မိူဝ်ႈၼႆႉတီႈလႃႈသဵဝ်ႈ ၵူၼ်းၸၢႆးပႅၵ်ႇၼႃႈၺႃးၽၼ်းမၢတ်ႇၸဵပ်းမီးလၢႆၵေႃႉ ၵေႃႉတီႈတီႈ

 မိူဝ်ႈၼႆႉဝၼ်းတီႈ 25/10/2022 ဝၼ်းလဵဝ်ၵူၺ်း တီႈဝဵင်းလႃႈသဵဝ်ႈ ၵူၼ်းၸၢႆးၺႃးၽၼ်းမီးလၢႆလၢႆၵေႃႉ၊ မၢတ်ႇၸဵပ်းသေ လူမ်ႉဝႆႉၵေႃႉတီႈတီႈ ၸုမ်းၸွႆႈထႅမ် ပရႁိတ လႆႈတေႃႉသူင်ႇပၼ်ႁူင်းယႃ။

မိူဝ်ႈၼႆႉယၢမ်းၵၢင်ၼႂ်ၸဝ်ႉ ၵူၼ်းၸၢႆးၵေႃႉၼိုင်ႈ ၺႃးၽၼ်းဝႆႉၸွမ်းတူဝ် မၢတ်ႇၸဵပ်းလၢႆလၢႆႁွႆး တီႈသဵၼ်ႈတၢင်းၵျွင်းမၢၼ်ႈၵွင်းလႄႈသဵၼ်ႈတၢင်း 43 ၼႂ်းပွၵ်ႉ 5 ဝဵင်းလႃႈသဵဝ်ႈ။

ၸုမ်းၵူၼ်းၼုမ်ႇလႃႈသဵဝ်ႈ ၸုမ်းၸွႆႈထႅမ်တူင်ႇဝူင်းၵူၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ၺႃးၽၼ်းတီႈၵွင်ႇၵေႃႈႁွႆးၼိုင်ႈ၊ တီႈလင် 3 ႁွႆး တီႈၶႅၼ်ႁွႆးၼိုင်ႈ လႄႈၼိဝ်ႉမိုဝ်းပုတ်းဝႆႉ ။ မၢတ်ႇၸဵပ်းႁႅင်းဢေႃႈ ။ ၵူၺ်းၵႃႈဢမ်ႇတၢႆ။ သူင်ႇႁူင်းယႃယဝ်ႉၶႃႈ” ဝႃႈၼႆ။

မိူၼ်ၼၼ်ၼင်ႇၵဝ်ႇ ၼႂ်ၼႆႉမွၵ်ႈၶၢဝ်းယၢမ်း 6 မူင်းၸဝ်ႉ တီႈၼႂ်းပွၵ်ႉ 7 ၊ တီႈသဵၼ်ႈတၢင်းဢလွင်းၸီႇတူႇ ၼၼ်ႉၵေႃႈ မီးၵူၼ်းၸၢႆးၵေႃႉၼိုင်ႈ မၢတ်ႇၸဵပ်းသေလူမ်ႉဝႆႉ။ ၼၼ်ႉၵေႃႈၸုမ်းၸွႆႈထႅမ် ပရႁိတ ဢဝ်တူဝ်သူင်ႇႁူင်းယႃဝႆႉ။

ၽူႈၶဝ်ႈၸုမ်းၸွႆႈထႅမ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ  -“ႁူဝ်တႃတႅၵ်ႇ၊ ၵႅမ်ႈၵႂ်ႈ၊ ႁူဝ်တႅၵ်ႇ မၢတ်ႇၸဵပ်းလိူတ်ႈႁႅင်းဝႆႉဢေႃႈ။လႅပ်ႈမႆႈၸႂ်ဝႆႉဢေႃႈ။ ၵူၺ်းသူင်ႇတူဝ်ဝႆႉတီႈႁူင်းယႃလူင်လႃႈသဵဝ်ႈယဝ်ႉၼင်ႇၵဝ်ႇ  ” ဝႃႈၼႆ။

 ထႅင်ႈၵေႃႉၼိုင်ႈၵေႃႈပဵၼ်မိူဝ်ႈၼႆႉၵူၺ်းၼင်ႇၵဝ်ႇ ႁၼ်တူဝ်တၢႆ ၵူၼ်းဢမ်ႇႁူႉၾၢႆႇ တီႈၼႂ်းပွၵ်ႉ 5 ၾၢႆႇၸၢၼ်းၼွင်ၼမ်ႉ။ ၼၼ်ႉတႄႉဢမ်ႇမီးႁွႆးမၢတ်ႇၸဵပ်းသင်။ ၵူၺ်းၵႃႈသူင်ႇတူဝ်ယူတ်းယႃတီႈႁူင်းယႃလူင်ဝဵင်းလႃႈသဵဝ်ႈယဝ်ႉ ဝႃႈၼႆ။

ၵူၼ်းၺႃးမၢတ်ႇၸဵပ်းလႄႈၵူၼ်းတၢႆ တီႈလႃႈသဵဝ်ႈမိူဝ်ႈၼႆႉ ပဵၼ်ၽႂ်လုၵ်ႉလႂ်မႃး လႄႈယွၼ်ႉသင်ၺႃးတႅင်းၽၼ်း၊ ၵူၼ်းၽၼ်းပဵၼ်ၽႂ်ၸိူဝ်းၼႆႉ ၸုမ်းၸွႆႈထႅမ်ပႆႇၸၢင်ႈယိုၼ်ယၼ်လၢတ်ႈပၼ်လႆႈလႄႈ ပႆႇလႆႈႁူႉတႅတ်ႈတေႃး။

ၼႂ်းဝဵင်းလႃႈသဵဝ်ႈၼႆႉ ဝၢႆးလင်သိုၵ်းမၢၼ်ႈယိုတ်းဢႃႇၼႃႇမႃး ၽူႈလၵ်ႉၵူၼ်းၸူၼ်လိူင်ႇၼမ်၊ ပၢင်တေႃႇလွင်းလိူင်ႇၼမ်၊ လိူဝ်ၼၼ်ႉယၢမ်းလဵဝ် မီးႁၢၼ်ႉၵိၼ်ၵျေႃႇ တီႈၵူၼ်းၼုမ်ႇသူင်ၶွၼ်ႈၵၼ်ယၢမ်းၵၢင်ၶိုၼ်း။ လွင်ႈပေႃႉထုပ်ႉႁႅမ်ၵၼ်တႅင်းၵၼ်ၵေႃႈၼမ်လိူင်ႇမႃးၵူႈဝၼ်း။

 ၼႂ်းပွၵ်ႉ 5 ၼႆႉၵူၼ်းၼင်ႇၵဝ်ႇမိူဝ်ႈဝၼ်းတီႈ 20/10/2022 ၼၼ်ႉ ႁၼ်တူဝ်တၢႆၵူၼ်းဢမ်ႇႁူႉၾၢႆႇၵေႃႉၼိုင်ႈ။ ၼၼ်ႉၵေႃႈပဵၼ်ၵူၼ်းပႅၵ်ႇၼႃႈ ၊ လုၵ်ႉလႂ်မႃး တၢႆယွၼ်ႉသင် ဢမ်ႇလႆႈႁူႉ ၵူၼ်းၸွႆႈထႅမ်ပရႁိတ လၢတ်ႈၼင်ႇၼႆ။