မိူင်းတႆးပွတ်းၸၢၼ်း ၸႄႈတွၼ်ႈလွႆလႅမ် ၸႄႈဝဵင်းၵေးသီး တၢင်းပွတ်း ဢိူင်ႇမိူင်းၵၢဝ် ၼၼ်ႉ မီးၸဝ်ႈသၢင်ႇ ဢွၼ်ႇ တူၼ်ၼိုင်ႈ လၵ်ႉၵိၼ်ၼမ်ႉၼူမ်း ဢႅပ်ႇလႄႈ ၺႃး မုၼ်ၸၢင်း တူၼ်တူၺ်းလူၼၼ်ႉ ပေႃႉႁႅမ် ၊ ဝၢႆးၼၼ်ႉဢမ်ႇလၢႆဝၼ်း လႆႈလူႉလွၼ်ႇၵႂႃႇ။

ပိူင်ပဵၼ်တႄႉ မိူဝ်ႈဝၼ်းတီႈ 24 /8/2021  လိူၼ်ၵဝ်ႈလွင်ႈ 2 ၶမ်ႈ ယၢမ်းၵၢင်ၶမ်ႈ မွၵ်ႈ 8 မူင်း ၼၼ်ႉ ၸဝ်ႈသၢင်ႇ 17 တူၼ် လၵ်ႉၵိၼ် ၼမ်ႉၼူမ်းၵွင်ႇ၊ ၸဝ်ႈၸၢင်းတူၼ်ၼိုင်ႈသမ်ႉ ႁူႉႁၼ်လႄႈ ႁွင်ႉၼင်ႈ ၶဝ်ႈထႅဝ် ပေႃႉႁႅမ်။ ၼႂ်းၼၼ်ႉ ၸဝ်ႈသၢင်ႇဢွၼ်ႇ ဢႃယု 9 ၶူပ်ႇတူၼ်ၼိုင်ႈ ယူႇဝၢၼ်ႈမိူင်းၵၢဝ် လႆႈလူႉလွၼ်ႇၵႂႃႇ ဝၢႆးၺႃးပေႃႉႁႅမ် ။

ယွၼ်ႉၺႃးပေႃႉႁႅမ်လႄႈ တီႈတူဝ် ၸဝ်ႈသၢင်ႇဢွၼ်ႇၼၼ်ႉ ၸမ်ႉသွမ်ႇ တင်းတူဝ်၊ ႁူဝ်ၵေႃႈဝႃႈၶႆႈယူႇတိၵ်းတိၵ်း၊ ၶႃၶွၼ်ၼိုင်ႈၵေႃႈ မိူၼ်လိပ်ႈႁၢၼ်ႈသေ ဢဝ်ဢမ်ႇပႆလႆႈ၊ သမ်ႉပဵၼ် ၶၢဝ်းၼႂ်းဝႃႇသႃ လႄႈ ပေႃႈမႄႈၵေႃႈ ဢမ်ႇႁတ်း ဢဝ်ယူႇႁိူၼ်းယူတ်းယႃ။

ၵူၼ်းႁိူၼ်းၵူၼ်းယေး ၸဝ်ႈသၢင်ႇဢွၼ်ႇ ဢၼ်လူႉလွၼ်ႇၵႂႃႇၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ – “လၵ်ႉၵိၼ် ၼမ်ႉၼူမ်းၶူတ်ႇလႄႈ ၺႃးပေႃႉႁႅမ်ၶႃႈဝႃႇ။ ၸွမ်းတူဝ်ၸွမ်းၶိင်းပေႃးၵမ်ႇၸမ်ႉ ၵႂႃႇမူတ်းဢေႃႈ။ သမ်ႉဝႃႈႁူဝ်ၶႆႈ ႁူဝ်ၸဵပ်းၼႆလႄႈ ႁဝ်းၶႃႈၵေႃႈ လဵင်ႉပၼ်ယႃသေ ၸႂ်ႉမိူဝ်းယူႇ ၵျွင်းၶိုၼ်း၊ ႁဝ်းၶႃႈၵေႃႈ ဢမ်ႇထၢင်ႇတေပဵၼ်မႃးၸိူင်ႉၼႆၶႃႈ” – ဝႃႈၼႆ။

ၸဝ်ႈသၢင်ႇဢွၼ်ႇၼၼ်ႉ ယွၼ်ႉလၵ်ႉၵိၼ်ၼမ်ႉၼူမ်းလႄႈ လိူဝ်သေၺႃးတၢမ်ႇၶွမ်ႉ ယင်းၺႃးတၢမ်ႇ ၸႂ်ႉၵျွၵ်းဝႅၼ်ၼင်ႇၶဵတ်ႇထႅင်ႈ၊ ၺႃးပေႃႉ ဝၼ်းတီႈ 24 /8/2021။ ၽိူဝ်ႇထိုင်ဝၼ်းတီႈ 30/8/2021 ပေႃး ဢမ်ႇပႆလႆႈသေဢိတ်းယဝ်ႉ။

“ၸဝ်ႈသၢင်ႇဢွၼ်ႇၼႆႉ ၸဵမ်လႂ် ၵႆႉမီးလူမ်းတူၵ်းၸႂ်၊ ၶိုၼ်ႈ မိူၼ်ပဵၼ်ငၢၼ်း။ သမ်ႉၺႃးပေႃႉႁႅမ်ထႅင်ႈ။ မႃးႁိူၼ်းၵေႃႈ သမ်ႉဢမ်ႇလႆႈ ႁပ်ႉယူတ်းယႃ။ ထိုင်မႃး ဝၼ်းတီႈ 30 ၵေႃႈ မိူၼ်တၢႆတွၼ်ႈ တၢႆၽၢၵ်ႇ ။ သမ်ႉပေႃးဢမ်ႇပႆႇလႆႈယဝ်ႉ” – ၼႆ ၵူၼ်းႁိူၼ်းၵူၼ်းယေးမၼ်းၸဝ်ႈလၢတ်ႈ။

ၶၢဝ်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း၊ ႁူင်းႁဵၼ်း လူင်ပွင်ၸိုင်ႈၵေႃႈ ပိၵ်ႉႁပ်း၊ ၵၢၼ်မိူင်းၵေႃႈ ဢမ်ႇလီ ၵူဝ်ပၢႆးပၺ်ၺႃ ၶၢတ်ႇလႄႈ လႆႈသူင်ႇလုၵ်ႈလၢင်းၵႂႃႇဝႆႉတီႈၵျွင်းမုၼ်ၸဝ်ႈ – ႁႂ်ႈဝႆၽႃႈလိူင်သၢင်ႇၵၢၼ်း။

“ၸဝ်ႈသၢင်ႇဢွၼ်ႇႁဝ်း တိုၵ်ႉမီး 9 ၶူပ်ႇၵူၺ်းၶႃႈ။ ပိူၼ်ႈပိၵ်ႉၵျွင်းလႄႈ ဢဝ်ၵႂႃႇႁဵတ်းၸဝ်ႈသၢင်ႇ လႆႈပီပၢႆယဝ်ႉ။ ဢသၢၵ်ႇမွၵ်ႈၼႆႉ ၺႃးပေႃႉ ၺႃးႁႅမ် မွၵ်ႈၼႆႉတႄႉ ဢမ်ႇၵိုင်ႇလီပဵၼ်”- မႄႈဢွၵ်ႇ ၸဝ်ႈသၢင်ႇဢွၼ်ႇ ၼၼ်ႉလၢတ်ႈ။

ၸဝ်ႈၸၢင်းၼၼ်ႉ ယင်းလွၵ်ႇငိုတ်ႈ တဵင်ၵႂၢမ်းတေႃႇၸဝ်ႈသၢင်ႇဢွၼ်ႇၸိူဝ်းၺႃးပေႃႉ ၸိူဝ်းၼၼ်ႉ ႁၢမ်ႈမိူဝ်းမွၵ်ႇတီႈႁိူၼ်း၊ ပေႃးၽႂ်မိူဝ်းလၢတ်ႈတီႈႁိူၼ်း တေၺႃးၵိၼ်ၶွၼ်ႉထႅင်ႈ ၼႆ ဝႆႉလူးၵွၼ်ႇဝႃႈၼႆ။

မႄႈဢွၵ်ႇၸဝ်ႈၼၼ်ႉ သိုပ်ႇလၢတ်ႈထႅင်ႈဝႃႈ- “မိူဝ်ႈမၼ်းၸဝ်ႈ မႃးႁိူၼ်းၼၼ်ႉ တူဝ်ၸမ်ႉၵႂႃႇမူတ်း၊ ဢၢင်ႈတေထၢႆႇႁၢင်ႈဝႆႉ ၸဝ်ႈသၢင်ႇဢွၼ်ႇႁဝ်းဝႃႈ ယႃႇထၢႆႇ ပေႃးထၢႆႇ တေၺႃးၵိၼ်ၶွၼ်ႉထႅင်ႈၼႆလႄႈ ဢမ်ႇလႆႈထၢႆႇဝႆႉၶႃႈ။ ႁဵတ်းတေႃႇ ၸဝ်ႈသၢင်ႇ ဢွၼ်ႇ ၸိူင်ႉၼႆတႄႉ ဢမ်ႇလီၶႃႈ” – ၼင်ႇၼႆ။

ၸဝ်ႈသၢၼ်ႇဢွၼ်ႇၼႆႉ ၺႃးပေႃႉ ဝၼ်းတီႈ 24 /08/2021၊ ထိုင်မႃး ဝၼ်းတီႈ 30/08/2021 တိၼ်ဢမ်ႇႁူႉၼိူဝ်ႉ ဢမ်ႇပႆလႆႈ၊ ထိုင်မႃး ဝၼ်းတီႈ 3/9/2021 ၵေႃႈ လူႉလွၼ်ႇၵႂႃႇ။

ဢိင်ၼိူဝ်ၸဝ်ႈသၢင်ႇဢွၼ်ႇ လူႉလွၼ်ႇၵႂႃႇသေ ၸဝ်ႈၵွၼ်းဝတ်ႉ ၵေႃႈ ႁွင်ႉပၢင်ၵုမ် ၵူၼ်းဝၢၼ်ႈ မွၵ်ႇလၢတ်ႈဝႃႈ – ” ဢၼ်တၢႆၵႂႃႇၵေႃႈတၢႆၵႂႃႇယဝ်ႉ၊ ဢမ်ႇၶႂ်ႈႁႂ်ႈ ႁၼ်ထိုင်ဝႃႈ ၸဝ်ႈၸၢင်းၶဝ် ပေႃႉႁႅမ်လႄႈထိုင်တီႈတၢႆ။ ဢၼ်လၵ်ႉၵိၼ်ၼမ်ႉၼူမ်းသေ ၺႃးၶွၼ်ႉၼၼ်ႉၸႂ်ႈတေႉ။ ယွၼ်ႉၶႂ်ႈႁႂ်ႈ မီးသိၼ် မီးထမ်းၵူၺ်း။ ယွၼ်ႉၵူဝ် တၢင်းယၢမ်ႈ သိၼ်ထမ်းၶဝ်လူႉၵူၺ်း” – ၼႆ မၼ်းၸဝ်ႈတႅမ်ႈတၢင်ႇတီႈ ၾဵတ်ႉပုၶ် သုၼ်ႇတူဝ်ၼင်ႇၼႆ။

လွင်ႈၼႆႉ ၸဝ်ႈတူၼ်ၶူး ၵွၼ်းဝႆႉ လႆႈမွၵ်ႈ ၽူႈယႂ်ႇၵူၼ်းလူင်ဝၢၼ်ႈ၊ ၵေႃးပၵၵျွင်း၊ ၵူၼ်းဝၢၼ်ႈ လႆႈမွၵ်ႇႁွင်ႉထၢမ် ၵူၼ်းဝၢၼ်ႈ ဢၼ်ႁဵတ်းၸိူင်ႉၼႆ ၽိတ်းႁႃႉ ထုၵ်ႇႁႃႉ။ ၽႂ်ဢမ်ႇတွပ်ႇလႄႈ ထိုင်တီႈလႆႈထၢမ်ဢဝ်ၵမ်းၵေႃႉၵေႃႉ ၶိုၼ်းၼႆ ၵူၼ်းမိူင်းၵၢဝ် ၵေႃႉၼိုင်ႈ လၢတ်ႈၼင်ႇၼႆ။

“ၸဝ်ႈသြႃႇ ႁဝ်း ႁွင်ႉပၢင်ၵုမ်တီႈၵျွင်းဢေႃႈ။ ထၢမ်ဝႃႈ ဢၼ်ၸဝ်ႈၶဝ် ႁဵတ်းၼႆႉ ၽိတ်းႁႃႉထုၵ်ႇ ၽႂ်ၵေႃႈဢမ်ႇႁတ်းတွပ်ႇၶႃႈ။ ပေႃးၽႂ်ဢမ်ႇတွပ်ႇၵေႃႈ သမ်ႉထၢမ်ၵမ်းၵေႃႉၵေႃႉထႅင်ႈ၊ ၵမ်ၼမ်ၵေႃႈၵႃႈလႆႈတွပ်ႇဝႃႈ ထုၵ်ႇမႅၼ်ႈဢေႃႈ ၼႆဢေႃႈ၊ ၵမ်ႉမႃးဢမ်ႇလႆႈလူင်းၵျွင်းသေယဝ်ႉဢေႃႈ” – ၼႆ မႄႈၸဝ်ႈသၢင်ႇ မိူင်းၵၢဝ် ၵေႃႉၼိုင်ႈလၢတ်ႈၼင်ႇၼႆ။

ဢၼ်ၸဝ်ႈသၢင်ႇဢွၼ်ႇလူႉလွၼ်ႇၵႂႃႇၼၼ်ႉ ဢမ်ႇၸႂ်ႈၵွပ်ႈမုၼ်ၸၢင်းပေႃႉႁႅမ်၊ ပဵၼ်ၵွပ်ႈ ၽီဝၢၼ်ႈ ၽီမိူင်း ဢမ်ႇႁၼ်လီ ဢၼ်လၵ်ႉၵိၼ်ၼမ်ႉၼူမ်းလႄႈ ပၼ်တၢမ်ႇ– ၼႆၵေႃႈ ၶၢဝ်ႇႁူင်လိုဝ်းဢွၵ်ႇဝႆႉ။

ၵူၼ်းမိူင်းၵၢဝ် တႄႉဝႃႈ ”ၵႃႈၵွၼ်ႇပူၼ်ႉမႃး တီႈဝၢၼ်ႈႁဝ်း ဢမ်ႇတွၼ်ႉယုမ်ႇၽီ” – ဝႃႈၼႆၵေႃႈမီး။

“ဢၼ်ပေႃႉႁႅမ်ၸဝ်ႈသၢင်ႇဢွၼ်ႇၼႆႉ ပဵၼ်ဢၼ်တႄႉဢေႃႈ။ ႁူဝ်ယွႆႈတႄႉ ဢမ်ႇလႆႈႁူႉလီလီ။ ဝၢႆးပေႃႉႁႅမ် ယဝ်ႉ ငိၼ်းဝႃႈ ၸဝ်ႈသၢင်ႇဢွၼ်ႇၼၼ်ႉ ယင်းၵႂႃႇ ဢႅဝ်ႇလဵၼ်ႈယူႇဝႃႈၼႆ”- ၸဝ်ႈတူၼ်ၼိုင်ႈ တီႈၵျွင်းၶမ်း ၵေးသီးလၢတ်ႈ။

သင်ႇသွၼ် ၸဝ်ႈသၢင်ႇဢွၼ်ႇသေ ထိုင်တီႈလူႉတၢႆ ဢၼ်ဝႃႈၼၼ်ႉ ဢမ်ႇထုၵ်ႇလီပဵၼ်၊ ဢမ်ႇထုၵ်ႇမႅၼ်ႈ မၢႆမီႈ ထႅင်ႈ လႄႈ တၵ်းတေလႆႈ ၵူတ်ႇထတ်း ပိူင်ပဵၼ်ၼႆႉ ထိုင်ႁၢၵ်ႈထိုင်တေႃ ယဝ်ႉၼႆ ႁူဝ်ပဝ်ႈ သင်ၶႃႇၸဝ်ႈ မိူင်းတႆး ပွတ်းဢွၵ်ႇၶူင်း ၸဝ်ႈတူၼ်ၶူးလူင် ၺႃၼသီရိ ပွၼ်ႈလၢတ်ႈၼင်ႇၼႆ။

“ၸဝ်ႈႁဝ်းၶဝ်တိုၵ်ႉထတ်းတူၺ်းပိူင်ပဵၼ်မၼ်းယူႇ။ သင်ႇသွၼ်ၵၼ် ထိုင်တီႈ လူႉတၢႆ တႄႉ ဢမ်ႇထုၵ်ႇလီပဵၼ်။ ဢမ်ႇမႅၼ်ႈၸွမ်း မၢႆမီႈပၵ်းပိူင်ထႅင်ႈ။ ပေႃးတၢႆယွၼ်ႉတၢင်းပဵၼ် တၢင်ႇမဵဝ်းတႄႉ  ပဵၼ်ထႅင်ႈ လိူင်ႈၼိုင်ႈၵႂႃႈ။ တေႃႈလဵဝ်ၼႆႉ ယွၼ်ႉႁႅမ်သေတၢႆႁႃႉ၊ တၢႆယွၼ်ႉတၢင်ႇပိူင်ႁႃႉၼႆ ၸဝ်ႈႁဝ်းၶဝ် တိုၵ်ႉထတ်းတူၺ်းယူႇ” ဝႃႈၼႆ။

ၵဵဝ်ႇၵပ်းပၼ်ႁႃလွင်ႈၼႆႉ ၸဝ်ႈတူၼ်ၶူး ပူင်သွၼ်လိၵ်ႈလၢႆးတီႈဝတ်ႉၸိုဝ်ႈသဵင်ယႂ်ႇထုင်ႉ ဝဵင်းပၢင်လူင်  တူၼ်ႈ႞ၵေႃႈလၢတ်ႈၽူႈတွႆႇႁွၵ်ႈဝႃႈ – “ပိူင်ပဵၼ်ၼႆႉ ပႆႇႁူႉႁူဝ်ယွႆႈမၼ်း၊ ၼိူဝ်ၼႅင်ႈၶၢဝ်ႇ ဢိၼ်ႊထိူဝ်ႊၼႅတ်ႉတႄႉ ဢမ်ႇလီတၢင်ႇ။ မၼ်းဢမ်ႇလီ တႃႇ သင်ၶႃႇၸဝ်ႈတၢင်းလၢႆ။ ပဵၼ်ၵူၼ်း ပုထုၸၼ် မိူၼ်ၵၼ်ၵူၺ်းလႄႈ မၢင်ပွၵ်ႈၵေႃႈ ၸၢင်ႈမီးတေႃးသယူႇ။ ဢၼ်ႁၼ် ၸိူင်ႉၼႆၼႆႉ ႁဝ်းၵေႃႈ ၸႂ်ဢမ်ႇလီ” ဝႃႈၼႆ။

ၸဝ်ႈၸၢင်း ဢၼ် ပေႃႉၸဝ်ႈသၢင်ႇဢွၼ်ႇၼၼ်ႉ ၸိုဝ်ႈၸဝ်ႈ ဢိင်ႇတေႃး၊ ပဵၼ်ၵူၼ်းဝၢၼ်ႈ မၢၵ်ႇႁူႈ ဢိူင်ႇမိူင်းၵၢဝ် ၸႄႈဝဵင်းၵေးသီး၊ ယၢမ်းလဵဝ်ၵေႃႈ တိုၵ်ႉမီးယူႇတီႈ ဝိႁၢၼ် မိူင်းၵၢဝ် လႆႈႁူႉၼင်ႇၼႆ။