ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဝ်ၶဝ်ႈ ဢဝ်ငိုၼ်းႁူၺ်းၵူၼ်းၼႂ်းၼွင်ႁၢႆးယႃႈ ႁႂ်ႈၶွတ်ႇၽွတ်ႈ ၸုမ်းပျီႇတူႉၸိတ်ႉ ယူႇတႂ်ႈသိုၵ်း ၵုမ်းၵမ်။

တႄႇဢဝ် ႁူဝ်လိူၼ်ဢွၵ်ႊထိူဝ်ႊပိူဝ်ႊၼႆႉမႃး ၶွင်ႇသီႇသိုၵ်းမၢၼ်ႈ ယိုတ်းမိူင်း လူင်းပိုၼ်ႉတီႈ ႁူၺ်းသူၼ်း ၵူၼ်းဝၢၼ်ႈဢိၼ်းပေႃးၶူင်ႇ ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်းဝႃႈ သင်ဝႃႈၽူႈလႂ်ၽႂ် ၶဝ်ႈႁၢပ်ႇၵၢၼ် ၼႂ်းၸုမ်းပျီႇတူႉၸိတ်ႉ တႂ်ႈသိုၵ်းၶဝ် ၵုမ်းၵမ်ၸိုင် တေပၼ်  ၶဝ်ႈသၢၼ် 1 ထူင်လႄႈ ငိုၼ်း 150,000 ပျႃး။

ၵူၼ်းၼႂ်းၼွင်ႁၢႆးယႃႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၶဝ် မႃးႁူပ်ႉၽူႈ ၵွၼ်းဝၢၼ်ႈ ဢိၼ်းပေႃးၶူင်ႇလႄႈ ထႅင်ႈလၢႆလၢႆဝၢၼ်ႈ ၼႂ်းၼွင်၊ လၢတ်ႈဝႃႈ ၽႂ်ၶဝ်ႈႁဵတ်း ပျီႇတူႉၸိတ်ႉၼႆၸိုင် တေၵမ်ႉထႅမ်ပၼ် ၶဝ်ႈသၢၼ် 1 ထူင် ငိုၼ်း 150,000 ပျႃး။ ၵူၼ်းၼႂ်းၼွင်မၢင်ၵေႃႉတႄႉ ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇႁႅင်းလႄႈ ဢွၼ်ၵၼ်ၵႂႃႇ ပၼ်သဵၼ်ႈၸိုဝ်ႈ တႃႇတေႁဵတ်းၵေႃႈမီးဢေႃႈ”- ဝႃႈၼႆ။

ယၢမ်းလဵဝ် ၵူၼ်းဝၢၼ်ႈဢိၼ်းပေႃးၶူင်ႇ ဢၼ်ၵႂႃႇပၼ်သဵၼ်ႈၸိုဝ်ႈဝႆႉ တႃႇႁဵတ်းပျီႇတူႉၸိတ်ႉၼၼ်ႉ ဢမ်ႇယွမ်း 20 ၵေႃႉ ယဝ်ႉ။  ၾိုၵ်းၵၢၼ်သိုၵ်းတႄႉ တေလႆႈၵႂႃႇၾိုၵ်းတီႈဝဵင်းတူၼ်ႈတီး ဝႃႈၼႆ။

ၵူၼ်းၼႂ်းၼွင်ႁၢႆးယႃႈၼႆႉ ပိူင်လူင် ပိုင်ႈဢိင်ၸႂ်ယႂ်ႇ ၵၢၼ်ၽုၵ်ႇသွမ်ႈ တႃႇႁႃၵိၼ်လဵင်ႉတွင်ႉ ။ ပႂ်ႉလႅၼ်ႈၵိၼ်ႁိူဝ်း လႄႈၶၢႆၶူဝ်းဢွၵ်ႇၼႂ်းၼွင်တေႃႇၵူၼ်းမႃးဢႅဝ်ႇယဵမ်ႈ။

ၸူဝ်ႈသိုၵ်းမၢၼ်ႈယိုတ်းမိူင်းလႄႈၶူဝ်ႊဝိတ်ႉလၢမ်းၽႄႈၼႆႉ ၶူဝ်းၵုၼ်ႇဢွၵ်ႇသူၼ်ဢမ်ႇမီးလွၵ်းၵၢတ်ႇ၊ ဢမ်ႇမီးၵႃႈၶၼ်၊ ၵူၼ်းဢႅဝ်ႇယဵမ်ႈတွင်ႈတဵဝ်းသမ်ႉဢမ်ႇမီးလႄႈ ၵူၼ်းၼႂ်းၼွင်ပဵၼ်ဢၼ်ယၢပ်ႇၽိုတ်ႇၼႂ်းၵၢၼ်ႁႃၵိၼ်လဵင်ႉတွင်ႉ။  

ပူၼ်ႉမႃး မိူဝ်ႈလိူၼ်သႅပ်ႊထႅမ်ႊပိူဝ်ႊၼၼ်ႉ ၽူႈၵွၼ်းၸႄႈဝဵင်း ပလိၵ်ႈမၢၼ်ႈ တႂ်ႈသိုၵ်းမၢၼ်ႈၵုမ်းၵမ် ဢဝ်ႁူဝ်ၶေႃႈ ဢၼ်ဝႃႈ ၼင်ႇႁိုဝ် ဝၢၼ်ႈမိူင်းပေႃးတေမီးလွင်ႈႁူမ်ႇလူမ်ႈ၊ ၵတ်းယဵၼ်လႄႈ ၶိုၼ်ႈယႂ်ႇမႂ်ႇသုင် ၼႆသေ သူၼ်းတုမ် ႁႂ်ႈၵူၼ်းမိူင်းႁၼ်လီ ၵမ်ႉထႅမ်ၶဝ်ၵႂႃႇ တၢင်းၸႄႈဝဵင်းယႂႃႇငၢၼ်ႇ၊ ပၢင်းတရႃႉ၊ ယွင်ႁူၺ်ႈ၊ လွၵ်ႉၸွၵ်ႇ ၸိူဝ်းၼႆႉ။