ၵေႃလိၵ်ႈလၢႆး လႄႈၾိင်ႈငႄႈတႆးပၢင်လူင် ၸတ်းႁဵတ်း ပွႆးလူင်းပၢင်သွၼ်လိၵ်ႈထႆး

ၵေႃလိၵ်ႈလၢႆးလႄႈၾိင်ႈငႄႈတႆးၸႄႈဝဵင်းပၢင်လူင် ပိုတ်ႇသွၼ်ႁဵၼ်းပိုၼ်ႉထၢၼ်လိၵ်ႈထႆးပၼ်ၵူၼ်းၼုမ်ႇ ယဝ်ႉတူဝ်ႈလီငၢမ်း  ၸတ်းႁဵတ်းပွႆးလူင်းပၢင်သွၼ်  ၵႂႃႇမိူဝ်ႈဝၼ်းသဝ်ပူၼ်ႉမႃးၼႆႉ။

ပွႆးလူင်းပၢင်သွၼ်ၼႆႉၸတ်းႁဵတ်းၼႂ်း ဝၼ်းတီႈ 8/10/2022။  တီႈပွႆးလူင်းပၢင်သွၼ်ၼႆႉ မီးလုၵ်ႈႁဵၼ်း၊ မေႃသွၼ်၊ ၽူႈယႂ်ႇၵူၼ်းလူင် လႄႈ ပေႃႈမႄႈပီႈၼွင်ႉၵူၼ်းမိူင်း ၶဝ်ႈႁူမ်ႈပၼ်ႁႅင်းတင်းၼမ်။

ၵႅမ်ႁူဝ်ပဝ်ႈၵေႃလိၵ်ႈလၢႆး ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ- “ဢဵၼ်းဢၢၼ်းဢၼ်ပိုတ်ႇပၢင်သွၼ်လိၵ်ႈထႆး ၼႆႉတေႉ ပိူင်လူင်မၼ်းၶႂ်ႈႁႂ်ႈၵူၼ်းၼုမ်ႇ မေႃလိၵ်ႈထႆးၵႂၢမ်းထႆး ယဝ်ႉၵေႃႈ ပိုၼ်ႉႁူႈပၢႆးႁၼ်လၢႆလၢႆလွင်ႈလႄႈ တႃႇဢွၼ်ႁူဝ်ၵႂႃႇလႆႈမိူဝ်းၼႃးၼၼ်ႉၶႃႈၼႃႇၼႆ။ ၵူၼ်းမႃးၶိုၼ်ႈပၢင်သွၼ် ၼႆႉတေႉတေ မီးလုၵ်ႈႁဵၼ်း ဢႃႇယု 15 -35 ပီၼႆႉၶႃႈဢေႃႈ။  ပဵၼ်ၵူၼ်းၼုမ်ႇတၢင်း မိူင်းသူႈ၊မိူင်းၼွင်၊မိူင်းၵိုင်၊ လၢႆးၶႃႈလႄႈ ၵူၼ်းၼုမ်ႇၼႂ်းပၢင်လူင်ၸိူဝ်းၼႆႉၶႃႈဢေႃႈ” ဝႃႈၼႆ။

ပၢင်သွၼ်ၵမ်းၼႆႉ မီးမေႃသွၼ်ၸဝ်ႈၽူႈမီးၼမ်ႉၸႂ် မႃးပူင်သွၼ်ပၼ်  ၾၢႆႇတၢင်းမူႇၸုမ်း ဢမ်ႇမီးလွင်ႈမၵ်းၶၢၼ်း ၵႃႈၶၼ်လွင်ႈၵၢၼ်ႁဵၼ်း။ ၵူၺ်းၵႃႈ ၸိူဝ်းပဵၼ်လုၵ်ႈႁဵၼ်းမီးၼမ်ႉၸႂ် ၶႂ်ႈၵမ်ႉၸွႆႈၵႃႈၸေႈၵႃႈၼမ်ႉမိုၵ်ႉ ၶိူင်ႈၸႂ်ႉၶူဝ်းသွႆ ၼႂ်းၵၢၼ်ႁဵၼ်းၼႆသေ  မႃးလူႇတၢၼ်းၸွႆႈထႅမ် ၵေႃႉဢိတ်းၵေႃႉဢွတ်း ၵေႃႈမီးယူႇၽွင်ႈဝႃႈၼႆ။

ၸၢႆးၵွၼ်ၶိူဝ်းလႅင်း လုၵ်ႈႁဵၼ်းပၢင်သွၼ်လိၵ်ႈထႆးၵေႃႉၼိုင်ႈ လၢတ်ႈဝႃႈ “ၵူၼ်းမႃးႁဵၼ်းတႄႉၵေႃႈမိူဝ်ႈတေႇမၼ်းမီးယူႇ 100 ပၢႆၶႃႈ။  မိူဝ်ႈလဵဝ်သမ်ႉ ငဝ်းလၢႆးဝၢၼ်ႈမိူင်းၵေႃႈဢမ်ႇၼိမ်သဝ်း သေ ၵမ်ႈၽွင်ႈသမ်ႉၵၢၼ်ၼမ် ၵမ်ႈၽွင်ႈသမ်ႉၵႂႃႇမိူင်းထႆးပႅတ်ႈ။  ႁဵတ်းၵႂႃႇႁဵတ်းၶိုၼ်းမီး 80 ပၢႆၶႃႈဢေႃႈ။  ၵျေႃႇၶႃႈဢေႃႈ ယွၼ်ႉသင်လႄႈ ၼႆ လႆႈႁၼ်ၵူၼ်းၼုမ်ႇႁဝ်းၶႃႈမႃးၶွၼ်ႈၵၼ်သေ မိုတ်ႈၵိုဝ်းၸမ်ၸႂ်ၵၼ်ၵႂႃႇ ႁူႉၸၵ်း ၵၼ်ၵႂႃႇၸိူင်ႉၼၼ်ၼႆ မိူဝ်းၼႃႈမႃးၵေႃႈမၼ်းဢမ်ႇယၢပ်ႇယဝ်ႉၶႃႈၼႃႇၼေႃႈ “ ဝႃႈၼႆ။

ပၢင်သွၼ်ၼႆႉ တႄႇမႃးမိူဝ်ႈဝၼ်းတီႈ 22/8/2022 တေႃႇထိုင် ဝၼ်းတီႈ 7/10/2022 တွပ်ႇလိၵ်ႈထတ်းလိၵ်ႈယဝ်ႉတူဝ်ႈ ၽူႈမီးပုၼ်ႈၽွၼ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆးပၢင်လူင်ၸင်ႇဢွၼ်ၸတ်းပွႆးလူင်းပၢင်သွၼ် မွပ်ႈဝႂ်ယွင်ႈယေႃးမေႃသွၼ်၊လုၵ်ႈႁဵၼ်း လႄႈၸဝ်ႈတႃႇၼ ၽိတ်ႈမွၵ်ႇ ၽူႈယႂ်ႇၵူၼ်းလူင် ၼႂ်းပွၵ်ႉၼႂ်းဢိူင်ႇ မႃးၶဝ်ႈႁူမ်ႈ။

ၼႂ်းပၢင်သွၼ်ၼႆႉ ၼွၵ်ႈလိူဝ်လိၵ်ႈထႆးယဝ်ႉ ယင်းမီးပၢင်သွၼ်လၢႆလၢႆဢၼ် တႃႇပူၵ်းပွင် ၸၢတ်ႈပၢၼ်ၵူၼ်းၼုမ်ႇ  ။