ၵႃး 12 လေႃ့ လမ်းၼိုင်ႈ ပိၼ်ႈၾၢႆႇတႂ်ႈ ၵွင်းမုင်ႈယဵမ်ႈ(သိဝ်ႉၶိၼ်းတႃႇ) တီႈႁိမ်းၵူတ်ႉၵွင်း ဢၼ်ယၢၼ်ၵႆ ဝဵင်းၵူတ့်ၶၢႆမွၵ်ႈ 6 လၵ်း ၵူၼ်းတၢႆ ၵေႃႉၼိုင်ႈ။
ၵႃးၼႆႉပိၼ်ႈၵႂႃႇ မိူဝ်ႈဝႃး ဝၼ်းတီႈ 29/11/2022 ယၢမ်းၵၢင်ဝၼ်း 11 မူင်း။ ၵူၼ်းၶီႇမႃးၸွမ်းၵႃးၵေႃႉၼိုင်ႈဝႅၼ်တူၵ်းဢၢၼ်းဢဝ်တူဝ်လွတ်ႈ ၵူၺ်းၵႃႈ ဝႅၼ်ဢမ်ႇပူၼ်ႉ ရူတ်ႉၵႃးလူမ်ႉတဵင် လူႉတၢႆ။
ၽူႈၶဝ်ႈၸုမ်းၸွႆႈတူင်ႇဝူင်းၵူၼ်း (ဗြဟ္မာစိုရ်နှလုံးသား) ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ- “ၸႂ်ႈဢေႃႈ ပရိၵ်ႈၵႃးၶဝ်ၶၢတ်ႇသေလေႈ ၵုမ်းႁူဝ်ၵႃးဢမ်ႇလႆႈ သေၸင်ႇဢဝ် ၵႂႃႇၽႃႇသႂ်ႇႁၢဝ်းၶႅပ်ႇတၢင်းဢေႃႈ ။ ၵေႃႉဢၼ်ၶီႇမႃးတီႈၼိူဝ်ၵႃးၼၼ်ႉ ဝႅၼ်တူၵ်း သမ်ႉဢမ်ႇပူၼ်ႉ ဢဝ်ၵႃးလူမ်ႉတဵင်သႂ်ႇသေတၢႆပႅတ်ႈ။ ထႅင်ႈၵေႃႉၼိုင်ႈတႄႉ ၸဵပ်းယူႇၵူၺ်းၵႃႈဢမ်ႇပေႃးႁႅင်း ” ဝႃႈၼႆ။
ၵႃး12 လေႃ့ ဢၼ်ပိၼ်ႈၼႆ့ ပဵၼ်ၵႃးတၢင်ႇမၢၵ်ႇဝၼ်းဝၢႆႇ လုၵ့်တၢင်းဝဵင်းမူႇၸေႊမႃး ၵူတ့်ၶၢႆ ၊ ၵေႃႉဢၼ်တၢႆၼၼ်ႉပဵၼ်ၽူႈၸၢႆး ဢႃယု 40 ပီ။
ၽူႈၶဝ်ၸုမ်းၸွႆႈတူင်ႇဝူင်းၵူၼ်း(ဗြဟ္မာစိုရ်နှလုံးသား) သိုပ်ႇလၢတ်ႈထႅင်ႈဝႃႈ-“ ၵေႃႉဢၼ်တၢႆ ၼၼ်ႉ ပဵၼ်ၵူၼ်းၸႃႇတိ ဝၢၼ်ႈမိတ့်တႃႇ ဝဵင်းလိူဝ်ႇ ။ ႁဝ်းၶႃႈၸွႆႈဢဝ်ၵႂႃႇၵူတ်ႇထတ်းလွင်ႈတၢႆ တီႈႁူင်းယႃ ဝဵင်းၵူတ်ႇၶၢႆယဝ်ႉသေ ၶိုၼ်းဢဝ်တူဝ်မၼ်း သူင်ႇထိုင်ႁိူၼ်းမၼ်း တီႈဝဵင်းလိူဝ် ယဝ်ႉ။ ထႅင်ႈၵေႃ့ၼိုင်ႈသမ့် ၾၢႆႇပလိၵ်ႈၶဝ် ႁိပ်ႈမႃးဢဝ်တူဝ်မၼ်းၵႂႃႇၵူတ်ႇထတ်း ၊ လႆႈၵႂႃႇၵႄႈ လွင်ႈဢမူ့ ၼႆ့ယူႇ ဢမ်ႇတၼ်းႁူႉၸိုဝ်ႈ ” ဝႃႈၼႆ။
သဵၼ်ႈတၢင်း(ရူခင်းသာ) ၼႆ့ ၵႆၵၼ်တၢင်း ဝဵင်းၵူတ့်ၶၢႆ 6 လၵ်း ပဵၼ်သဵၼ်ႈတၢင်းငွၵ်း ပေႃးႁေႃႈလူတ့်ၵႃးဝႆး ၸၢင်ႈပဵၼ်ၽေးၵိုင့်ၵၢင့်ငၢႆႈ၊ ၵႆႉၵႆႉမီးၽေးၵိုင်ႉၵၢင်ႉ ၵူၼ့်ပိုၼ့်တီႈ လၢတ်ႈၼင်ႇၼႆ။
မိူဝ်ႈဝႃး ဝၼ်းတီႈ 28/11/2022 ၼႆ့ၵူၺ်းၼင်ႇၵဝ်ႇ တီႈဝဵင်းပၢင်ႇဢူႈလူင် မီးၵႃးတၢင်ႇဢုတ်ႇ လမ်းၼိုင်ႈ ဝႄႈၾုင်ဝူဝ်းသေပိၼ်ႈတဵင်သႂ်ႇ ၵူၼ်းလဵင့်ဝူဝ်းတၢႆၵေႃႉၼိုင်ႈ၊ ၵူၼ်းပႃးမႃးၸွမ်းၵႃးၵေႃႈတၢႆၵေႃႉၼိုင်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ