ၵႃးလႄႈရူတ့်ၶိူင်ႈၽႃႇၵၼ် တီႈဝဵင်းဢွင်ႇပၢၼ်း ၸႄႈတွၼ်ႈတူၼ်ႈတီး ၵူၼ်းႁေႃႈရူတ့်ၶိူင်ႈ တၢႆထင်တီႈ။

မိူဝ်ႈၼႆ့ ဝၼ်းတီႈ 30/11/2022 ယၢမ်းၵၢင်ၼႂ် 10 မူင်း ၵႃးလႄႈရူတ့်ၶိူင်ႈၽႃႇၵၼ် ၼိူဝ်သဵၼ်ႈတၢင်းပျီႇထွင်ႇၸု ၾၢႆႇၼႃႈလုမ်းႁွင်ႈၵၢၼ်ၾၢႆႇတေႃႉသူင်ႇ (ကညန) တီႈဝဵင်းဢွင်ႇပၢၼ်း ၸႄႈတွၼ်ႈတူၼ်ႈတီး ၵူၼ်းႁေႃႈရူတ့်ၶိူင်ႈ တၢႆထင်တီႈ ၵူၼ်းႁေႃရူတ်ႉၵႃးတႄႉဢမ်ႇမၢတ်ႇၸဵပ်း။

ၽူႈၶဝ်ႈၸုမ်းၸွႆႈတူင်ႇဝူင်းၵူၼ်း ဝဵင်းဢွင်ႇပၢၼ်း(အောင်ပန်းနာရေးကူညီမူအသင်း) ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ- “ ၽႃႇၵၼ်တီႈ သဵၼ်ႈတၢင်းလူင်ပျီႇထွင်ႇၸုၼၼ့်ဢေႃႈ။  ၵႃးၵေႃႈ ပဵၼ်ၵႃးဢၼ်ၸႂ်ႉၼႂ်းႁိူၼ်းၵူၺ်း။ ဢမ်ႇၸႂ်ႈၵႃးတၢင်ႇၵုၼ်ႇတၢင်ႇၵူၼ်း။ ၽွင်းႁဝ်းၵႂႃႇႁွတ်ႈတႄ့ ပလိၵ်ႈ မေႃႇတေႃႇပီႇၵႄႇ  ပေႃးမႃးတူၺ်းယူႇယဝ့် ။  ၵူၼ်းမႃးၸွမ်းၵႃး တႄ့ ဢမ်ႇပဵၼ်သင် ၵူၼ်းႁေႃႈရူတ့်ၶိူင်ႈတႄ့ တၢႆထင်တီႈ။  မိူဝ်ႈလဵဝ် ဢဝ်တူဝ်သူင်ႇ ႁူင်းယႃၵူတ်ႇထတ်းၵၢၼ်တၢႆယဝ်ႉသေ ၶိုၼ်းသူင်ႇထိုင်ႁိူၼ်းမၼ်းယဝ့် ၵူၼ်းတီႈႁိူၼ်းမၼ်း ႁွင့်ႁႆႈပေႃးဢူၼ်လူင်ဝႆ့ၼေႈ”- ဝႃႈၼႆ။

ၵူၼ်းဢၼ်လူ့ၵႂႃႇၼႆ့ ၸိုဝ်ႈ လုင်းၵျေႃ့သၢၼ်း ဢႃယု 60 ပီ ပဵၼ်ၵူၼ်း ပွၵ့် 9 ဝဵင်းၵၢတ်ႇလေႃ့   မိူဝ်ႈလဵဝ်လုၵ်ႈလၢင်းၼၢင်းမေး ပဵၼ်ၸႂ်ဢမ်ႇလီဝႆ့။

တၢင်းသဵၼ်ႈၼႆ့ ၵႆ့ၵႆ့မီးရူတ့်မီးၵႃးၽႃႇၵၼ် ၵမ်ႈၽွင်ႈၵေႃႈ သမ့်ႁေႃႈဝႆး ၵမ်ႈၽွင်ႈသမ့် ဢမ်ႇႁူ့ ပၵ်းပိူင် ႁေႃႈၵႃး လီလီ ၵႆ့ပဵၼ် ၽေးၵိုင့်ၵၢင့်ၼႃႇ ၵူၼ်းပိုၼ့်တီႈ လၢတ်ႈထႅင်ႈၼင်ႇၼႆ။

ၼႂ်းပီၼႆ့ၵူၺ်း ၵူၼ်းမိူင်းတႆးလၢႆတီႈ ပဵၼ်ၽေးၵိုင့်ၵၢင့် ယွၼ့်ရူတ့်ၵႃး ၽႃႇတမ်ၵၼ်သေလႆႈသဵင်ႈၸႂ်လူ့တၢႆ ၼႂ်းၼၼ့် တေပဵၼ် ၵူၼ်းၼုမ်ႇၵမ်ႈၼမ်။

မိူၼ်ၼၼ်ၼင်ႇၵဝ်ႇ မိူဝ်ႈဝၼ်းတီႈ 12/11/2022 ၼၼ့်ၵေႃႈ ရူတ်ႉၶိူင်ႈလႄႈၵႃးၽႃႇၵၼ် တီႈဝဵင်းၵျွၵ်ႉမႄး ၵူၼ်းၼုမ်ႇ တၢႆထင်တီႈ 2 ၵေႃႉ။မိူဝ်ႈဝၼ်းတီႈ 15/11/2022 ၼၼ့်ၵေႃႈ ၵႃးၽႃႇၺႃးလုၵ်ႈဢွၼ်ႇယိင်း ဢႃႇယု 3 ၶူပ်ႇ ၵေႃႈၼိုင်ႈၵူၼ်းဝၢၼ်ႈထမ်ႈငွပ်း တီႈဝဵင်းၵႃလီႉ တၢႆထင်တီႈ ။