ၽွင်းၵၢၼ်မိူင်းယုင်ႈ ႁႃၵိၼ်လဵင်ႉတွင်ႉယၢပ်ႇ ၵူၼ်းမိူင်းဢမ်ႇမီးၵၢၼ်ၼမ်မႃး ၾၢႆႇၼိုင်ႈၵူၼ်းသူႇသမ်း ၵႃႉၶၢႆယႃႈမဝ်းၵမ် ၼမ်မႃးၵူႈမိုဝ်ႉၵူႈဝၼ်းလႄႈ လွင်ႈပေႃႉထုပ်ႉႁိမ်ၶူဝ်းၶွင်ၵၼ်ၵေႃႈမီးမႃးၵူႈမိုဝ်ႉၵူႈဝၼ်း။
မိူဝ်ႈဝၼ်းတီႈ 4/12/2022 ယၢမ်းၵၢင်ၶမ်ႈ 7 မူင်း ႁႅင်းၵၢၼ်တီႈမူႇၸေႊၵေႃ့ၼိုင်ႈ ၸိုဝ်ႈ ၵျေႃႇမိၼ်းထုၼ်း ဢႃယု 30 ပီ ၺႃးထုပ့်ပေႃ့သေၸူၼ်ဢဝ်ၾူၼ်းလႄႈငိုၼ်းၵႂႃႇလႄႈ လုပ်ႈၶီႈၶၢင်ႁၵ်းသိၵ်ႈၼိုင်ႈ ၸုမ်းၸွႆႈ တူင်ႇဝူင်းၵူၼ်း မျိၼ့်မျၢတ်ႉပႃႇရမီႇ ၸွႆႈသူင်ႇယူတ်းယႃတူဝ် တီႈ ဝဵင်းလိူဝ်ႇ ။
ၽူႈၶဝ်ႈၸုမ်း ၸုမ်းၸွႆႈတူင်ႇဝူင်းၵူၼ်းမျိၼ့်မျၢတ်ႉပႃႇရမီႇ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ ယူႇတီႈ ႁဝ်းပဵၼ်ၸုမ်းၸွႆႈတူင်ႇဝူင်းသေ လွင်ႈၼႆ့ တေၼႄးၽႂ်တေ့တေ့ၵေႃႈဢမ်ႇႁတ်းၼႄးၶႃႈ။ ၵွပ်ႈႁဝ်းယူႇ ၼႂ်း ၵႄႈ ဝၢၼ်ႈမိူင်းဢၼ်ဢမ်ႇၼိမ်သဝ်း ဢၼ်ႁၼ်ယူႇတႄ့ ယွၼ့်ယႃႈမဝ်းၵမ်လႄႈ ၵၢၼ်ႁႃၵိၼ် လဵင့်တွင့် ယၢပ်ႇယဵၼ်း ယွၼ့်ၼၼ်ၵူၼ်းႁၢႆ့ၵူၼ်းမိူၵ်ႈ လိူင်ႇမႃးၼၼ့်ယဝ့် ”- ဝႃႈၼႆ။
သိုၵ်းမၢၼ်ႈယိုတ်းမိူင်းမႃး ၶၢဝ်းတၢင်းၸမ်သွင်ပီၼႆ့ ပၢႆးမၢၵ်ႈမီးတူၵ်း၊ ၵႃႈၶၼ်ၵုၼ်ႇၵႃႈယႂ်ႇၶိုၼ်ႈသုင်။ ပၢင်တေႃႇလွင်းလိူင်ႇၼမ် ၾၢႆႇၼိုင်ႈ ယႃႈမႃႉယႃႈမဝ်းၵမ်လိူင်ႇၼမ် ။ ၵူၼ်းမိူင်းထူပ်းတၢင်းယၢပ်ႇၽိုတ်ႇ တႃႇယူႇသဝ်းႁႃၵိၼ်လဵင်ႉတွင်ႉ။ ထိုင်တီႈလၵ်ႉ/ၸူၼ်ၵၼ်ၵေႃႈလိူင်ႇၼမ်မႃး။
ၵူၼ်းပိုၼ့်တီႈ ဝဵင်းမူႇၸေႊၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူင်းႁဝ်းမိူဝ်ႈလဵဝ် ပၢႆလိူဝ်ႁႃၵိၼ် လဵင့်တွင့် ယၢပ်ႇ သမ့်မီးၵူၼ်းႁၢႆ့ၵူၼ်းၸူၼ်ၼမ်။ ပေႃးပဵၼ်ၵူၼ်းလႅၵ်ႈငိုၼ်း ၶႅၼ်းလႆႈဝႆႉၾၢင့်ယဝ့် ။ ပေႃးၵႂႃႇလႂ်မႃးလႂ် ၵေႃႉလဵဝ်ၵူၺ်းၼႆ လမ်းၸၵ်ႉႁိမ်ၾူၼ်း ၼႂ်းမိုဝ်းၵွၼ်ႇဢေႃႈ။ ပေႃးဢမ်ႇမီးၵေႃႉ ဢမ်ႇႁတ်းၵႂႃႇတၢင်းၼွၵ်ႈ ၵေႃႉလဵဝ်ယဝ်ႉၼေႈ။ ပၢင်တေႃႇပၢင်လွင်းမီးလိူင်ႇၼမ်ၼႃႇ၊ ၵူၼ်းလိူတ်ႇၵူၼ်းမႆႈ ငိုၼ်းလွၼ်ႉလွၼ်ႉ ယဝ်ႉၶႃႈ” – ဝႃႈၼႆ။
ဢိင်ၼိူဝ်ပၢင်တေႃႇလွင်းၼမ် ပၢႆးမၢၵ်ႈမီးတူၵ်းလႄႈ မီးလွင်ႈလၵ်ႉ/ၸူၼ်ၵၼ်ၵူႈဝဵင်း၊ ဢၼ်ပဵၼ်ႁၢဝ်ႈႁႅင်း ၶႂ်ႈဝႃႈမီးၵူႈဝၼ်းတႄႉပဵၼ် ဝဵင်းမူႇၸေႊ၊ လႃႈသဵဝ်ႈ၊ ဝဵင်းတၢင့်ယၢၼ်ႊ၊ဝဵင်းပၢင်လူင်၊ဝဵင်းတူင်ႈတႃႈ ၸိူဝ်းၼႆႉ။
ၼႂ်းလိူၼ် ၼူဝ်ႊဝႅမ်ႊပိူဝ်ႊ ပူၼ့်မႃးၼႆ့ ၽူႈၶဝ်ႈၸုမ်းၸွႆႈတူင်ႇဝူင်းၵူၼ်း လေႃးၵပႃႇလပရႁိတ ဝဵင်းတႃႈၶီႈလဵၵ်းၵေႃ့ၼိုင်ႈ ၺႃးၵူၼ်းၶီႇရူတ့်ၶိူင်ႈသွင်ၵေႃ့ မႃးၸၵ့်ဢဝ် ဢႅပ်ႇငိုၼ်း ၽွင်းမၼ်းၼၢင်းၵႂႃႇၼႄႁွင်ႈယႃ(သေးၶၢၼ်း)သေၶိုၼ်းပွၵ်ႈမႃး။
မိူဝ်ႈၼႂ်းလိူၼ်ဢွၵ်ႊထူဝ်ႊပိူဝ်ႊ ၼၼ့်ၵေႃႈ ပႂ်ႉၸူၼ်ၵႃး တီႈၼိူဝ်သဵၼ်ႈတၢင်းၵဵင်းတုင် – တူၼ်ႈတီး ႁိမ်းဝဵင်းတူင်ႈတႃႈ ၼႂ်းၸႄႈဝဵင်းၵဵင်းတုင် မီးၵူၼ်းၸုမ်းၼိုင်ႈ ဢဵၼ်ႁႅင်းမွၵ်ႈ 7 ၵေႃႉ၊ ၵႃးတၢင်ႇၵူၼ်း ၺႃးၸူၼ် 3 လမ်း၊ ၸူၼ်လႆႈၵႂႃႇ ငိုၼ်းမၢၼ်ႈ 29 သႅၼ်ပၢႆလႄႈ ၾူၼ်း 9 ၶိူင်ႈ။
မိူဝ်ႈၼႂ်းလိူၼ်မေႊ လႄႈ လိူၼ်ၵျူၼ်ႇ ၼၼ့်ၵေႃႈ ၼႂ်းဝဵင်းမူႇၸေႊၼႆ့ ပဵၼ်ၵႂႃႇသွင်လိူၼ်ထပ်းၵၼ် မိူၼ်ၼင်ႇ တီႈပွၵ်ႉ ၵၢတ်ႇ ႁိမ်းလုမ်းၾၢႆႇလိူမ်ႈလႆႇ ၵူၼ်းႁၢႆႉ 6 ၵေႃႉ ၶီႇၵႃးမႃးၸွမ်းၵၼ်သေ ၶဝ်ႈၸူၼ် ႁၢၼ်ႉၶၢႆၾူၼ်းမိုဝ်းသွင် လႆႈၵႂႃႇၶူဝ်းၶွင် ၵႃႈၶၼ်ဢမ်ႇယွမ်း ႁဵင်သႅၼ်။မိူၼ်ၼၼ်ၼင်ႇၵဝ်ႇ ၼႂ်းၵႄႈႁူဝ်ပေႃႈဝဵင်းၼၢင်း – ပၢင်ႇၶမ်းၼၼ့်ၵေႃႈ သွင်ပူႇယႃႈ ၶီႇၵႃးမႃးၸွမ်းၵၼ် ထုၵ်ႇၵူၼ်းႁၢႆႉ ၶီႇၵႃးလမ်းယိုဝ်းၸွမ်းလင်သေ ၸူၼ် ဢဝ်ၵႂႃႇငိုၼ်းၶႄႇမွၵ်ႈ 2 သႅၼ်ယႂၼ်ႇ ။
ဝၼ်းတီႈ 16/8/2022 ၼၼ့်ၵေႃႈ မႄႈမၢၼ်း ဢႃယု 30 ပၢႆ ၵေႃႉၼိုင်ႈ ၵူၼ်းဝဵင်းတၢင်ႉယၢၼ်း ၺႃးၵူၼ်းၸုမ်းၼိုင်ႈႁႄႉၸူၼ် ၶူဝ်းၶွင်ငိုၼ်း ၶမ်း ပႃးၸဵမ်ရူတ်ႉၵႃးဢၼ်မၼ်းၼၢင်းႁေႃႈမႃး ပဵၼ်ရူတ်ႉၵႃးToyota Wish ၊ ၸူၼ်ၼၼ်ႉပိတ်ႉပေႃႉမၼ်းၼၢင်းပႃးထႅင်ႈ။
ၶၢဝ်းယၢမ်းဝၢၼ်ႈမိူင်းဢမ်ႇသုၵ်းဢမ်ႇလိပ်းၸိူင့်ၼႆ ပေႃးပဵၼ်လွင်ႈႁိမ်လွင်ႈၸူၼ်မႃး ဢမ်ႇၸၢင်ႈတိူင်ႇလၢတ်ႈတီႈလႂ် တိူင်ႇလၢတ်ႈၵေႃႈ ဢမ်ႇမီးၽႂ် ဢဝ်ပုၼ်ႈၽွၼ်းၵႄႈလိတ်ႈပၼ်လႆႈငၢႆႈငၢႆႈ ၵူၼ်းမိူင်းၵမ်ႈၼမ် ပွင့်ၶၢင်းၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ