ၵူၼ်းထဝ်ႈယိင်းၵေႃႉၼိုင်ႈ ၼႂ်းၸႄႈဝဵင်းလၢင်းၶိူဝ်း ပဵၼ်ၸဵပ်းတီႈၶေႃး ၾၢႆႇၶႂႃလူဝ်ႇတၢင်းၸွႆႈထႅမ်တႃႇယူတ်းယႃၽႃႇတတ်း။

မႄႈထဝ်ႈၵေႃႉဢၼ်ပဵၼ်တၢင်းပဵၼ်ၶေႃးၸဵပ်းၼႆႉ ၸိုဝ်ႈမႄႈထဝ်ႈၼူၼ်း ဢႃယု 67 ပီ ယူႇဝၢၼ်ႈၼႂ်းၵူတ်ႉ၊ၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း မိူဝ်ႈလဵဝ်တီႈၶေႃး ပဵၼ်ၸဵပ်းလိူဝ်ႁႅင်းဝႆႉ လူဝ်ႇတၢင်းၸွႆႈထႅမ်တႃႇၽႃႇတတ်းယူတ်းယႃ။

ၸဝ်ႈၸၢင်းတူင်ႉၼိုင်ႈၼႂ်းၸုမ်းသင်ၶ မိုဝ်းမဵတ်ႉတႃႇၸိုင်ႈတႆးလၢတ်ႈၼႄဝႃႈ- “ မႄႈထဝ်ႈၼႆႉ ပဵၼ်ႁူးၸဵပ်းဝႆႉ တီးၶေႃးမၼ်းၼၼ်ႉၼေႈတၵ်ႉၵႃႇ။  ပေႃးမၼ်းၸဵပ်းႁႅင်းမႃး ဢမ်ႇၼွၼ်းလႆႈတင်းၶိုၼ်း၊ မၼ်းၶူပ်း ငိုတ်ႈငိုတ်ႈ ဝႆႉၼႆဝႃႇ။ တႆႇယၢပ်ႈယၢပ်ႈယိပ်ႈယိပ်ႈမိူၼ်မႅင်းမႃးၸီႈၼၼ်ႉၼႆဝႃႇ။ၶဵမ်တႄႉ ၼိုင်ႈဝၼ်းလႆႈသမ်း မွၵ်ႈသၢမ်ၶဵမ်ၼႆႉၼေႈ။ၵွပ်ႈလုၵ်ႈလၢင်းပဵၼ်ၵူၼ်းႁႃၸဝ်ႉၵိၼ်ၶမ်ႈၵူၺ်းလႄႈ ဢမ်ႇၸၢင်ႈမီးငိုၼ်းတႃႇတေ ၽႃႇတတ်း၊ဢၼ်ပဵၼ်ၸဵပ်းၼႆႉ မီးမွၵ်ႈ ပီပၢႆၼႆယဝ်ႉ။ မိူဝ်ႈတႄႇမၼ်းပဵၼ် တုမ်ႇလဵၵ်ႉလဵၵ်ႉဢွၼ်ႇ ၵူၺ်းဢၢင်ႈၵႂႃႇၽႃႇယူႇ ၵူၺ်းၼႃႇပိူၼ်ႈသမ်ႉဢမ်ႇၽႃႇပၼ်။  ပိူၼ်ၸီးႁူးသေ သႂ်လွတ်ႇလဵၵ်းဝႆႉပၼ်ၵွႆး။ၽိူဝ်ႇပဵၼ်ယႂ်ႇမႃး ႁူင်းယႃလွႆလႅမ်ၼႆႉသမ်ႉ ဢမ်ႇႁတ်းၽႃႇၼႆလႄႈ တေလႆႈၵႂႃႇ တၢင်းတွင်ႇၵီးၼႆဝႃႈ။ လုၵ်ႈလၢင်းသမ်ႉဢမ်ႇပဵၼ်လႆႈ ငိုၼ်းတွင်း ” -ဝႃႈၼႆ။

တႃႇတေယူတ်းယႃၽႃႇတတ်းမႄႈထဝ်ႈၼူၼ်းၼႆႉ တေလႆႈၸႂ်ႉငိုၼ်းမွၵ်ႈ 10 သႅၼ်ပျႃး ၊ တေၵႂႃႇၽႃႇတတ်းတီႈႁူင်းယႃဝဵင်းတူၼ်ႈတီး ဝႃႈၼႆ။

လုၵ်ႈယိင်းပၢႆမႄႈထဝ်ႈၼူၼ်း လၢတ်ႈၼႄဝႃႈ-“ မႄႈထဝ်ႈတႄႉ မိူဝ်ႈလဵဝ် ဢမ်ႇလၢတ်ႈၵႂၢမ်းလႆႈယဝ်ႉ မေႃယႃၶဝ်ဝႃႈ ပေႃးၵႂႃႇၽႃႇတတ်းတီႈတွင်ႇၵီးတႄႉ တေလီယူႇၼႆဢေႃႈ မိူၼ်ႁဝ်းၼႆႉသမ်ႉ ယႃႇဝႃႈတေၵႂႃႇ ယူတ်းၵႂႃႇယႃတီႈတွင်ႇၵီးလႃႈ။  ငိုၼ်းၵႃႈၵႃးတင်းတေယၢပ်ႇယူႇၶႃႈဢေႃႈၼႆႉ ယၢပ်ႇၵျႃႉၶႃႈ ဢေႃႈ။ ႁဝ်းၶႃႈ ၵေႃႈ ဢမ်ႇမီးတူင်ႈမီးၼႃးမိူၼ်ပိူၼ်ႈ။  လႆႈႁႃၵိၼ်ၸၢင်ႈ ႁဵတ်းၵၢၼ်ပၼ်ပိူၼ်ႈ ၵူႈဝၼ်းဝၼ်းႁဵတ်းၼႆၵူၺ်း ဢမ်ႇၸၢင်ႈမီးငိုၼ်းပဵၼ်ၵွၼ်ႈ သေပွၵ်ႈ”- ဝႃႈၼႆ။

သင်မီးၽူႈမီးၼမ်ႉၸႂ်လီ ၶႂ်ႈၵမ်ႉၸွႆႈငိုၼ်းတွင်းတႃႇယူတ်းယႃၶေႃးၸဵပ်း မႄႈထဝ်ႈၼူၼ်းၼႆၸိုင် ၵပ်းသိုပ်ႇတွင်ႈထၢမ်လႆႈတီႈ ၾဵသ်ႉပုၶ်ႉပဵတ်ႉၸ်ၶွင် MEU METTA Foundation (မိုဝ်းမဵတ်ႉတႃႇ ၾွင်ႇတေးသျိၼ်း) Facebook Page Link – https://www.facebook.com/meumetta?mibextid=ZbWKwL  သေဢုပ်ႇၵုမ်လၢတ်ႈတေႃႇၵမ်ႉၸွႆႈလႆႈၵမ်းသိုဝ်ႈ လႆႈႁူႉၼင်ႇၼႆ။