လုၵ်ႈဢွၼ်ႇ တီႈတႃႈၶီႈလဵၵ်း 5 ၵေႃ့ ၵိၼ်ၶျွၵ်ႉၵလႅတ်ႉယဝ်ႉပဵၼ်ႁူဝ်မဝ်း/ ႁၢၵ်ႈ ထိုင်တီႈလႆႈႁၢမ်သူင်ႇႁူင်းယႃ ၾၢႆႇမေႃယႃဝႃႈပဵၼ်ၶျွၵ်ႉၵလႅတ်ႉဢၼ်မူတ်းဢႃယု။
မိူဝ်ႈၼႆ့ ဝၼ်းတီႈ 7/12/2022 ၵၢင်ဝၼ်း 12 မူင်းလုၵ်ႈဢွၼ်ႇလူင် 3 ၵေႃ့ လႄႈ လုၵ်ႈဢွၼ်ႇလဵၵ်ႉ 2 ၵေႃ့ ဢၼ်ပေႃႈမႄႈၶဝ်ၸူဝ်းမႃးၶၢတ်ႈယူႇႁွင်ႈထႅဝ်တီႈ ပွၵ့်ပႃႇလႅင်(1) ႁိမ်းဝတ့်ယၢၼ်ႇဢွင်ႇမျေႇ (အလိုတော်ပြည့်ဘုန်းကြီးကျောင်း) ဝဵင်းတႃႈၶီႈလဵၵ်းၼၼ်ႉ ဢွၼ်ၵၼ်ၵိၼ်ၶျွၵ်ႉၵလႅတ့်သေ ပဵၼ်ႁူဝ်မဝ်းတွင့်ၶူၼ့်ႁၢၵ်ႈ ထိုင်တီႈလႆႈသူင်ႇႁူင်းယႃ။
ၽူႈၶဝ်ႈၸုမ်းၸွႆႈထႅမ် တူင်ႇဝူင်းၵူၼ်း ၵေႃ့ၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ လႅပ်ႈပဵၼ်ၶျွၵ်ႉၵလႅတ့် ဢၼ်မူတ်းဢႃယုမၼ်းၶႃႈယူဝ့် ။ၸေႈပူၵ့်/ႁေႃႇမၼ်းပေႃးႁူးပေႃးပွင်ႇယဝ်ႉၶႃႈလူး။ ၶဝ်ဢွၼ်ၵိၼ်ယဝ့်ႁူဝ်မဝ်းႁႅင်း ၼႆဢေႃႈ။ ပေႃးၶဝ်ႁၢၵ်ႈ သမ်ႉဢူၼ်ႈဢွၼ်ႇၶႃႈၼႃႇ။ လႆႈသူင်ႇႁူင်းယႃဝႆႉယဝ်ႉ။ ဢမ်ႇထိုင်တီႈလႆႈမႆႈၸႂ်ႁႅင်းၼင်ႇၵဝ်ႇၶႃႈ။ ”- ဝႃႈၼႆ။
ၶျွၵ်ႉၵလႅတ့်ဢၼ်ၶဝ်ၵိၼ်မႅၼ်ႈၼၼ့် ယူႇတီႈၾၢႆႇမေႃယႃတိုၵ်ႉဢဝ်ထတ်းထၢတ်ႈတူၺ်းယူႇဝႃႈၼႆ။
လုၵ်ႈဢွၼ်ႇ 5 ၵေႃႉဢၼ်လႆႈသူင်ႇႁူင်းယႃဝႆႉၼႆႉပဵၼ် ၼၢင်းတသိၼ်ႇမူဝ်း ဢႃယု 1 ၶူပ်ႇ၊မွင်ႇထူးမျတ့်ဝူၺ်ႇ ဢႃယု 2 ၶူပ်ႇ၊ မတီႇတႃႇတဵင့် ဢႃယု 29 ပီ၊မယမိၼ်း ဢႃယု 21 ပီ လႄႈ မွင်ႇဢွင်ႇၵျေႃႇလိၼ်း ဢႃယု 17 ပီ။
ၸုမ်းၸွႆႈထႅမ်တႄႉပၼ်ၾၢင်ႉလၢတ်ႈဝႃႈ ဢမ်ႇဝႃႈလုၵ်ႈဢွၼ်ႇၵူၼ်းလူင် ပေႃးတေသိုဝ်ႉတၢင်းၵိၼ်တၢင်းယမ်ႉၼႆႉ ႁႂ်ႈဢွၼ်ၵၼ်ၾၢင်ႉတူၺ်းဝၼ်းမူတ်းဢႃႇယုၽွင်ႈ။ ပေႃးၵိၼ်မႅၼ်ႈတၢင်းၵိၼ်ဢၼ် မူတ်းဢႃယုလႄႈသင် ၵိၼ်ၽိတ်း ဢၼ်ဢမ်ႇမႅၼ်ႈလိူတ်ႈလူမ်းၸဝ်ႈၵဝ်ႇၼၼ့်လႄႈသင် တေၸၢင်ႈတိူဝ့်ထိုင်သၢႆၸႂ် ဝႃႈၼႆ။
မိူဝ်ႈလိူၼ် ဢွၵ်ႊထူဝ်ႊပိူဝ်ႊ ဝၼ်းတီႈ 17 ပူၼ့်မႃးၼၼ့်ၵေႃႈ တီႈဝဵင်းတႃႈၶီႈလဵၵ်းၼႆ့ မီးမုၼ်ၸဝ်ႈၼင်ႈဝတ့်ဝၢၼ်ႈၵျွၵ့်တွင်ႇ 1 တူၼ် လႄႈ ၵူၼ်းႁိူၼ်း 4 ၵေႃ့ ၵိၼ်မႅၼ်ႈ ၵေႃႇၾီႇဢၼ်ပႃး မိၵ်ႈလိၵ်ႈၶႄႇ(Coffee SHQ) ၼၼ့်သေ လိုမ်းတူဝ်ထိုင်လႆႈၶိုၼ်ႈႁူင်းယႃၼင်ႇၵဝ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ