ၼႂ်းဝဵင်းမိူင်းၼၢႆးၸိုင်ႈတႆးပွတ်းၸၢၼ်းၼႆႉ ၾႆးၾႃႉၵႆႉမွတ်ႇ ႁဵတ်းႁႂ်ႈၵူၼ်းပိုၼ်ႉတီႈ ထူပ်းတၢင်းယၢပ်ႇ ၽိုတ်ႇၵိၼ်းၸႂ်ႁႅင်း တႃႇတူမ်ႈတႃႇႁုင် တႃႇႁဵတ်းၵၢၼ်ႁႃၵိၼ်လဵင်ႉတွင်ႉ၊ ၵူၼ်းမိူင်းလႆႈၵႂႃႇႁႃသိုဝ်ႉၵိၼ် တၢင်းၼွၵ်ႈႁဵတ်းႁႂ်ႈ ၵႃႈၸႂ်ႉၸၢႆႇ သုင်လိူဝ်ၵဝ်ႇ။  

တႄႇဢဝ် ဝၼ်းတီႈ 19/11/2022 ၼၼ်ႉမႃး တေႃႇထိုင်ယၢမ်းလဵဝ် တီႈဝဵင်းမိူင်းၼၢႆး ၾႆးၾႃႉမႃးမႃးၶၢတ်ႇၶၢတ်ႇ  မီးမႃးၶၢဝ်းတၢင်း 10 ဝၼ်းပၢႆယဝ်ႉ။  

ၵူၼ်းၼုမ်ႇ ပိုၼ်ႉတီႈ ဝဵင်းမိူင်းၼၢႆး ၽူႈၸၢႆး ဢႃယု 30 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၾႆးၾႃႉၼႆႉၶဝ်မွတ်ႇတႄႇဢဝ် 8 မူင်းၵၢင်ၼႂ် တေႃႇထိုင် 8 မူင်းၵၢင်ၶမ်ႈ။ ပဵၼ်ၶၢဝ်းၵူၼ်းမိူင်းႁဵတ်းၵိၼ်ႁႃၵိၼ်၊ ပဵၼ်ၶၢဝ်းပိူၼ်ႈလူဝ်ႇၸႂ်ႉၾႆးၾႃႉၶဝ်သမ်ႉတတ်း၊ မၼ်းႁဵတ်းႁႂ်ႈၵူၼ်းမိူင်းတုၵ်ႉၶ ၶၢၼ်ၸႂ်ၼႃႇၶႃႈ။  ”- ဝႃႈၼႆ။

လိူဝ်ၼၼ်ႉ မိူၼ်ၼင်ႇ ၵူၼ်းႁဵတ်းၵၢၼ်ႁႃၸဝ်ႉၵိၼ်ၶမ်ႈ ၵူၼ်းၶၢႆၶဝ်ႈၽၵ်း၊ ၶဝ်ႈသွႆး၊ ႁၢၼ်ႉၼမ်ႉၼဵင်ႈ ၸိူဝ်းၼႆႉၵေႃႈ ဢွၼ်ၵၼ် ထူပ်းတၢင်းယၢပ်ႇၽိုတ်ႇႁႅင်း၊    ၶၼ်ၶၢႆၶူဝ်းၵုၼ်ႇၶွင်ၵိၼ် ၸိူဝ်းၼႆႉ ၵိုင်ႉၵၢင်ႉပုင်ႈၶိုၼ်ႈ 2-3 ပုၼ်ႈ ၼႆ ယဝ်ႉ။

“သင်ဝႃႈ ၾႆးၾႃႉမွတ်ႇၼႆၵေႃႈ ၵူၼ်းတၢင်ႇၼမ်ႉၶၢႆၼႆႉ ထူပ်းတၢင်းယၢပ်ႇၽိုတ်ႇၵမ်းလဵဝ် ၶႃႈယဝ်ႉ။ ၶဝ်ၸႂ်ႉၾႆးၾႃႉလုတ်ႇဢဝ်ၶႃႈလူး။ ပေႃးၾႆးဢမ်ႇမႃးသမ်ႉလႆႈႁေႃႈၸၢၵ်ႈ။ ၵႃႈၼမ်ႉမၼ်းၸၢၵ်ႈသမ်ႉသုင်။   ၵူႈပွၵ်ႈၼမ်ႉၼႆႉ တၢင်ႇထူဝ်ႇမႃး ၶၢႆ 1 လမ်း 4,500 ပျႃး။ ယၢမ်းလဵဝ် ပဵၼ်ၵႂႃႇ 6,000-7,000 ပျႃးယဝ်ႉ။ ၶၼ်ၶဝ်ႈသွႆးၵေႃႈၶိုၼ်ႈ ၵူႈပွၵ်ႈ 1 ဝၢၼ်ႇ 800 ပျႃး ယၢမ်းလဵဝ် ပဵၼ်ၵႂႃႇ 1,500-2,500 ပျႃးယဝ်ႉ။ ၼမ်ႉၼဵင်ႈၸဵမ်း ၵူႈပွၵ်ႈ 1 ၵွၵ်း 300 ပျႃး တေႃႈလဵဝ် 500 ပျႃး။ ၶဝ်ႈၽၵ်း ၵူႈ ပွၵ်ႈ 1 ပွႆး 1,500 ပျႃး ယၢမ်းလဵဝ် ပဵၼ်ၵႂႃႇ 2,500 ပျႃးယဝ်ႉ”- ၵူၼ်းပိုၼ်ႉတီႈ ဝဵင်းမိူင်းၼၢႆး သိုပ်ႇလၢတ်ႈၼင်ႇၼႆ။

 ၾႆးၾႃႉမွတ်ႇလႄႈ ၵူၼ်းမိူင်းလႆႈပၼ်ၶၢဝ်းယၢမ်းသႂ်ႇၽိုၼ်းသႂ်ႇထၢၼ်ႇ ႁုင်ၶဝ်ႈႁုင်ၽၵ်း။ ႁဵတ်းႁႂ်ႈလႆႈၵႂႃႇႁဵတ်းၵၢၼ်သူၼ်ႁႆႈၼႃး တူၵ်းလိုၼ်း ၊ ၵၢၼ်ၼၢၼ်းယဝ်ႉၼၢၼ်းတူဝ်ႈၸိူဝ်းၼႆႉ ။

ၵူၼ်းပိုၼ်ႉတီႈ ၽူႈယိင်း ဢႃယု 30 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “  ၼွၵ်ႈလိူဝ်ၼၼ်ႉ ပၼ်ႁႃထႅင်ႈလွင်ႈၼိုင်ႈသမ်ႉ ၵူၼ်းမိူင်းႁဝ်းဢမ်ႇပေႃးၾၢင်ႉၼၵ်းၼႃ။ သဵပ်ႇၾႆးမေႃႈၶဝ်ႈမေႃႈၽၵ်းဝႆႉႁေ ၾႆးသမ်ႉမွတ်ႇၵႂႃႇ။ သမ်ႉလိုမ်းထွၼ်ပလၵ်ႉမၼ်းသေ ၵႂႃႇသႂ်ႇၽိုၼ်းသႂ်ႇၾႆးသေႁုင်။ ႁုင်ယဝ်ႉၵႂႃႇ ႁဵတ်းၵၢၼ် ပႅတ်ႈႁေတင်းဝၼ်း။ ၵမ်းၼႆႉၾႆးၶႂ်ႈမႃးၶိုၼ်းၶၢဝ်းလႂ်ၵေႃႈမႃးႁေ ႁဵတ်းႁႂ်ႈမေႃႈၽၵ်း ဢၼ်သဵပ်ႇသၢႆဝႆႉၼၼ်ႉ ၶိုၼ်းႁဵတ်းၵၢၼ် ။ မေႃႈၵေႃႈၶႅမ်ႈ ႁဵတ်းႁႂ်ႈၾႆးမႆႈပႃးႁိူၼ်း ၸိူဝ်းၼႆႉ။ မီးလွင်ႈတုမ်ႉတိူဝ်ႉၼမ်ၼႃႇၶႃႈ”- ဝႃႈၼႆ။

ၾႆးၾႃႉ ဢၼ်ၵူၼ်းမိူင်းၼၢႆးၸႂ်ႉယူႇၼႆႉ ပဵၼ်ၾႆးၵဵင်းတွင်း၊ ဢဝ်တၢင်းၼမ်ႉၸၢင်မႃး ။ ၾႆးၾႃႉ ဢမ်ႇမႃးမၢၼ်ႇသေတႃႉ 1 ယူႊၼိတ်ႊၼႆႉလႆႈပၼ် 850 ပျႃး ၵူၼ်းပိုၼ်ႉတီႈလၢတ်ႈ။

တီႈဝဵင်းၼမ်ႉၸၢင်ၵေႃႈ မိူၼ်ၵၼ် ၶၢဝ်းတၢင်းသိုၵ်းမၢၼ်ႈ ယိုတ်းဢႃႇၼႃႇမႃးၼႆႉ ၾၢႆႇၾႆးၾႃႉ ဢမ်ႇၸႅၵ်ႇၸၢႆႇၾႆးပၼ်ၵူၼ်း မိူင်းတဵမ်ထူၼ်ႈ၊ ၵိုတ်းၵိုတ်းၶၢတ်ႇ ၶၢတ်ႇမၢင်ဝၼ်းပၼ်ၾႆးၾႃႉ 3-4 ၸူဝ်ႈမူင်းၵူၺ်း။ ၵူၺ်းၵႃႈ EPC လုမ်းၾႆးၾႃႉတႄႉ ၵဵပ်း ၵႃႈၸႂ်ႉၸၢႆႇၾႆး တဵမ်တဵမ်သေ ဢမ်ႇၵႃး ၼႂ်းလိူၼ်ဢေႃးၵတ်ႉသ်ၼႆႉမႃး ၵဵပ်းၶိုၼ်ႈၵႃႈၸႂ်ႉၾႆးလိူဝ်ၵဝ်ႇ 2-3 ပုၼ်ႉ ၵူၼ်းပိုၼ်ႉတီႈ လၢတ်ႈ။

ၼွၵ်ႈလိူဝ် ဝဵင်းမိူင်းၼၢႆးယဝ်ႉ လၢႆလၢႆမိူင်း ၼႂ်းဝဵင်းယႂ်ႇဝဵင်းလူင် ၼႂ်းၸိုင်ႈတႆး ပႃးၸဵမ်ဝဵင်းလူင်တူၼ်ႈတီးၵေႃႈ ၾႆးၾႃႉၵႆႉမွတ်ႇ ဢမ်ႇမႃးမၢၼ်ႇ။ လွင်ႈႁုင်ၵိၼ်ႁုင်ယႅမ်ႉလႆႈၸႂ်ယႂ်ႇ Gas လႄႈထၢၼ်ႇ။ ယၢမ်းလဵဝ်ၵႃႈၵႅတ်ႉသ် ၼိုင်ႈတဝ်ႈ 15 ၵီႊလူဝ်ႊၵရမ်ႊ ဢမ်ႇယွမ်း 5 မိုၼ်ႇပျႃး၊ ၵႃႈထၢၼ်ႇၼိုင်ႈထူင်  5 ႁဵင်ထိုင် ၼိုင်ႈမိုၼ်ႇပျႃး – လႆႈႁူႉၼင်ႇၼႆ။