ၶၢဝ်းတၢင်း 10 လိူၼ် ၼႂ်းပီၼႆႉၼႆႉ တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၵႆႉမီးလွင်ႈငွႆးယိုဝ်း ၶႃႈႁႅမ်ၵၼ်တၢႆ ဢမ်ႇယွမ်း 10 ၵေႃႉ ၸူဝ်ႈသိုၵ်းမၢၼ်ႈယိုတ်းမိူင်းမႃးၼႆႉဢမ်ႇမီးလွင်ႈႁူမ်ႇလူမ်ႈသင်။

တႄႇဢဝ် လိူၼ်ၵျႅၼ်ႊၼိဝ်ႊရီႊမႃး တေႃႇထိုင်ယၢမ်းလဵဝ်ၼႆႉ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မီးၸုမ်းဢမ်ႇႁူႉၾၢႆႇ ပႂ်ႉငွႆးယိုဝ်း ဢဝ်ၵၼ်တၢႆမႃး မွၵ်ႈ 10 ၵေႃႉယဝ်ႉ။ မိူဝ်ႈဝႃး ဝၼ်းတီႈ 6/10/2022 ယၢမ်းႁူဝ်ၶမ်ႈ ၽူႈ တတ်းသိၼ်တြႃး ထုၵ်ႇယိုဝ်းတၢႆထင်တီႈ ထႅင်ႈၵေႃႉၼိုင်ႈ တီႈပွၵ်ႉႁူဝ်မုၼ်ႇ။

ၵူၼ်းပိုၼ်ႉတီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈမူႇၸေႊၼႆႉ မၼ်းဢမ်ႇမီးလွင်ႈလူမ်ႇႁူမ်ႈသင်ယဝ်ႉ တင်ႈ တႄႇ သိုၵ်းမၢၼ်ႈ ယိုတ်းဢႃႇၼႃႇမႃးၼႆႉ ယိုင်ႈၶႅၼ်းႁၢင်ႈႁၢႆႉယဝ်ႉ။ လွင်ႈပိုတ်းယိုဝ်း ၶႃႈႁႅမ်ၵၼ်တၢႆ ၸိူင်ႉၼႆၼႆႉ ၶႂ်ႈဝႃႈ မီးၵူႈ လိူၼ်။ တႄႇဢဝ် ႁူဝ်ပီၼႆႉမႃး တေႃႇထိုင်ယၢမ်းလဵဝ်”- ဝႃႈၼႆ။

ဢိင်ၼိူဝ် လွင်ႈငွႆးယိုဝ်း ၶႃႈႁႅမ်ၵၼ်တၢႆ ၸိူင်ႉၼႆၼႆႉ မိူဝ်ႈဝႃး ဝၼ်းတီႈ 6/10/2022 ယၢမ်းႁူဝ်ၶမ်ႈ 5 မူင်းပၢႆ ဢူးရႃႇၸႃႇမိၼ်း ၸူဝ်း ဢႃယု 40 ၽူႈတတ်းသိၼ်တြႃး ၸႄႈဝဵင်းမူႇၸေႊ ၺႃးၵူၼ်းဢမ်ႇႁူႉၾၢႆႇ ယိုဝ်းတၢႆ တီႈပွၵ်ႉႁူဝ်မုၼ်ႇ။

ဝၼ်းတီႈ 13/9/2022 ယၢမ်းၵၢင်ဝၼ်း 12:40 မူင်းပၢႆ မီးၵူၼ်းဢမ်ႇႁူႉၾၢႆႇ ၶဝ်ႈယိုဝ်းၵူၼ်းပႂ်ႉယၢမ်း ဢဝ်ႁူမ်ႇလူမ်ႈ တီႈ ယေးငိုၼ်း (ၵမ်ႇပေႃးၸမၢႆ – 3) ဢၼ်မီးၼႂ်းဝင်းတႃႈရူတ်ႉၵႃး တဵင်းတၢၼ်းၶျီႇ တၢင်းၾၢႆႇဢွၵ်ႇဝဵင်း ပွၵ်ႉၼိူဝ် ဝဵင်းမူႇၸေႊ လူႉတၢႆ 3 ၵေႃႉ၊ မၢတ်ႇ 1 ၵေႃႉ။

ဝၼ်းတီႈ 9/3/2022 ယၢမ်းၵၢင်ဝၼ်း ၽူႈၸၢႆးၵေႃႉၼိုင်ႈ ၸိုဝ်ႈႁွင်ႉ ဝုၼ်ႇၼလိၼ်း ပဵၼ်ၵူၼ်းဢႅဝ်ႇႁႃၶၢႆၶူဝ်း ၺႃးၵူၼ်း ဢမ်ႇ ႁူႉၾၢႆႇ ယိုဝ်းတၢႆ တီႈၼႂ်းဝၢၼ်ႈၼွင်သႅင် ဢိူင်ႇၸေႊလၢၼ်ႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ဝၼ်းတီႈ 8/3/2022 ၼၼ်ႉၵေႃႈ မီးၵူၼ်းဢမ်ႇႁူႉၾၢႆႇ ယိုဝ်းၵွင်ႈသႂ်ႇ ၼႂ်းႁိူၼ်းပၢင်မႃႇသႃႇ (ႁိူၼ်းပျီႇတူႉၸိတ်ႉ) လင်ၼိုင်ႈ တီႈပွၵ်ႉႁွင်ႇ ၸႄႈဝဵင်းမူႇၸေႊ ပျီႇတူႉၸိတ်ႉ ဢၼ်ဢဝ်ႁူမ်ႇလူမ်ႈပႂ်ႉတီႈႁိူၼ်းၼၼ်ႉ လူႉတၢႆ 2 ၵေႃႉ၊ မၢတ်ႇၸဵပ်း 2 ၵေႃႉ။

ဝၼ်းတီႈ 31/1/2022 ယၢမ်းၵၢင်ဝၼ်း 12:42 မူင်း ပျီႇတူႉၸိတ်ႉၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ယိုဝ်းတၢႆၶမ် ၼႂ်းၵႃး ၸဝ်ႈၵဝ်ႇ ၾၢႆႇႁွင်ႇၵၢတ်ႇ မၢႆ 1 ဝဵင်းမူႇၸေႊ။

ဝၼ်းတီႈ 9/8/2022 ယၢမ်းၵၢင်ၶမ်ႈ 7:30 မူင်းပၢႆ ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း မဵဝ်ႉမပျီႇတူႉၸိတ်ႉလႄႈ ပလိၵ်ႈ မၢၼ်ႈ ယိုဝ်းၸၢႆးဢၢႆႈၽွႆႇ တီႈႁူဝ်မၢၼ်ႈတိုၼ်းလူင် သဵၼ်ႈတၢင်းလူင် မူႇၸေႊ – ၼမ်ႉၶမ်း ၼႂ်းၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ လူႉတၢႆ။  

ဝၼ်းတီႈ 1/8/2022 ယၢမ်းၵၢင်ဝၼ်း 11 မူင်းပၢႆ မၢၵ်ႇတႅၵ်ႇ တီႈသီႇယႅၵ်ႈၾႆးလႅင် ၵၢင်ဝဵင်းမူႇၸေႊ ၸိုင်ႈတႆး ပွတ်းႁွင်ႇ ၼၼ်ႉ တိူဝ်ႉၺႃးပႃးဢွၼ်ႇယိင်းဢႃယု 20 ပၢႆ ၵူၼ်းမိူင်းမူႇၸေႊၵေႃႉၼိုင်ႈ လူႉတၢႆ။

မိူဝ်ႈဝၼ်းတီႈ 4/5/2022 ယၢမ်းႁူဝ်ၶမ်ႈ 5 မူင်းပၢႆ ၽွင်းၵႃးၵူၼ်းၼုမ်ႇ ၸမ်ႁွတ်ႈတီႈဝၢၼ်ႈမေႃႈတွင်း ဢိူင်ႇၼႃးမူၼ်းၼၼ်ႉ သိုၵ်းတဢၢင်း TNLA  ငွႆးယိုဝ်းမၢၵ်ႇလူင်သႂ်ႇ။ ၵႃးၵူၼ်းၼုမ်ႇ ပိၼ်ႈတူၵ်းတၢင်း၊ ၸၢၵ်ႇမၢၵ်ႇတိူဝ်ႉၺႃးဢူၵ်း၊ ပဵမ်ႉ၊ ၶႃလႄႈမိုဝ်း ၊ ပုမ်၊ ႁူဝ်လႄႈၶႅၼ် ၶဝ်လူႉတၢႆတင်း 2 ။ သိုၵ်းမၢၼ်ႈဢၼ်ၶီႇမႃးၸွမ်းၵေႃႈတၢႆ ဢမ်ႇယွမ်းသိပ်း။