တႆးႁွတ်ႈ ၵဵင်းမႆႇ တေၸတ်းႁဵတ်း ပၢင်ယွင်ႈၵုင်ႇယေႃးမုၼ်ပၼ် ၸဝ်ႈၶူး Dr. ႁိူင်းသႅင် ပၺ်ႇၺႃႇၽေႃးၵႃႇ ၽိပႃႇလ (မိူင်း သူႈ) ၽူႈလႆႈႁပ်ႉၸုမ်ႈၶူး မေႃလူင် Ph.D တီႈမိူင်းၵွၵ်ႇ ၸိုင်ႈထႆး ။
ပေႃးထိုင်မႃး ဝၼ်းတီႈ 18/10/2022 ယၢမ်းႁူဝ်ၶမ်ႈ 5 မူင်း – 9 မူင်းၵၢင်ၶမ်ႈ ယူႇတီႈတၵ်ႉၵႃႇသတ်ႉထႃး တႆးႁွတ်ႈၵဵင်းမႆႇ တေ ႁူမ်ႈၵၼ် ၸတ်းႁဵတ်း ပၢင်ယွင်ႈၵုင်ႇယေႃးမုၼ်ပၼ် ၸဝ်ႈၶူး Dr. ႁိူင်းသႅင် ပၺ်ႇၺႃႇၽေႃးၵႃႇ ၽိပႃႇလ ဢၼ်ၽူႈလႆႈ ႁပ်ႉ ၸုမ်ႈၶူး မေႃလူင် Ph.D တီႈၸၼ်ႉၸွမ်မႁိတုလ်း မိူင်းၵွၵ်ႇ/ ၵုင်းထဵပ်ႈ ၸိုင်ႈထႆး ။ ပၢင်ယွင်ႈၵုင်ႇ ယေႃးမုၼ် ၼႆႉ တေၸတ်းႁဵတ်း တီႈဝတ်ႉၵူႈတဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႆႇ ။
ၸဝ်ႈၶူး Dr. ႁိူင်းသႅင် ပၺ်ႇၺႃႇၽေႃးၵႃႇ ၽိပႃႇလ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးထိုင်မႃး ဝၼ်းတီႈ 18 ၸိုင် တၵ်ႉၵႃႇ သတ်ႉထႃး ပီႈၼွင်ႉမိူင်းသူႈ တီႈၵဵင်းမႆႇ တေႁူမ်ႈၵၼ်သေ ၸတ်းႁဵတ်းပၢင်ယွင်ႈၵုင်ႇ ယေႃးမုၼ် ပၼ်ႁဝ်းၸဝ်ႈ တီႈဝတ်ႉၵူႇ တဝ်ႈ”- ဝႃႈၼႆ။
ၶပ်ႉမၢႆ ပၢင်ယွင်ႈၵုင်ႇယေႃးမုၼ် ၸဝ်ႈၶူး Dr. ႁိူင်းသႅင် တီႈဝတ်ႉၵူႇတဝ်ႈ ဝဵင်းၵဵင်းမႆႇၼၼ်ႉ ၼႂ်းဝၼ်းတီႈ 17 ယၢမ်းၵၢင်ၼႂ် 8:00 မူင်း – 10 မူင်းၵၢင်ၶိုၼ်း တေႁၢင်ႈႁႅၼ်းဢွင်ႈတီႈလႄႈ ၶဝ်ႈၽၵ်းတႃႇၵၢပ်ႈသွမ်း သင်ႇၶႃႇ ၸဝ်ႈ။ ဝၼ်းတီႈ 18 ယၢမ်း ၵၢင်ၼႂ် 10 မူင်း – 11 မူင်း ႁၢင်ႈႁႅၼ်းတႃႇပႂ်ႉႁပ်ႉတွၼ်ႈ ၸဝ်ႈၶူး Dr. ႁိူင်းသႅင် တီႈဝတ်ႉၵူႇတဝ်ႈ။ ယၢမ်းၵၢင်ဝၼ်း 12 မူင်း ထိုင် 7 မူင်း ႁူဝ်ၶမ်ႈ တေမီးၵၢတ်ႇၵုသူလ် ပၢင်လဵင်ႉလူ တၢင်းၵႃႈၼူၵ်ႉ/ တူဝ်း ႁပ်ႉႁူမ်ၸူမ်းတွၼ်ႈလႄႈ ယၢမ်းႁူဝ်ၶမ်ႈ 5 မူင်း – 9 မူင်းၵၢင်ၶမ်ႈ တေမီးပၢင်ႁေႃးတြႃး ၼႆယဝ်ႉ။
မိူဝ်ႈၼႆႉ ဝၼ်းတီႈ 14/10/2022 ယူႇတီႈ ၸၼ်ႉၸွမ် မႁိတုလ်း မိူင်းၵွၵ်ႇ/ ၵုင်းထဵပ်ႈ ၸိုင်ႈထႆး ၸတ်းႁဵတ်း ပၢင်မွပ်ႈၸုမ်ႈၶူး တီႈၸၼ်ႉ ၸွမ် ၽူႈလႆႈႁပ်ႉၸုမ်ႈၶူးမေႃလူင် Ph.D တင်းမူတ်းမီး 4 တူၼ်။ ၼႂ်းၼၼ်ႉ မိူင်းထႆး 2 တူၼ်၊ မိူင်းႁူမ်ႈတုမ် 1 တူၼ်လႄႈ ၵမ်ႇပေႃးတီးယိူဝ်း 1 တူၼ် ၼႆယဝ်ႉ။
လိူဝ်ၼၼ်ႉ ဝၼ်းတီႈ 15/10/2022 ဝၼ်းသဝ် သမ်ႉတၵ်ႉၵႃႇလႄႈ လုၼ်ႈၼွင်ႉပွင်ႈပၢႆ တေၸတ်းႁဵတ်းပၢင်ယေႃးမုၼ်ပၼ်ၸဝ်ႈၶူး တီႈၸၼ်ႉၸွမ် မႁိတုလ်း သႃလႃးယႃး မိူင်းၵွၵ်ႇ။ ပေႃးထိုင်မႃး ဝၼ်းတီႈ 16 ဝၼ်းဢႃးတိတ်ႉသမ်ႉ တၵ်ႉၵႃႇသတ်းထႃးတီႈမိူင်းၵွၵ်ႇ တေယေႃးမုၼ်ၸဝ်ႈ တီႈဝတ်ႉမႂ်ႇတႆး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ