သိုၵ်းမၢၼ်ႈ လၢမ်းလိမ်းယိုဝ်းၵွင်လူင်/ ဢွၼ်ႇ ၵူႈႁူးၵူႈတၢင်း ၸၢၵ်ႇမၢၵ်ႇတိူဝ်ႉသႂ်ႇၵူၼ်းဝၢၼ်ႈ တီႈဝဵင်းသႅၼ်ဝီ လူႉတၢႆထင်တီႈ 1 မၢတ်ႇ 2 ဝႃႈၼႆ။
မိူဝ်ႈဝႃး ဝၼ်းတီႈ 6/10/2022 ယၢမ်းႁူဝ်ၶမ်ႈမွၵ်ႈ 6 မူင်း ၵႃးသိုၵ်းမၢၼ်ႈ 20 ပၢႆ ၽႃႇၺႃးမၢၵ်ႇ ၸွမ်းတၢင်းလူင် ၼႂ်း ၵႄႈဝၢၼ်ႈၼမ်ႉဢုၼ်ႇ – တူၼ်ႈမူင်ႈ ၼႂ်းဢိူင်ႇၼမ်ႉၸလၢပ်ႈ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ။ သိုၵ်းမၢၼ်ႈလၢမ်းလိမ်းယိုဝ်းၵွင်ႈလူင်/ ဢွၼ်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ လူႉတၢႆ 1 မၢတ်ႇၸဵပ်းႁႅင်း 2 ၵေႃႉ၊ တိူဝ်ႉၵႂၢႆးတူဝ်ၼိုင်ႈ ၶႃႁၢၵ်း ။
ၵူၼ်းဝဵင်းသႅၼ်ဝီ ဢၼ်ယူႇၼႂ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၼႆႉ လုၵ်ႉတၢင်း သႅၼ်ဝီ ၶိုၼ်ႈမႃး ၽႃႇၺႃးမၢၵ်ႇၼႂ်းၵႄႈ ၼမ်ႉဢုၼ်ႇ – တူၼ်ႈမူင်ႈ။ ၶဝ်ယူႇၼိူဝ်ၵႃးၼၼ်ႉ လၢမ်းလိမ်း ယိုဝ်း ၵွင်ႈလူင်/ ဢွၼ်ႇ တိူဝ်ႉၵူၼ်းဝၢၼ်ႈၽူႈၸၢႆး ဢႃယု 20 ပၢႆ ၵေႃႉၼိုင်ႈ ၽွင်းတိုၵ်ႉ ၵိုတ်းရူတ်ႉၶိူင်ႈ ပႂ်ႉယူႇၼိူဝ် သဵၼ်ႈတၢင်းၼၼ်ႉ တိူဝ်ႉၺႃးၸၢၵ်ႇမၢၵ်ႇၵွင်ႈသေ လႆႈလူႉတၢႆထင်တီႈ။ ယဝ်ႉၵေႃႈ ၸၢၵ်ႇမၢၵ်ႇ တိူဝ်ႉသႂ်ႇထႅင်ႈ ၵူၼ်းဝၢၼ်ႈ ၽူႈၸၢႆးထႅင်ႈ 2 ၵေႃႉ ဢႃယုၼႂ်းၵႄႈ 20-30 ပီ။ သမ်ႉတိူဝ်ႉသႂ်ႇထႅင်ႈ ၵႂၢႆးတူဝ်ၼိုင်ႈ ၶႃႁၵ်းၵႂႃႇ၊ ႁိူၼ်းၵူၼ်းဝၢၼ်ႈတႄႉၸၢၵ်ႇမၢၵ်ႇတိူဝ်ႉသႂ်ႇ ၵွႆလၢႆလၢႆလင်ၼင်ႇၵဝ်ႇ” – ဝႃႈၼႆ။
ၸဝ်ႈရူတ်ႉၶိူင်ႈ ဢၼ်ၺႃးၸၢၵ်ႇမၢၵ်ႇတၢႆၼၼ်ႉ ပဵၼ်ၵူၼ်းဝၢၼ်ႈၼမ်ႉဢုၼ်ႇ။ မၼ်းၸၢႆးၼႆႉ ပဵၼ်ၵူၼ်း ႁႃလဵင်ႉၼႃႈႁိူၼ်း၊ မႄႈသမ်ႉ မီးတၢင်းပဵၼ်တၢႆၽၢၵ်ႇ၊ ပေႃႈၵေႃႈဢမ်ႇယူႇလီ။ မၼ်းၸၢႆးၼႆႉ ပဵၼ်ၵူၼ်းၵေႃႉ လဵဝ် ပႆႇတႄႇၼႃႈႁိူၼ်း။
2 ၵေႃႉ ဢၼ်လႆႈမၢတ်ႇၸဵပ်းၸၢၵ်ႇမၢၵ်ႇႁၢဝ်ႈႁႅင်းၼၼ်ႉသမ်ႉ ပဵၼ်ၵူၼ်းဝၢၼ်ႈတူၼ်ႈမူင်ႈ ။ ၸၢၵ်ႇမၢၵ်ႇ တိူဝ်ႉသႂ်ႇ 7 ႁွႆး ။ ယၢမ်းလဵဝ် သူင်ႇယူတ်းယႃတူဝ်ဝႆႉ တီႈႁူင်းယႃ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ