မိူဝ်ႈၼႆႉ ဝၼ်းတီႈ 16/11/2022 ယၢမ်းၵၢင်ၼႂ်ၸဝ်ႉ 3 မူင်းၶိုင်ႈ မၢၵ်ႇလူင် တူၵ်းတႅၵ်ႇ ၼႂ်းႁိူၼ်းၵူၼ်းဝၢၼ်ႈ လင်ၼိုင်ႈ တီႈ ဝၢၼ်ႈၼမ်ႉပွင်ႈ ဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ႁိူၼ်းယေးၶူဝ်းၶွင် လူႉၵွႆသုမ်းၸွမ်း ဢမ်ႇယွမ်း 100 သႅၼ်ပျႃး လွင်ႈတုမ်ႉတိူဝ်ႉ ၵူၼ်းႁိူၼ်းယေးမၢတ်ႇၸဵပ်း လူႉတၢႆတႄႉ ဢမ်ႇမီး။
ပီႈၼွင်ႉၸမ်ၸႂ် ၸဝ်ႈႁိူၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မၢၵ်ႇလူင် မႃးတူၵ်း သႂ်ႇ မၢၵ်ႇၼၼ်ႉ လုၵ်ႉတၢင်းလႂ်သေ ယိုဝ်းမႃးတႄႉဢမ်ႇႁူႉ။ ႁိူၼ်းယေးၼၼ်ႉ ပဵၼ်ႁိူၼ်းဢုတ်ႇ 3 ၸၼ်ႉ ၶူဝ်းၶွင်ၼႂ်းႁိူၼ်းယေး လူႉၵွႆတင်းၼမ်။ ၶူဝ်းႁိူၼ်းယေး၊ မၢၼ်ႇႁူးလႅင်း၊ ၽၵ်းတူႁိူၼ်း၊ လဵၵ်းမုင်းႁိူၼ်း လႄႈ ရူတ်ႉၵႃး ၸိူဝ်းၼႆႉ။ ပေႃးသွၼ်ႇၼပ်ႉၶၢၼ်ငိုၼ်းၸိုင် တေဢမ်ႇယွမ်း 100 သႅၼ်ပျႃး ၼႆႉၶႃႈ။ မိူဝ်ႈၽွင်းၼၼ်ႉ မီးၵူၼ်းႁိူၼ်း တိုၵ်ႉၼွၼ်းဝႆႉ 7 ၵေႃႉ။ ၸၢၵ်ႇမၢၼ်ႇႁိူၼ်း သဵၼ်တိူဝ်ႉသႂ်ႇ လုၵ်ႈ ဢွၼ်ႇ ။ လွင်ႈမၢတ်ႇၸဵပ်း ႁၢဝ်ႈႁႅင်း၊ လွင်ႈလူႉတၢႆၸိူဝ်းၼႆႉတႄႉ ဢမ်ႇမီး”- ဝႃႈၼႆ။
ႁိူၼ်းၵူၼ်းဝၢၼ်ႈ ဢၼ်လႆႈလူႉသုမ်း ယွၼ်ႉမၢၵ်ႇလူင်တူၵ်းတႅၵ်ႇၼႆႉ မိူၼ်ၼင်ႇ ၽၵ်းတူႁိူၼ်း လူႉၵွႆ/ ပွင်ႇ 5-6 ဢၼ်၊ မၢၼ်ႇ ႁူးလႅင်း လူႉၵွႆ ဢမ်ႇယွမ်း 10 ဢၼ်၊ လဵၵ်းမုင်းႁိူၼ်း၊ တိူမ်းႁိူၼ်း၊ ၽႃႁိူၼ်းယေး ၸိူဝ်း ၼႆႉ ပွင်ႇလူႉၵွႆတင်းၼမ်။
ႁိူၼ်းၵူၼ်းဝၢၼ်ႈလင်ၼႆႉ မီးဝႆႉတီႈႁူဝ်ဝၢၼ်ႈၼမ်ႉပွင်ႈ တိတ်းၸပ်းဝႆႉတင်းႁူင်းပလိၵ်ႈမၢၼ်ႈလႄႈ တပ်ႉသိုၵ်းမၢၼ်ႈၼႆယဝ်ႉ။
“ႁဝ်းၶႃႈ ထၢင်ႇတႄႉ မၢၵ်ႇလူင်ၼႆႉ ပိူၼ်ႈတေယိူင်းၸူး ႁူင်းပလိၵ်ႈမၢၼ်ႈ ဢမ်ႇၼၼ် တပ်ႉသိုၵ်းမၢၼ်ႈ ဢၼ်မီးဝႆႉႁိမ်းၼၼ်ႉ။ ၵူၺ်းၵႃႈ သမ်ႉဢမ်ႇတူၵ်းသႂ်ႇ တီႈၸိူဝ်းၼၼ်ႉလႄႈ တေပူၼ်ႉမႃးတူၵ်းသႂ်ႇႁိူၼ်းၵူၼ်းဝၢၼ်ႈၼႆႉၵေႃႈ ၸၢင်ႈပဵၼ်လႆႈ။ မၢၵ်ႇ ဢၼ်မႃးတူၵ်းတႅၵ်ႇၼႆႉ မီးၵူၼ်းသေၸုမ်းၸုမ်းယိုဝ်းမႃးၵူၺ်း။ လွင်ႈဝႃႈ မႃးႁၢင်ႈၵၢင်ဝႆႉၼႂ်းႁိူၼ်းယေး ၸိူင်ႉၼၼ်တႄႉ ဢမ်ႇ ပဵၼ်လႆႈၶႃႈ”- ပီႈၼွင်ႉၸမ်ၸႂ် ၸဝ်ႈႁိူၼ်း သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ် လွင်ႈၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် ယိုဝ်းမႃးတႄႉ ဢမ်ႇႁူႉ။ ယၢမ်းလဵဝ် ယူႇတီႈၽူႈၵွၼ်းဢိူင်ႇ ပလိၵ်ႈမၢၼ်ႈ ၸိူဝ်းၼႆႉ တိုၵ်ႉမႃးၵူတ်ႇထတ်းတူၺ်း လွင်ႈပိူင်ပဵၼ်မၼ်းဝႆႉယူႇ ဝႃႈၼႆ။
ပူၼ်ႉမႃး ၶၢဝ်းတၢင်း 2-3 ဝၼ်းၼႆႉ ယူႇတီႈ ပလိၵ်ႈမၢၼ်ႈသိုၵ်းမၢၼ်ႈ ပၼ်ၾၢင်ႉၵူၼ်းဝၢၼ်ႈဝႃႈ ငဝ်းလၢႆးဢမ်ႇပေႃးလီ ၼႆသေ ၸႂ်ႉပိၵ်ႉ ႁူင်းႁဵၼ်းလူင်ပွင်ၸိုင်ႈမၢၼ်ႈ တီႈဝၢၼ်ႈၼမ်ႉပွင်ႈ ဝႆႉ။ တေႃႇထိုင်ယၢမ်းလဵဝ် ပၢင်တိုၵ်းသိုၵ်းသိူဝ်တႄႉ ပႆႇမီး ၵူၼ်းပိုၼ်ႉတီႈလၢတ်ႈ။
