ႁိူၼ်းယေးၵူၼ်းဝၢၼ်ႈ လင်ၼိုင်ႈ တီႈဝဵင်းၼမ်ႉတူႈ ထုၵ်ႇၵူၼ်းၶဝ်ႈယႃႉ သုမ်းၵႂႃႇငိုၼ်း 50 သႅၼ်ပၢႆ။
ပဵၼ်ႁိူၼ်းဢူးၵျႃႇယူင်ႇ ၵူၼ်းဝၢၼ်ႈယေႇဢူဝ်း ဢိူင်ႇၶျွင်းတႃႇ ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ။ ထုၵ်ႇၵူၼ်းၶဝ်ႈယႃႉ သွၵ်ႈတဝ်ၼႂ်းႁိူၼ်းယေးပူၼ်ႉမႃး မိူဝ်ႈဝၼ်းတီႈ 15/10/2022 လူႉသုမ်းၵႂႃႇငိုၼ်း 50 သႅၼ်ပၢႆ ၼႆယဝ်ႉ။
ပီႈၼွင်ႉ ဢူးၵျႃႇယူင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းလၵ်ႉၼႆႉ ဢဝ်ၶိုၼ်ႈလႆသေ လၵ်ႉၶိုၼ်ႈတၢင်းႁူးလႅင်း။ မိူဝ်ႈဝၼ်းသဝ် ၵၢင်ၶမ်ႈၼၼ်ႉ ႁဝ်းၶႃႈလႄႈတင်းၸဝ်ႈႁိူၼ်း မီးဝႆႉတၢင်းၼွၵ်ႈသေ ၵူၼ်းလၵ်ႉၼၼ်ႉ လႅပ်ႈတေၶဝ်ႈလၵ်ႉၽွင်းၼၼ်ႉ။ ထိုင်မႃး ဝၼ်းတိတ်ႉ ယၢမ်းၵၢင်ၼႂ် ၸင်ႇႁူႉဝႃႈ ၵူၼ်းလၵ်ႉၶဝ်ႈသေ ငိုၼ်းႁၢႆၵႂႃႇ 50 သႅၼ်ပၢႆ”- ဝႃႈၼႆ။
ပူၼ်ႉမႃး ပႆႇႁိုင်ၼႆႉ ႁိူၼ်းပႃႈဢေးၼေႇၼၼ်ႉၵေႃႈ ၺႃးၵူၼ်းၶဝ်ႈလၵ်ႉ လႆႈၵႂႃႇငိုၼ်း 3 သႅၼ်ပျႃး မိူဝ်ႈၽွင်းမၼ်းၼၢင်း ၵႂႃႇၵမ် သိလ်ၼွၼ်းၵျွင်း ၽွင်းလိူၼ်မူၼ်းၼၼ်ႉ ဝႃႈၼႆ။
“ၵူၼ်းလၵ်ႉၼႆႉ ၶဝ်ပႂ်ႉတူၺ်း မိူဝ်ႈပိူၼ်ႈဢမ်ႇယူႇႁိူၼ်းသေ ပႂ်ႉၶဝ်ႈလၵ်ႉ။ တီႈႁိူၼ်းပႃႈဢေးၼေႇၼၼ်ႉ ၽူဝ်မၼ်းၼၢင်း ဢမ်ႇ ယူႇႁိူၼ်းၵႂႃႇၸွႆႈပိူၼ်ႈၼႂ်းဝၢၼ်ႈ တီႈၶႅၵ်ႇလီပၢင်ၸႃႉ ပႃႈဢေးၼေႇသမ်ႉၵႂႃႇၼွၼ်းၵျွင်း။ မိူဝ်ႈၽွင်း ဢမ်ႇမီးၽႂ်ယူႇ ႁိူၼ်းၼၼ်ႉ ၵူၼ်းလၵ်ႉၼၼ်ႉ ၶဝ်ႈၵႂႃႇလၵ်ႉသေ လႆႈငိုၼ်းၵႂႃႇ 3 သႅၼ်ပျႃး”- ၵူၼ်းပိုၼ်ႉတီႈ ဝဵင်းၼမ်ႉတူႈ သိုပ်ႇလၢတ်ႈၼႄၼင်ႇၼႆ။
ဝၢၼ်ႈယေႇဢူဝ်းၼႆႉ ပဵၼ်ၼႂ်းၼႃႈတီႈ သိုၵ်းတဢၢင်း TNLA ၵုမ်းၵမ်ဝႆႉ ဝႃႈၼႆသေတႃႉၵေႃႈ ႁိူၼ်းယေးၵူၼ်းဝၢၼ်ႈၵႆႉၺႃး ၵူၼ်းလၵ်ႉၽွတ်ႈယႃႉ သွၵ်ႈတဝ်ဢဝ်ၶူဝ်းႁိူၼ်းယေး ၵဵဝ်ႇၵပ်းလွင်ႈၼႆႉ ဢမ်ႇတွၼ်ႉတီႉလႆႈ တူဝ်ၵူၼ်းလၵ်ႉမႃးသေပွၵ်ႈ ဝႃႈၼႆ။