သိုၵ်းမၢၼ်ႈတင်း သိုၵ်းၶၢင် KIA ယိုဝ်းၵၼ်ၼႂ်းဝဵင်းမိူင်းမွၵ်ႇ ၸႄႈမိူင်းၶၢင်၊ မၢၵ်ႇလူင် တူၵ်းတႅၵ်ႇ တိူဝ်ႉသႂ်ႇ ၵူၼ်းဝၢၼ်ႈ ၽူႈယိင်းတၢႆ 2 ၵေႃႉ မၢတ်ႇၸဵပ်း 4 ၵေႃႉ ၼႂ်းၼၼ်ႉ ပႃးလုၵ်ႈႁဵၼ်းၸၼ်ႉ 7 ၵေႃႉၼိုင်ႈ။
တႄႇဢဝ် ဝၼ်းတီႈ 20/10/2022 ၼၼ်ႉမႃး တေႃႇထိုင်ယၢမ်းလဵဝ် ၶၢဝ်းတၢင်း 10 ဝၼ်းပၢႆၼႆႉ ၶွင်ႇသီႇသိုၵ်းမၢၼ်ႈ ယိုတ်း မိူင်းတင်း သိုၵ်းၶၢင် KIA လႄႈ PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈဝဵင်းမိူင်းမွၵ်ႇ ၸႄႈတွၼ်ႈဝၢၼ်ႈမေႃႈ(မၢၼ်ႉမူဝ်ႇ- ဗန်းမော်) ၸႄႈမိူင်းၶၢင်။ မၢတ်ႇၸဵပ်းၸၢၵ်ႇမၢၵ်ႇ 4 ၵေႃႉ၊ လူႉတၢႆ 2 ၵေႃႉပဵၼ်ၼၢင်းယိင်း တိုၵ်ႉႁဵတ်းၵၢၼ်သူၼ်ယူႇၼႂ်းသူၼ်ၼႂ်းႁိူၵ်ႈ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းမိူင်းမွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈဝၼ်းတီႈ 26 ၼၼ်ႉ မၢၵ်ႇလူင် တူၵ်းတႅၵ်ႇ ၼႂ်းသူၼ်ထူဝ်ႇလိၼ် တိူဝ်ႉသႂ်ႇ ၵူၼ်းဝၢၼ်ႈ လူႉတၢႆ 2 ၵေႃႉ ၵေႃႉၼိုင်ႈ ဢႃယု မွၵ်ႈ 60 ပီ။ ထႅင်ႈၵေႃႉၼိုင်ႈတႄႉ ဢႃယုမွၵ်ႈ 45 ပီ။ ပဵၼ်ၼၢင်းယိင်းၵူၼ်းမၢၼ်ႈၶုၼ်တင်းသွင်ၵေႃႉ။ ၵူၺ်းၵႃႈ ၸိုဝ်ႈသဵင်တႄႉပႆႇယိုၼ်ယၼ်လႆႈ။” – ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 28 ၼၼ်ႉ မၢၵ်ႇလူင် တူၵ်းတႅၵ်ႇ ႁိမ်းႁူင်းပလိၵ်ႈမၢၼ်ႈလႄႈ ၵျွင်းၶရိတ်ႉယၢၼ်ႇ ၸႄႈဝဵင်းမိူင်းမွၵ်ႇသေ ၸၢၵ်ႇမၢၵ်ႇတိူဝ်ႉသႂ်ႇ ဢွၼ်ႇႁဵၼ်းယိင်း ၸၼ်ႉ 7 ၵေႃႉၼိုင်ႈ ဢႃယု 13 ပီလႄႈ ထဝ်ႈယိင်း ၵေႃႉၼိုင်ႈ ဢႃယု 50 ပၢႆ လႆႈမၢတ်ႇၸဵပ်း ယၢမ်း လဵဝ် လႆႈသူင်ႇ ယူတ်းယႃတူဝ်ဝႆႉတီႈ ႁူင်းယႃ ဝၢၼ်ႈမေႃႈဝႆႉ ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။
ထိုင်မႃး ဝၼ်းတီႈ 29 ယၢမ်းၵၢင်ၶမ်ႈ 8 မူင်းပၢႆ မၢၵ်ႇလူင်သိုၵ်းမၢၼ်ႈ တူၵ်းတႅၵ်ႇၼႂ်းဝၢၼ်ႈပုင်ႇတႂ်ႈ တိူဝ်ႉသႂ်ႇၵူၼ်း ဝၢၼ်ႈၽူႈ ယိင်း 2 ၵေႃႉ လႆႈမၢတ်ႇၸဵပ်းထႅင်ႈ။
ၵူၼ်းမိူင်းမွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇလူင် သိုၵ်းမၢၼ်ႈ ယိုဝ်းမႃးတူၵ်းတႅၵ်ႇ ၼႂ်းဝၢၼ်ႈပုင်ႇတႂ်ႈ ၸၢၵ်ႇမၢၵ်ႇတိူဝ်ႉသႂ်ႇ ၽူႈယိင်းဢႃယု 40 ပၢႆ ၵေႃႉၼိုင်ႈ တီႈႁူဝ်ၶႅၼ်။ ယဝ်ႉၵေႃႈ လုၵ်ႈပႂ်ႉ ဢႃယု မွၵ်ႈ 27 ပီ တိူဝ်ႉၺႃး ၸၢၵ်ႇ မၢၵ်ႇ တီႈတႂ်ႈငွၵ်းသွၵ်ႇ လႆႈသူင်ႇၽႃႇတတ်းဢဝ်ၸၢၵ်ႇမၢၵ်ႇဢွၵ်ႇ တီႈႁူင်းယႃ ဝၢၼ်ႈမေႃႈဝႆႉ။ ”- ဝႃႈၼႆ။
မၢၵ်ႇလူင်ၼႆႉ တႅၵ်ႇတိူဝ်ႉသႂ်ႇ ႁိူၼ်းယေး ၵူၼ်ဝၢၼ်ႈပုင်ႇတႂ်ႈထႅင်ႈ လႆႈလူႉၵွႆ မွၵ်ႈ 4 လင် ၼႆလူးၵွၼ်ႇဝႃႈၼႆ။
ယၢမ်းလဵဝ် ႁူဝ်ၵူၼ်းပၢႆႈၽေးသိုၵ်း တီႈၸႄႈဝဵင်းမိူင်းမွၵ်ႇ တေမီး 1,000 ပၢႆ။ ၵမ်ႈၼမ်တေပၢႆႈၵႂႃႇသွၼ်ႈဝႆႉ ၸွမ်းဝတ်ႉၵျွင်းမုၼ် ၸဝ်ႈလႄႈ ႁိူၼ်းယေး ပီႈၼွင်ႉၽႂ်မၼ်း ၼႂ်းၸႄႈဝဵင်းဝၢၼ်ႈမေႃႈ ၸိူဝ်းၼႆႉ။ ၵမ်ႈၼမ် တေပဵၼ်ဝၢၼ်ႈလူင်ၵျႃႇ၊ ၼွင်ပဝ်း၊ ဝၢၼ်ႈဝဝမ်ႇလႄႈ ဢိၵ်ႇထႅင်ႈလၢႆလၢႆဝၢၼ်ႈ ။