ၸဝ်ႈၵွၼ်းဝတ်ႉ ဝၢၼ်ႈတႆး 4 လၵ်း တီႈဝဵင်းမိူင်းၵွင်(မိုးကောင်း) ၸႄႈမိူင်းၶၢင် ထုၵ်ႇၵူၼ်းဢမ်ႇႁူႉၾၢႆႇ ၶဝ်ႈယိုဝ်း လႆႈလူႉလွၼ်ႇ ထင်တီႈ တီႈၼႂ်းဝတ်ႉ လႆႈတိူဝ်ႉၺႃးမၢၵ်ႇၵွင်ႈ 6 လုၵ်ႈ။
မိူဝ်ႈဝႃး ဝၼ်းတီႈ 16/10/2022 ယၢမ်းၵၢင်ၶမ်ႈ 7 မူင်းပၢႆ ၸဝ်ႈၶူး ၽတ်ႉတၼ်ႇတ သီရိၼၼ်ႇတ ၽူႈၵွၼ်းဝတ်ႉ ဝၢၼ်ႈတႆး 4 လၵ်း ဢိူင်ႇယေႇသိၼ်ႇ ဝဵင်းမိူင်းၵွင် ၸႄႈမိူင်းၶၢင် ထုၵ်ႇၵူၼ်းႁၢႆႉ ဢမ်ႇႁူႉၾၢႆႇ ဢဵၼ်ႁႅင်းမွၵ်ႈ 10 ၶဝ်ႈယိုဝ်း ၼႂ်းဝတ်ႉသေ လႆႈ လူႉလွၼ်ႇထင်တီႈ ၼႂ်းဝတ်ႉ ။
ၵူၼ်းပိုၼ်ႉတီႈ ဝဵင်းမိူင်းၵွင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 16 ယၢမ်းႁူဝ်ၶမ်း 7:10 မူင်းၼၼ်ႉ ၾႆးၾႃႉမွတ်ႇ ။ ဝၢႆးၼၼ်ႉ မီးၵူၼ်း မွၵ်ႈ 10 ၵေႃႉ ၶဝ်ႈမႃးၼႂ်းၵျွင်းသေ လၢတ်ႈဝႃႈ ၵူၼ်းဢမ်ႇၵဵဝ်ႇၶွင်ႈ ႁႂ်ႈၵူမ်ႈႁူဝ်လူင်းဝႆႉမူတ်းမူတ်း။ မိူဝ်ႈ ၽွင်းၼၼ်ႉ ၵူၼ်း 2 ၵေႃႉ ပႂ်ႉဝႆႉတီႈၽၵ်းတူ။ တႃႇ 8 ၵေႃႉသမ်ႉ ၶိုၼ်ႈၵႂႃႇၼိူဝ်ၵျွင်းသေ ၵႂႃႇယိုဝ်းၸဝ်ႈသြႃႇၶႃႈဢေႃႈ”- ဝႃႈ ၼႆ။
ၸဝ်ႈၶူး ၽတ်ႉတၼ်ႇတ သီရိၼၼ်ႇတၼႆႉ ထုၵ်ႇယိုဝ်း 6 ၵမ်းသေ လႆႈလူႉလွၼ်ႇၵႂႃႇ တီႈၼႂ်းဝတ်ႉ ၵမ်းလဵဝ်။ ၸုမ်းဢၼ် မႃး ယိုဝ်းၼၼ်ႉ ပဵၼ်ၸုမ်းၽႂ် ၼမ်ႉမိုဝ်းၽႂ် ၼၼ်ႉတႄႉ ပႆႇႁူႉ။
ၸဝ်ႈၶူး ၽတ်ႉတၼ်ႇတ သီရိၼၼ်ႇတ ၽူႈၵွၼ်းဝတ်ႉ ဝၢၼ်ႈတႆး 4 လၵ်းၼႆႉ ဢႃယုလႆႈ 57 ပီ ဝႃႇသႃ 27 ဝႃႇ။ မၼ်းၸဝ်ႈ ပဵၼ်ပႃး သင်ၶၼႃႇယၵ ၸႄႈဝဵင်းထႅင်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ