လုၵ်ႈႁဵၼ်းၶႄႇ တီႈဝဵင်းမူႇၸေႊ ၵေႃႉၼိုင်ႈ ၺႃးၵူၼ်းၸုမ်းၼိုင်ႈတီႉၺွပ်းလၢၵ်ႈၶိုၼ်ႈၵႃး (ပြန်ပေးဆွဲ) ၵႂႃႇသေ ႁႂ်ႈပေႃႈမႄႈလုၵ်ႈဢွၼ်ႇဢဝ်ငိုၼ်းၶႄႇ 5 သႅၼ်ယႂၼ် (မႅၼ်ႈငိုၼ်းမၢၼ်ႈ 2 ႁဵင်သႅၼ်) မႃးလႅၵ်ႈထုတ်ႇဢဝ်တူဝ်ၶိုၼ်း။
မိူဝ်ႈဝၼ်းတီႈ 15/10/2022 ယၢမ်းၵၢင်ၼႂ် လုၵ်ႈဢွၼ်ႇၸၢႆး ၵေႃႉၼိုင်ႈဢႃယု 9 ၶူပ်ႇ ၺႃးၵူၼ်း 4 ၵေႃႉၶီႇရူတ်ႉၵႃးမႃးပႂ်ႉလၢၵ်ႈၸၼ်ၶိုၼ်ႈရူတ်ႉ တီႉၺွပ်းပဵၼ်တူဝ်ယိူဝ်ႇၵႂႃႇ တီႈပွၵ်ႉၶရိတ်ႉယၢၼ်ႇ ဝဵင်းမူႇၸေႊ ၽွင်းလုၵ်ႈဢွၼ်ႇတိုၵ်ႉတေၵႂႃႇ ႁူင်းႁဵၼ်းၶႄႇ ။
ၵူၼ်းဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ ၸုမ်းၵူၼ်းၺွပ်းလုၵ်ႈဢွၼ်ႇၼၼ်ႉ ယွၼ်းငိုၼ်းၶႄႇ 5 သႅၼ်ယႂၼ် ( မႅၼ်ႈငိုၼ်းမၢၼ်ႈ 2,000 သႅၼ်ပျႃး) ။ လႆႈဢဝ်ငိုၼ်းၵႂႃႇလႅၵ်ႈ ဢဝ်တူဝ်လုၵ်ႈဢွၼ်ႇ ၼၼ်ႉ မႃးၶိုၼ်း။ ၶဝ်ပွႆႇမႃးၶိုၼ်း မိူဝ်ႈဝႃး ယၢမ်းဝၢႆး ဝၼ်း 4 မူင်း ၼႆၶႃႈဢေႃႈ။ ယၢမ်းလဵဝ် တီႈဝဵင်း မူႇၸေႊၼႆႉ မၼ်းဢမ်ႇမီးလွင်ႈ ႁူမ်ႇလူမ်ႈယဝ်ႉၶႃႈ”- ဝႃႈၼႆ။
ၸုမ်းၵူၼ်းႁၢႆႉ ဢၼ်မႃးတီႉၺွပ်းဢဝ်တူဝ် လုၵ်ႈဢွၼ်ႇၶႄႇၵႂႃႇၼၼ်ႉ ပဵၼ်ၽႂ်ၸုမ်းလႂ် ဢၼ်ဝႃႈၼၼ်ႉ ဢမ်ႇႁူႉ။
“ယၢမ်းလဵဝ် တီႈဝဵင်းမူႇၸေႊၼႆႉ မၼ်းဢမ်ႇမီးလွင်ႈႁူမ်ႇလူမ်ႈသင်ယဝ်ႉ။ ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၸုမ်းၵူၼ်းႁၢႆႉ ဢၼ် မႃးတီႉဢဝ် တူဝ်လုၵ်ႈဢွၼ်ႇၵႂႃႇၼႆႉၵေႃႈ ပဵၼ်ၸုမ်းလႂ်တႄႉ ဢမ်ႇႁူႉ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းၸမ် 2 ပီၼႆႉ ၼႂ်းဝဵင်းမူႇၸေႊၼႆႉ ဢမ်ႇမီးလွင်ႈႁူမ်ႇလူမ်ႈသင်၊ ၽူႈလၵ်ႉၸၵ်ႉၶုတ်ႈ ၵူၼ်းႁၢႆႉၵူၼ်းမိူၵ်ႇလိူင်ႇၼမ်ႁႅင်း၊ လွင်ႈႁၢင်ႈၵၢင်မၢၵ်ႇၼႂ်းၵၢင်ဝဵင်း၊ လွင်ႈပိုတ်းယိုဝ်း ၶႃႈႁႅမ်ၵၼ်တၢႆ မီးမႃးၶိူဝ်းယႂ်း။
 ၵႂႃႇသေ ႁႂ်ႈပေႃႈမႄႈလုၵ်ႈဢွၼ်ႇဢဝ်ငိုၼ်းၶႄႇ 5 သႅၼ်ယႂၼ် (မႅၼ်ႈငိုၼ်းမၢၼ်ႈ 2 ႁဵင်သႅၼ်) မႃးလႅၵ်ႈထုတ်ႇဢဝ်တူဝ်ၶိုၼ်း။){kind=link}