လုၵ်ႈႁဵၼ်းယိင်း တီႈႁူင်းႁဵၼ်းပရႁိတ ဢဵၼ်ႁႅင်းမႂ်ႇ ဝဵင်းႁူဝ်ပူင်း ပဵၼ်ၶႅၼ်ႊသိူဝ်ႊလိူတ်ႊသေ လူဝ်ႇတၢင်းၸွႆႈထႅမ် ၵႃႈယူတ်းယႃ ႁၢဝ်ႈႁႅင်း။

ၼၢင်းၶမ်းပူး လုၵ်ႈႁဵၼ်းၸၼ်ႉ 5 တီႈႁူင်းႁဵၼ်းပရႁိတ ဢဵၼ်ႁႅင်းမႂ်ႇ ဝၢၼ်ႈၽႃလၢႆး ၸႄႈဝဵင်းႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ပဵၼ်ဝႆႉ တၢင်းပဵၼ်ၵႅၼ်ႊသိူဝ်ႊလိူတ်ႈသေ လႆႈယူတ်းယႃတူဝ်ဝႆႉတီႈႁူင်းယႃလူင်တီႈႁူင်းယႃလုၵ်ႈဢွၼ်ႇ တႃႈၵုင်ႈ မီးၶၢဝ်းတၢင်း 8 ဝၼ် ယၢမ်းလဵဝ် လူဝ်ႇတၢင်းၸွႆႈထႅမ် ၵႃႈယူတ်းယႃ ယွၼ်ႉတေလႆႈလုတ်ႇဢဝ် ဢွၵ်းလုပ်ႇ/ မၼ်း လုပ်ႇ (ရိုးတွင်းချဉ်ဆီ) သူင်ႇၵူတ်ႇထတ်း တီႈမိူင်းဢိၼ်ႊတီႊယိူဝ်ႊ တေသဵင်ႈငိုၼ်းၼပ်ႉႁူဝ်သႅၼ်ပျႃး ၼႆယဝ်ႉ။

ၸဝ်ႈၶူး ၶၼ်ႇတီႇၸႃႇရ ၽူႈၵွၼ်းႁူင်းႁဵၼ်းပရႁိတ ဢဵၼ်ႁႅင်းမႂ်ႇ လၢတ်ႈတီႈၽူႈတွႆႇ ႁွၵ်ႈဝႃႈ – “လုၵ်ႈႁဵၼ်းယိင်း ၼၢင်းၶမ်းပူး ပဵၼ်ၶႅၼ်ႊသိူဝ်ႊလိူတ်ႊသေ လႆႈၶိုၼ်ႈႁူင်းယႃဝႆႉတီႈတႃႈၵုင်ႈ မီး 8 ဝၼ်းပႃးမိူဝ်ႈၼႆႉယဝ်ႉ။ မေႃယႃၶဝ် လုတ်ႇဢဝ် ဢွၵ်းလုပ်ႇ/ မၼ်းလုပ်ႇ မၼ်းၼၢင်းသေ တေသူင်ႇၵူတ်ႇထတ်းတီႈမိူင်းဢိၼ်ႊတီႊယိူဝ်ႊ တေသဵင်ႈငိုၼ်း ၵႃႈသူင်ႇၵူတ်ႇထတ်း  570,000 ပျႃး။ ယၢမ်းလဵဝ် ယၢပ်ႇၽိုတ်ႇဝႆႉ ၵႃႈယူတ်းယႃမၼ်းၼၢင်း”- ဝႃႈၼႆ။

ၼၢင်းၶမ်းပူး လုၵ်ႈႁဵၼ်းၸၼ်ႉ 5 ၼႆႉ လႆႈယူတ်းယႃတူဝ်ဝႆႉတီႈ ႁူင်းယႃ လုၵ်ႈဢွၼ်ႇ တီႈဝဵင်းတႃႈၵုင်ႈသေ လႆႈသဵင်ႈၵႃႈၸႂ်ႉ ၸၢႆႇ တေႃႇဝၼ်း ဢမ်ႇယွမ်း 30,000 ပျႃး ဝႃႈၼႆ။

“တေႃႇဝၼ်းၼႆႉ လႆႈသဵင်ႈၵႃႈယူတ်းယႃ ဢမ်ႇယွမ်း 3 မိုၼ်ႇပျႃး။ ၼႂ်း 3 မိုၼ်ႇပျႃးၼၼ်ႉ ၵႃႈယူႇၵိၼ်တႃႇၵူၼ်းပႂ်ႉ လုမ်းလႃး။ ယဝ်ႉၵေႃႈ ၵႃႈယူတ်းယႃ မၼ်းၼၢင်း ၼိုင်ႈဝၼ်းလၢႆ လႆႈတိူမ်းလိူတ်ႈ 4 တဝ်ႈ။ ဢိင်ၼိူဝ် လွင်ႈမၼ်းၼၢင်း ပဵၼ် တၢင်းပဵၼ်ၼႆႉမႃး တႄႇဢဝ်တူၼ်ႈတီး ထိုင်တႃႈၵုင်ႈၼႆႉ လႆႈသဵင်ႈၵႃႈယူတ်းယႃမွၵ်ႈ 13 သႅၼ်ပျႃး။ ပဵၼ်ႁိုဝ်ၵေႃႈယဝ်ႉ ႁဝ်း ၸဝ်ႈ တေဢမ်ႇပွႆႈၽႃႈ တေၶတ်းၸႂ်ယႃႁႂ်ႈထိုင်တီႈ”- ၸဝ်ႈၶူးၶၼ်ႇတီႇၸႃႇရ သိုပ်ႇလၢတ်ႈၼႄၼင်ႇၼႆ။

ႁူင်းႁဵၼ်းပရႁိတ ဢဵၼ်ႁႅင်းမႂ်ႇ ဝၢၼ်ႈၽႃလၢႆး ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်းၼႆႉ တႄႇပိုတ်ႇသွၼ်မႃး မိူဝ်ႈပီ 2018 ။ပီၼႆႉ မီးလုၵ်ႈႁဵၼ်း/ မေႃသွၼ် ၼႂ်းမိူင်းတႆးပွတ်းၸၢၼ်း လၢႆထုင်ႉ မႃးႁဵၼ်း မီး 400 ပၢႆ ။