ၵူၼ်းဝဵင်းလၢင်းၶိူဝ်း ဢွၼ်ၵၼ် ၸပ်းတၢင်းပဵၼ်ၶႆႈဝတ်း(တုပ်ကွေးရောဂါ) ၼမ် မၢင်ႁိူၼ်း ပဵၼ်ဝတ်း တင်းႁိူၼ်းတင်းယေး ႁိုင်  3-4 ဝၼ်း ၸင်ႇတေႁၢႆၶႅၼ်း။  

တႄႇဢဝ်ႁူဝ်လိူၼ်ဢွၵ်ႊထိူဝ်ႊပိူဝ်ႊၼႆႉမႃး ၵူၼ်းပိုၼ်ႉတီႈ ၼႂ်းဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း ဢွၼ်ၵၼ်တိတ်းၸပ်း တၢင်းပဵၼ်ၶႆႈဝတ်းၼမ် ၸွမ်းႁွင်ႈယႃ(ဆေးခန်း)လႄႈ ႁူင်းယႃလူင် ၸိူဝ်းၼႆႉ ၵူၼ်းၶဝ်ႈယူတ်းယႃ ၵိုၼ်းၶွၼ်ႈ ဢမ်ႇထၢတ်ႇ။  

ၵူၼ်းပိုၼ်ႉတီႈ ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ၵၼ်တင်းႁိူၼ်းတင်းယေး ၶႃႈဢေႃႈ။ ပေႃးပဵၼ်ၼႆ ႁိုင် 3 ဝၼ်းၼႆႉဢေႃႈ။ မၼ်းပဵၼ်ယွၼ်ႉၾိင်ႈၾႃႉလႅၵ်ႈလၢႆႈဝႆး ၵမ်ႉၾူၼ် ၵမ်ႉၵတ်း ၵိုင်ႉၵၢင်ႉပဵၼ်ၸိူင်ႉၼႆလႄႈၵူၼ်းၼႆႉပဵၼ်ဝတ်းပဵၼ်ဢၢၼ်ၵၼ်။ ပေႃးၵႂႃႇႁႃမေႃယႃ ၶဝ်သမ်းပၼ်ၶဵမ်ၼိုင်ႈ မၢၵ်ႈ။ ပေႃးယဝ်ႉ ပၼ်ယႃၵိၼ်မႃး တႃႇ 3 ဝၼ်း။ ပေႃးၵိၼ်ယႃႈယႃၵေႃႈ ႁၢႆၵႂႃႇၵၼ် ႁင်းၽႂ်မၼ်း ၶႃႈဢေႃႈ။ ”- ဝႃႈၼႆ။

ယႃႈယႃၵိၼ် ဢၼ်မေႃပၼ်မႃးၼၼ်ႉ တေပဵၼ်ယႃဝတ်း/ ဢႆ လႄႈ ယႃႈၼၢဝ် (ပႃႇလႃႇသီႇတႃႇမေႃး) ၸိူဝ်းၼႆႉ ။ တီႈႁွင်ႈယႃ ႁူင်းယႃ ၵူၼ်းၵိုၼ်းဝႆႉယူႇတင်းဝၼ်းတင်းဝၼ်း ဝႃႈၼႆ။

ၸဝ်ႈၸၢင်း ၵူၼ်းလၢင်းၶိူဝ်းၸဝ်ႈၼိုင်ႈၵေႃႈလၢတ်ႈဝႃႈ- “မၼ်းပဵၼ်ၶၢဝ်းမၼ်းယဝ်ႉ။ တီႈၵၢၼ်ႇတီႈၵျွင်းၵေႃႈ ဢွၼ်ၵၼ်ပဵၼ်သိုတ်ႈသိုတ်ႈသၢတ်ႈသၢတ်ႈ။ ပႃးၸဵမ်ၵူၼ်းၵျွင်း ယေႃးၵီႇၸိူဝ်းၼႆႉၵေႃႈပဵၼ်။ ပဵၼ်ၶူဝ်ႊဝိတ်ႉႁႃႉ ဢမ်ႇၸႂ်ႈႁႃႉၼႆၼၼ်ႉတႄႉ ၽႂ်ၵေႃႈဢမ်ႇႁူႉၽႂ်ယဝ်ႉ။ ၵူၺ်းၵႃႈ ပေႃးႁႄႉၵင်ႈတူဝ်ၵဝ်ႇဝႆႉႁႂ်ႈလႆႈတႄႉ ယိင်ႈၶႅၼ်းလီၼၼ်ႉၼႃႇၼေႃ။ ”– ဝႃႈၼႆ။

တၢင်းပဵၼ်ၼႆႉ တေၶူပ်းၶူပ်းၶိုၼ်ႈၶိုၼ်ႈ ပဵၼ်ဝတ်း/ ဢႆၵၼ် ယဝ်ႉၵေႃႈ ၶႃ/ မိုဝ်း တေၵူၼ်ႉမူၺ်ႈ ၸဵပ်း၊ တေမီးလူမ်းၼၢဝ် ဢိတ်းဢွတ်း။ တၢင်းပဵၼ်ၼႆႉ ၸပ်းၵၼ်ငၢႆႈ ပေႃးတိတ်းၸပ်းမႃးၵေႃႉၼိုင်ႈၼႆ ၼႂ်းမုင်ႉႁေႃႁိူၼ်းၼၼ်ႉ ၸပ်းၵၼ် တင်း ႁိူၼ်းတင်းယေး ဝႃႈၼႆ။