ဝၼ်းတီႈ 23/10/2022 မိူဝ်ႈဝႃးယၢမ်းၵၢင်ၶမ်ႈ 8 မူင်းပၢႆ 40 မိၼိတ်ႉ KIO ၸုမ်းလွတ်ႈလႅဝ်းၶၢင် ၸတ်းႁဵတ်းပၢင်မူၼ်ႈၸႂ် မၢႆတွင်းဝၼ်းၶွပ်ႈၶူပ်ႇၵၢၼ်ၵေႃႇတင်ႈ KIO ၶွပ်ႈတဵမ် 62 ပီ တီႈဝဵင်းၽႃၵၢၼ်ႉ ၼႂ်းမိူင်းၶၢင် ၊ သိုၵ်းမၢၼ်ႈဢဝ်ၶိူင်ႈမိၼ်မႃးယိုဝ်းလႄႈၵူၼ်းမိူင်းၵူၼ်းသိုၵ်းပႃးၸဵမ်ၸဝ်ႈပၢႆးမွၼ်း လူႉတၢႆ 50 ၊ မၢတ်ႇၸဵပ်းတင်းၼမ်။

 သိုဝ်ႇၶၢဝ်ႇၶၢင် KNG တႅမ်ႈဢွၵ်ႇဝႆႉဝႃႈ – “ဝၼ်းၶွပ်ႈၶူပ်ႇၵေႃႇတင်ႈ KIO ၼႆႉတေပဵၼ်ဝၼ်းတီႈ 25/10/2022 ။ ၵူၺ်းၵႃႈ KIO ၸတ်းႁဵတ်းပၢင်မူၼ်ႈသိူဝ်း ၵိၼ်ၶဝ်ႈႁူမ်ႈမူႇတင်းၶႅၵ်ႇၽူႈယႂ်ႇၵူၼ်းလူင်။ မီးၽူႈႁွင်ႉၵႂၢမ်းၸိုဝ်ႈသဵင်ယႂ်ႇၸဵမ်ၼႂ်းၶၢင်လႄႈ ၼႂ်းမိူင်းမၢၼ်ႈမႃးလဝ်ႈမူၼ်ႈပၼ်။ ၶိူင်ႈမိၼ်သိုၵ်းမၢၼ်ႈမႃးပွႆႇမၢၵ်ႇၼႆႉ ပဵၼ်ၶၢဝ်းပွႆးၵိုၼ်းလီလီ၊ မၢၵ်ႇသမ်ႉတူၵ်းၵၢင်ပွႆးလီလီ။ ၵွပ်ႈၼႆလႄႈ သဵၼ်ႈမၢႆဢၼ်ႁူႉတႅတ်ႈတေႃးတႄႉ တၢႆ 30 ပၢႆ။ ၵူၺ်းၵႃႈလႅပ်ႈတေၼမ်လိူဝ်ၼႆႉထႅင်ႈယူႇ ။ ”- ဝႃႈၼႆ။

ဝဵင်းၽႃၵၢၼ်ႉၼႆႉပဵၼ်တီႈဢၼ်သိုၵ်းမၢၼ်ႈတတ်းသၢႆ ဢိၼ်ႊထိူဝ်ႊၼႅတ်ႉဝႆႉလႄႈ ယူႇတီႈသိုဝ်ႇၶၢဝ်ႇ ဢမ်ႇလႆႈႁူႉသဵၼ်ႈမၢႆဢၼ်တႅတ်ႈတေႃး၊  မီးၶၢဝ်ႇမႃးဝႃႈ ၽူႈမီးၸၼ်ႉၼႂ်း KIO  ၵေႃႈတၢႆပႃးၼမ်၊ ဢၼ်တႅတ်ႈတေႃးတႄႉ ၽူႈႁွင်ႉၵႂၢမ်းၸိုဝ်ႈသဵင်ယႂ်ႇ  ၶၢင်  Aurali Lahpai  လႄႈ လၢႆလၢႆၵေႃႈဢိၵ်ႇပႃးတင်း ၸုမ်းတွႆႇတိုင်ႈ တိူဝ်ႉၸၢၵ်ႇမၢၵ်ႇ လူႉတၢႆ 4 ၵေႃႉ ဝႃႈၼႆ။

ဢိင်ၼိူဝ်လွင်ႈၸုမ်းသိုၵ်းမၢၼ်ႈႁဵတ်းမိူၵ်ႈလိူင်းတေႃႇၵူၼ်းမိူင်းၸိူဝ်းၼႆႉသေ – ၶွင်ႇသီႇၵိူဝ်းၵုမ်ၵဵဝ်ႇလူၺ်ႈမိူင်းမၢၼ်ႈ    (SAC-M) ဢၼ်တင်ႈဝႆႉတီႈမိူင်းမလေးသျႃး ၵေႃႈဢွၵ်ႇၶေႃႈပိုၼ်ၽၢဝ်ႇဝႃႇ – ႁႂ်ႈၸၢတ်ႈၸိုင်ႈလုမ်ႈၾႃႉ လႄႈ ဢႃႊသီႊယၼ်ႊ ပၼ်ၾၢင်ႉလၢတ်ႈသိုၵ်းမၢၼ်ႈႁႂ်ႈမီးလွင်ႈႁပ်ႉပုၼ်ႈၽွၼ်းလွင်ႈလႆႈႁဵတ်းမိူၵ်ႈမႂ်ႈၶႃႈႁႅမ်ၵူၼ်းမိူင်းၸိူဝ်းၼႆႉ။ ႁႂ်ႈၶွင်ႊသီႊႁူမ်ႇလူမ်ႈၸၢတ်ႈၸိုင်ႈပိုၼ်ၽၢဝ်ႇ သိုၵ်းမၢၼ်ႈပဵၼ် ၸုမ်းၵေႃႇၵၢၼ်ႁၢႆႉ ဝႃႈၼႆဝႆႉ။