ပီၼႆႉ တၢင်းပဵၼ်ၶူဝ်ႊဝိတ်ႉၵေႃႈဢမ်ႇပေႃးမီးလွင်ႈလၢမ်းၽႄႈၸူးၵၼ်ယဝ်ႉလႄႈ ၵူၼ်းမိူင်းတႆး ဢွၼ်ၵၼ်ၶိုၼ်ႈၵျွင်းလွင်းမွၵ်ႇ လူႇတၢၼ်းၵိုၼ်းၶွၼ်ႈလီ ၼႂ်းဝၼ်းဢွၵ်ႇဝႃႇသႃ ။
ၵူၼ်းၼႂ်းဝဵင်းပၢင်လူင် ၸိုင်ႈတႆးပွတ်းၸၢၼ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ- “ၸႂ်ႈယဝ်ႉ ပီၼႆႉတႄႉ ၶႅၼ်းသေပီဢွၼ်ပီၵၢႆယူႇဢေႃႈ ၸၢင်ႈတူင်ႉၸၢင်ႈၼိုင်ႈမႃးၽွင်ႈ ။ ၶွင်မိူဝ်ႈပူၼ်ႉမႃး သွင်ပီၼႆႉတႄႉ တေဢွၵ်ႇတၢင်းၼွၵ်ႇၵူၺ်းၵေႃႈ လႆႈမႆႈၸႂ်တႃႇပၢႆးယူႇလီၼႃႇၼေႃႈ။ ပေႃးဢွၵ်ႇတၢင်းၼွၵ်ႈယဝ်ႉ ပေႃးလႄႇလႆႈ သုၵ်ႈတိၼ်သုၵ်ႈမိုဝ်းယူႇတႃႇသေႇယဝ်ႉ ။ ပီၼႆႉတႄႉ ၵူၼ်းပူၵ်ႉသူပ်းပူၵ်ႉပၢၵ်ႇၵေႃႈ ဢမ်ႇပေႃးမီးႁေ၊ တၢင်းပဵၼ်ၵေႃႈ ဢမ်ႇပေႃးၵူဝ်ၵၼ်ႁၢဝ်ႈႁႅင်းမိူၼ်မိူဝ်ႈတႄႇမၼ်းယဝ်ႉၶႃႈ ၊ ၾိင်ႈငႄႈၾိင်ႈထုင်းဢွၼ်ႇဢၼ်ယၢမ်ႈမီးမႃးၸိူဝ်းၼၼ်ႉၵေႃႈ ၸၢင်ႈႁဵတ်းၸၢင်ႈသၢင်ႈမႃးၶိုၼ်းၽွင်ႈၵႃႈပီၼႆႉ“ဝႃႈၼႆ။
ယွၼ်ႉပၼ်ႁႃ ၵၢၼ်မိူင်းၵေႃႈပိူင်ၼိုင်ႈ ယွၼ်ႉတၢင်းပဵၼ်ၸိူဝ်းၼၼ်ႉၵေႃႈပိူင်ၼိုင်ႈသေ ၵၢၼ်ၾိင်ႈငႄႈၾိင်ႈထုင်းဢၼ်ယၢမ်ႈႁဵတ်းမႃး ပၢၼ်သိုပ်ႇပၢၼ်ပီသိုပ်ႇပီၸိူဝ်းၼၼ်ႉၵေႃႈ ဢမ်ႇထၢင်ႇႁၢင်ႇ မီးတိုဝ်ႉတၢင်းလႆႈႁဵတ်း။
ၵူၼ်းၼုမ်ႇသႅၼ်းႁုၼ်ႈမႂ်ႇတၢင်းထုင်ႉလၢႆးၶႃႈၵေႃႉၼိုင်ႈလၢတ်ႈၼႄထႅင်ႈဝႃႈ_ “ၵမ်ႉပၼ်ႁႃတၢင်းပဵၼ် ၵမ်ႉပၼ်ႁႃၵၢၼ်မိူင်းဝႃႇ ႁဝ်းဢမ်ႇၸၢင်ႈႁၼ်ၸၢင်ႈၺႃး မိူဝ်ႈၵျေႃႇမၼ်းသေပွၵ်ႈယဝ်ႉဝႃႈ ၵူၼ်းသႅၼ်းႁဝ်းသမ်ႉၵူဝ်တႂ်ႈၵူဝ်ၼိူဝ်သေ ၵုမ်ႇသွင်ႉမိူင်းထႆးၵွႆး ပေႃးမီးလွင်ႈသုၵ်ႉသၵ်ႉမိူၼ်ၼႆၵႂႃႇ တိၵ်းတိၵ်းတႄႉ ၾိင်ႈထုင်းႁဝ်းဢၼ်ယၢမ်ႈမီးမႃးၼႂ်းမိူင်းတႆးႁဝ်းၼႆႉၵေႃႈ တေမေႃႁၢႆပႅတ်ႈယဝ်ႉ” ဝႃႈၼႆ။
ၵူၼ်းမိူင်းတႆးၼႆႉ ၵမ်ႈၼမ် တေယင်ႉလိုဝ်ၼႃႈၵၢၼ်တႃငၢၼ်းသေ ႁႃၵိၼ်ႁႃလူႇၼႂ်းဝၼ်း ၶဝ်ႈဝႃႇဢွၵ်ႇဝႃႇပဵၼ်ယႂ်ႇ တေမီး ၶိုၼ်ႈၵျွင်းလွင်းမွၵ်ႇလႂ် လႄႇႁႃသူႇၸႂ်းၵၼ်ႇတေႃးၵူၼ်းထဝ်ႈၵူၼ်းၵႄႇလႂ်ၸိူဝ်းၼႆႉ။ၸွမ်းၼင်ႇၾိင်ႈထုင်းတႆးမီး ပေႃးၼႂ်းဝၼ်းဢွၵ်ႇဝႃႇဢွၵ်ႇသႃ တေလႆႈႁၼ်တၢင်းႁၢင်ႈလီၵႃႈၼူၵ်ႉၵႃႈတူဝ်းၸိူဝ်းၼႆႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ