ပၢင်ပွႆး ႁူမ်ၸူမ်းႁပ်ႉတွၼ်ႈပီမႂ်ႇတႆး 2117 ၼီႈ ပီၼႆႉ တီႈဝဵင်းၼမ်ႉၶမ်း ဢုပ်ႇဢူဝ်းလႆႈၸႂ်ၵၼ်ဝႃႈ တေၸတ်းႁဵတ်းတီႈၵႅပ်ႈ ၵူၺ်း ယွၼ်ႉငဝ်းလၢႆးၼႂ်းမိူင်း လၢႆလၢႆလွင်ႈ။

မိူဝ်ႈဝႃး ဝၼ်းတီႈ 20/10/2022 ယၢမ်းဝၢႆးဝၼ်း 1:30 မူင်း ထိုင် 4:00 မူင်း ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး ႁူမ်ႈ ပႃး ၽူႈၵွၼ်းပွၵ်ႉ/ ယွမ်ႇ ႁူဝ်ဝၢၼ်ႈသေ ၸတ်းႁဵတ်းပၢင်ၵုမ်ဢုပ်ႇဢူဝ်းၵၼ် တႃႇႁၢင်ႈႁႅၼ်း ပၢင်ပွႆးသူင်ႇသင်ႇပီၵဝ်ႇ 2116 ၼီႈ ႁပ်ႉတွၼ်ႈပီမႂ်ႇတႆး 2117 ၼီႈ ပီၼႆႉ တေဢမ်ႇၸတ်းႁဵတ်းယႂ်ႇၵႂၢင်ႈ မိူၼ်မိူဝ်ႈၵူႈပီ ပူၼ်ႉမႃး ၊ယွၼ်ႉငဝ်းလၢႆး ၼႂ်းမိူင်းတႆး လၢႆလၢႆလွင်ႈလႄႈ ၼင်ႇႁိုဝ် ၾိင်ႈႁိတ်ႈႁွႆးပေႃးတေဢမ်ႇႁၢႆၼၼ်ႉ တေၸတ်းႁဵတ်းၵႂႃႇတီႈၵႅပ်ႈမၼ်းၵူၺ်းယဝ်ႉဝႃႈၼႆ။  ပၢင်ၵုမ်ၼႆႉ ၸတ်းႁဵတ်းတီႈႁူင်းႁေႃး ၵေႃလိၵ်ႈလၢႆး ဝဵင်းၼမ်ႉ ၶမ်း ၸိုင်ႈတႆးပွတ်းႁွင်ႇ။  

ၸၢႆးလၢဝ်ၶိူဝ်း ႁူဝ်ပဝ်ႈ ၵေႃလိၵ်ႈလၢႆး ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ႁဝ်းၶႃႈ မႃးၵုမ်ၵၼ်ဝႃႈ တေဢမ်ႇ ႁဵတ်းပွႆးယႂ်ႇပွႆးလူင်ယဝ်ႉ တေႁဵတ်းၼႂ်းႁူင်းႁေႃးသေ ႁဵတ်းၵႂႃႇၵႅပ်ႈၵႅပ်ႈၸိူင်ႉၼၼ်ၵူၺ်း။   ၶႂ်ႈတုၵ်းသူၼ်းထိုင် ၵူႈပွၵ်ႉၵူႈဝၢၼ်ႈ ႁႂ်ႈမေႃၵိၼ်ၸဵင်၊ လဵၼ်ႈၸဵင်၊ ပၢႆႈၸဵင်၊ ၵေႃႇၸဵင်ႇၵႂႃႇ ႁင်းၽႂ်မၼ်း။ ပီၼႆႉ ယွၼ်ႉငဝ်းလၢႆး ၼႂ်းမိူင်းၵူႈၾၢႆႇၾၢႆႇ ၵၢၼ်ပၢႆးမၢၵ်ႈမီးၵေႃႈ ဢမ်ႇပဵၼ် ၵိၼ်းၸႂ်ဝႆႉလႄႈ ၵူႈၵေႃႉၵူႈၾၢႆႇၵေႃႈ သမ်ႉတေယၢပ်ႇၸႂ်ၵိၼ်းၸႂ်ၸွမ်းထႅင်ႈ ၵွပ်ႈၼႆ ႁဝ်းၶႃႈ တေဢမ်ႇႁဵတ်းပွႆးယႂ်ႇလူင်ယဝ်ႉ”- ဝႃႈၼႆ။

ဝဵင်းၼမ်ႉၶမ်းၼႆႉ ဢမ်ႇလႆႈၸတ်းႁဵတ်း  ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး တင်ႈတႄႇ ပီ 2019 ၼၼ်ႉမႃး တေႃႇထိုင် ယၢမ်းလဵဝ် ပႃးပီၼႆႉ တေမီး 4 ပီယဝ်ႉ။ ယွၼ်ႉငဝ်းလၢႆးတၢင်းပဵၼ်ၶူဝ်ႊဝိတ်ႉ၊ ငဝ်းလၢႆး ဝၢၼ်ႈမိူင်းၵူႈၾၢႆႇၾၢႆႇ ၸိူဝ်းၼႆႉသေ ဢမ်ႇ ပဵၼ်ၸတ်း ႁဵတ်းမႃး။  

ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2117 ၼီႈ ပီၼႆႉ တီႈဝဵင်းၼမ်ႉၶမ်း ဢၢၼ်းဝႆႉ တေၸတ်းႁဵတ်း တီႈႁူင်းႁေႃ တႅၼ်ႈမၢဝ်းၶမ်း ၼႆယဝ်ႉ။