပ်ႉမၢႆ ပၢင်ၶဝ်ႈဝၢတ်ႈသင်ၶၸဝ်ႈ ပွၵ်ႈထူၼ်ႈ 71/4 ၼႆႉ ဝၼ်းတီႈ 26 သင်ၶၸုင်/ ၸူႉဝၢတ်ႈ။ ဝၼ်းတီႈ 27 သင်ၶၸဝ်ႈ တေ ၶဝ်ႈတိုဝ်းၵမ်၊ ၶဝ်ႈသိမ်ႇ ႁပ်ႉမၢၵ်ႇၼပ်ႈ။ ပေႃးထိုင်မႃး လိူၼ်ၵမ်မႂ်ႇ 9 ၶမ်ႈသမ်ႉ ၶိုၼ်းသိမ်ႇထႅင်ႈၵမ်းၼိုင်း။ လိူၼ်ၵမ်မႂ်ႇ 15 ၶမ်း ၶိုၼ်ႈသိမ် ထႅင်ႈၵမ်းၼိုင်ႈသေ ဢွၵ်ႇပၢင်ဝၢတ်ႈတိုဝ်းၵမ်း ၸဝ်ႈၶူးဢၵ်ႉၵသေၼလၢတ်ႈ။
ၼႂ်းပၢင်ၶဝ်ႈဝၢတ်ႈၼႆႉ တေမီးလၢဝ်ႈႁူဝ်ၵျွင်း/ ဝတ်ႉလႂ် မႃးၵၢပ်ႈသွမ်းၼႂ်/ သွမ်းဝၼ်း လွင်းဝၢတ်ႈ ပေႃးဝၢႆးဝၼ်းသမ်ႉ တေမီး တၵ်ႉမႃးလူႇတၢၼ်းၼမ်ႉသူမ်ႈၼမ်ႉၸဵမ်း။ ဝၢႆးဝၼ်း 3 မူင်းၶိုင်ႈသမ်ႉ တေမီးၸုမ်းထမ်ႇၵၸၵ်ႇၵျႃႇ မႃးလွတ်ႈႁေႃးပူႇၸေႃႇထမ်ႇ မၸၵ်ႇၵျႃႇၵႂႃႇ ၼႆယဝ်ႉ။
ပၢင်ၶဝ်ႈဝၢတ်ႈတိုဝ်းၵမ် တီႈဝဵင်းၵဵင်းတုင်ၼႆႉ မိူဝ်ႈပွၵ်ႈထူၼ်ႈ 70 ၼၼ်ႉ ၸတ်းႁဵတ်းတီႈဝတ်ႉၵမ်မထၢၼ်ၸွမ်ၸႅင်ႈ။ ပွၵ်ႈ ထူၼ်ႈ 69 သမ်ႉ ၸတ်းႁဵတ်းတီႈဝတ်ႉတိၼ်ထၢတ်ႈၸွမ်သဝၼ် ၼႆယဝ်ႉ။
