မိူဝ်ႈၼႆႉ ဝၼ်းတီႈ 17/10/2022 ယၢမ်းၵၢင်ၼႂ် 10 မူင်းပၢႆ မီးၵူၼ်း သွင်ၵေႃႉ သွၼ်ႉရူတ်ႉၶိူင်ႈ မႃးၸွမ်းၵၼ်သေ ၸၵ်ႉ ဢဝ်ၾူၼ်းမိုဝ်းထိုဝ် ၼႂ်းမိုဝ်းၵူၼ်းမိူင်းၵႂႃႇလုၵ်ႈၼိုင်ႈ မိူဝ်ႈၽွင်း ၸဝ်ႈၶွင်ၾူၼ်းတိုၵ်ႉၸုၵ်းဢုပ်ႇၵၼ်ထႅင်ႈၵေႃႉၼိုင်ႈတီႈၼႂ်းၵိဝ်ႇ   ၼႂ်းဝၢၼ်ႈၽူၺ်းႁူင်း ပွၵ်ႉတေႃႇယွတ်ႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ  လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းႁၢႆႉၼၼ်ႉ သွၼ်ႉရူတ်ႉၶိူင်ႈမႃးၸွမ်းၵၼ် 2 ၵေႃႉ သႂ်ႇသိူဝ်ႈသွၼ်ႉ သီလမ် တင်းသွင်၊ ၽႃႈတူမ်းသူပ်း (Mask) ၵေႃႈ ဢမ်ႇသႂ်ႇ။ ႁေႃႈရူတ်ႉၶိူင်ႈမႃးသေ ၸၵ်ႉဢဝ်ၵႂႃႇၾူၼ်းၼႂ်းမိုဝ်းပိူၼ်ႈၵႂႃႇတေႃႇၼႃႈတေႃႇတႃၵူၼ်း။  မိူဝ်ႈၽွင်း ၸဝ်ႈၶွင်မိုဝ်းထိုဝ် တိုၵ်ႉၸုၵ်းဢုပ်ႇၵၼ်ဝႆႉတင်းထႅင်ႈၵေႃႉၼိုင်ႈယူႇၼၼ်ႉ။ ၾူၼ်းၼၼ်ႉ တိုၵ်ႉပဵၼ် ၾူၼ်းမႂ်ႇ တေမီးၶၼ်မၼ်း မွၵ်ႈ 4 သႅၼ်ပျႃးၼႆႉ”- ဝႃႈၼႆ။

ယၢမ်းလဵဝ် ၼႂ်းဝဵင်းမူႇၸေႊၼႆႉ ၽူႈလၵ်ႉၸၵ်ႉၶုတ်ႈလိူင်ႇၼမ်ႁႅင်း ဢမ်ႇဝႃႈ ၸွမ်းတႃႈၸွမ်းတၢင်း၊ ၸွမ်းႁၢၼ်ႉၶၢႆၶူဝ်းၼႂ်းၵၢတ်ႇ၊ ႁိူၼ်းယေး ၸိူဝ်းၼႆႉ ၶူဝ်းၶွင်ၶူဝ်းၵုၼ်ႇ ၵႆႉႁၢႆ။   ၵႃး – ရူတ်ႉၶိူင်ႈ ၵိုတ်းဝႆႉ ၼႂ်းႁိူၼ်းယေးၵေႃႈ ဢမ်ႇဝႆႉ ၵႆႉႁၢႆ ၶိူဝ်းယႂ်း။ တေႃႈၼင်ႇ ၾူၼ်းဝႆႉၼႂ်းႁိူၼ်းယေး ၵေႃႈ ပၢႆၶဝ်ႈလၵ်ႉဢဝ်ထိုင်ၼႂ်းႁိူၼ်း  ထႅင်ႈ။

“မိူဝ်ႈလဵဝ် ၸုမ်းဢၼ်လၵ်ႉၼႆႉ မၼ်းမီးၸုမ်းမၼ်းဝႆႉ ၵမ်းလဵဝ်။ သင်ဝႃႈ ၶဝ်လၵ်ႉၾူၼ်းၵႂႃႇယဝ်ႉၸိုင် ၶဝ်တေဢဝ်ၵႂႃႇလၢင်ႉ မွတ်ႇ ပႅတ်ႈၶေႃႈမုလ်းတင်းမူတ်း ႁႂ်ႈပဵၼ်ၶိူင်ႈမႂ်ႇ။ ၶဝ်မေႃၵႄႈလွၵ်ႉမၼ်းလႆႈ ဢမ်ႇဝႃႈ IOS, Android ၸိူဝ်းၼႆႉ ၶဝ်မေႃယႃႉ မူတ်း။ မိူၼ်ၼင်ႇ I Phone (IOS) ၸိူဝ်းၼႆႉ လွင်ႈႁူမ်ႇလူမ်ႈ မၼ်းၶႅမ်ႉလီ ဢမ်ႇငၢႆႈငၢႆႈတေယႃႉလႆႈ ၼႆ ၶဝ်ယင်းၵႂႃႇယႃႉႁႂ်ႈလႆႈသေဢဝ်ၵႂႃႇၶၢႆဢေႃႈ။ လွင်ႈႁူမ်ႇလူမ်ႈ မိူင်းႁဝ်း ၼႆႉ မၼ်းဢမ်ႇမီးသေဢိတ်းယဝ်ႉၶႃႈ”- ၵူၼ်းပိုၼ်ႉတီႈဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းၸမ် 2 ပီၼႆႉ ၼႂ်းဝဵင်းမူႇၸေႊ  ဢမ်ႇမီးလွင်ႈႁူမ်ႇလူမ်ႈသင်၊ ၽူႈလၵ်ႉၸၵ်ႉၶုတ်ႈ ၵူၼ်းႁၢႆႉၵူၼ်းမိူၵ်ႇလိူင်ႇၼမ်ႁႅင်း၊ လွင်ႈႁၢင်ႈၵၢင်မၢၵ်ႇၼႂ်းၵၢင်ဝဵင်း၊ လွင်ႈပိုတ်းယိုဝ်းၶႃႈႁႅမ်ၵၼ်တၢႆ ၸိူဝ်းမီးမႃးၶိူဝ်းယႂ်း။ မိူဝ်ႈ ဝႃးဝၼ်းတီႈ 15 ၼႆႉ လုၵ်ႈႁဵၼ်းၸၢႆးၵေႃႉၼိုင်ႈ ဢႃယုမွၵ်ႈ 9 ၶူပ်ႇ ထုၵ်ႇၵူၼ်းတီႉၺွပ်းဢဝ်ပဵၼ်ယိူဝ်ႇ(ပြန်ပေးဆွဲ) သေ လႆႈ ဢဝ်ၵႂႃႇငိုၼ်းမၢၼ်ႈ ၵႂႃႇထုတ်ႇဢွၵ်ႇ 2 ႁဵင်သႅၼ်ပျႃး  ။