ၽူႈၵွၼ်းတပ်ႉၵွင် သိုၵ်းမၢၼ်ႈ ၶမယ 421 ၸႄႈဝဵင်းမူႇၸေႈ  ၺႃးၸုမ်းဢမ်ႇႁူႉၾၢႆႇယိုဝ်း တၢႆၽွင်းၵႂႃႇမႄးရူတ်ႉ ။

မိူဝ်ႈဝႃး ဝၼ်းတီႈ 18/10/2022  ၵၢင်ဝၼ်း 1 မူင်းၶိုင်ႈ ၽူႈၵွၼ်းတပ်ႉၵွင် 421 ၸဝ်ႈသိုၵ်း ပျေႉၽဵဝ်းဢွင်ႇ ၺႃးယိုဝ်းတီႈ ႁၢၼ်ႉမႄးရူတ်ႉတီႈ 105 လၵ်း ၸႄႈဝဵင်းမူႇၸေႈ     ပဵၼ်ၼမ်ႉမိုဝ်းၽႂ် ၸုမ်းလႂ်တႄႉပႆႇၸၢင်ႈယိုၼ်ယၼ်။

ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈတေႉဢေႃႈ ၺႃးယိုဝ်းတီႈ 105 လၵ်း  ၸမ်ဝၢၼ်ႈမေႃႈ ၊ မၼ်းမႃးမႄးၵႃးမၼ်း ၊  မေးမၼ်းၵေႃႈပႃးမႃးၸွမ်းယူႇ၊ ၵူၺ်းလိူၵ်ႈယိုဝ်းမၼ်းၵွႆးဢေႃႈ။ ပဵၼ်ၽႂ်ၸုမ်းလႂ်တႄႉ ႁဝ်းၶႃႈဢမ်ႇႁူႉၶႃႈ။ ၵူၼ်းမႃးယိုဝ်းၼႆႉ ယွမ်ယွမ်သုင်သုင်တင်း 2 ၵေႃႉဢေႃႈ။ ယိုဝ်းၵႂႃႇမွၵ်ႈ 8 ၵမ်းၼႆႉ။ ၽူႈၵွၼ်းတပ်ႉမၢၼ်ႈၼၼ်ႉၵေႃႈတၢႆဢေႃႈ။ ဝၢႆးယိုဝ်းယဝ်ႉႁေၵေႃႈ ၶဝ်သွင်ၵေႃႉၵေႃႈ ပၢႆႈၵႂႃႇတၢင်းဝၢၼ်ႈမေႃႈပုၼ်ႉၶိုၼ်း ။ တၢင်းၼၼ်ႉမီးပီႈၼွင်ႉလွႆယူႇသဝ်းဝႆႉၶႃႈဢေႃႈ။ ”- ဝႃႈၼႆ။

ၵူၼ်းၸမ်ၸႂ်တပ်ႉသိုၵ်းမၢၼ်ႈတီႈမူႇၸေႊလွမ်လၢတ်ႈဝႃႈ  ဢၼ်ၵႂႃႇပိုတ်းယိုဝ်း ၵၼ်တင်းသိုၵ်းၶၢင်ၵေႃႈ ပဵၼ်ၼမ်ႉမိုဝ်းၽူႈၵွၼ်းတပ်ႉၵွင်ၵေႃႉၼႆႉဝႃႈၼႆ။

ဝၢႆးလင်ၽူႈၵွၼ်းတပ်ႉ ပျေႉၽဵဝ်းဢွင်ႇ ၺႃးယိုဝ်းတၢႆယဝ်ႉ သိုၵ်းမၢၼ်ႈထႅမ်ႁႅင်းသိုၵ်းမႃးတူင်ႉၼိုင်တီႈ 105 လၵ်းတင်းၼမ်သေ ၵူတ်ႇထတ်းၵူၼ်းၵႂႃႇမႃးတေႃႇပေႃးထိုင်ဝၢႆးဝၼ်း 4 မူင်း။ လိူဝ်ၼၼ်ႉမီးၶၢဝ်ႇဝႃႈ သိုၵ်းမၢၼ်ႈတေၶၢႆႉ ၽူႈၵွၼ်းတပ်ႉၵွင်ၶဝ်ဢၼ်မီးတီႈမူႇၸေႊ ၵႂႃႇဝႆႉတၢင်ႇတီႈဝႃႈၼႆ။

“တေႃႇထိုင်မိူဝ်ႈၼႆႉ ၶဝ်တိုၵ်ႉၵူတ်ႇထတ်းႁႅင်းယူႇၶႃႈတီႈ 105 လၵ်းၼႆႉ ။ တီႈမူႇၸေႊ ယိင်ႈၶႅၼ်းၵူတ်ႇထတ်းႁၢဝ်ႈႁႅင်း။ မိူဝ်ႈၼႆႉၶဝ်ၶၢႆႉၽူႈၵွၼ်းတပ်ႉၶဝ် ၵႂႃႇတၢင်းၼမ်ႉၽၵ်းၵႃၼႆဢေႃႈ ။”– ၵူၼ်းပိုၼ်ႉတီႈလၢတ်ႈၼင်ႇၼႆ။

တီႈဝဵင်းမူႇၸေႊၼႆႉ ၼွၵ်ႈလိူဝ်သိုၵ်းမၢၼ်ႈယဝ်ႉ သိုၵ်းတဢၢင်း TNLA  သိုၵ်းၶၢင် KIA  သိုၵ်းတႆး SSPP/SSA လႄႈ ပျီႇတူႉၸိတ်ႉတင်းၼမ် တူင်ႉၼိုင်ယူႇသဝ်းဝႆႉ။ဝၢႆးလင်သိုၵ်းမၢၼ်ႈယိုတ်းမိူင်းၼႆႉ ၶႃႈႁၢပ်ႇၵၢၼ်ၶုၼ်တီႈမူႇၸေႊၼႆႉၵႆႉၵႆႉၺႃးယိုဝ်းတၢႆ။ သိုၵ်းမၢၼ်ႈဢမ်ႇတွၼ်ႉတီႉၺွပ်းလႆႈၵေႃႉပိုတ်းယိုဝ်းသေပွၵ်ႈ။ တူဝ်သိုၵ်းမၢၼ်ႈသမ်ႉ ၵႆႉၵႆႉယိုဝ်းၵူၼ်းမိူင်းတၢႆ။ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ။