မိူဝ်ႈၼႆႉဝၼ်းထိ 6-10-2022 ယၢမ်းႁူဝ်ၶမ်ႈ 5 မူင်းပၢႆ ၽူႈတတ်းသိၼ်တြႃး ၸႄႈဝဵင်း ဝဵင်းမူႇၸေႊ ဢူးရႃႇၸႃႇမိၼ်းၸူဝ်း ဢႃယု 40 ပၢႆ ၺႃးၵူၼ်းဢမ်ႇႁူႉၾၢႆႇ ယိုဝ်း ၽွင်းမၼ်းၸၢႆးလုၵ်ႉတီႈၵၢၼ်သေ ဢၢၼ်းပွၵ်ႈႁိူၼ်း။
ၽွင်းမၼ်းၸၢႆးၶပ်းရူတ်ႉမႃးထိုင် ၼႃႈႁၢၼ်ႉ ၸၼ်ႁၢင်ႈ တုႁၢၼ်ႇ ပွၵ်ႉႁူဝ်မုၼ်ႇ ၼိူဝ်သဵၼ်ႈတၢင်းပျီႇထွင်ႇၸူႉ ၼၼ်ႉ မီးၵူၼ်း 2 ၵေႃႉ ၶီႇရူတ်ႉၶိူင်ႈမႃးယိုဝ်းသႂ်ႇ ဢမ်ႇယွမ်း 4 ၵမ်း။ မၢၵ်ႇၵွင်ႈတိူဝ်ႉမၢတ်ႇ တီႈဢူၵ်း သေလူႉတႆထင်တီႈ။
ၵူၼ်းမႃးယိုဝ်းၼၼ်ႉ ပဵၼ်ၽႂ် ၸုမ်းလႂ် ဢမ်ႇႁူႉ။ ၸိူဝ်းၶဝ်ၼႅတ်ႈၶီႇရူတ်ႉၶိူင်ႈပၢႆႈလႄႈပလိၵ်ႈဢမ်ႇတၼ်းတီႉလႆႈ။
ၵူၼ်းမူႇၸေႊၵေႃႉၼိုင်ႈလၢတ်ႈဝႃႈ – မၼ်းၸၢႆးၼႆႉ မီးၸိုဝ်ႈၼဝ်ႈဝႆႉ ၸဵမ်ၼႂ်းတူင်ႇဝူင်းၶႃႈႁၢပ်ႇၵၢၼ်ၶုၼ်ၶဝ်။ ပေႃးမီးငိုၼ်းတွင်းမႃးသေ ဢဝ်တၢင်းၽိတ်းၼၵ်းပဵၼ်မဝ်။ ၵွပ်ႈၼႆလႄႈၺႃးယိုဝ်းၵေႃႈၸၢင်ႈပဵၼ်လႆႈ ဝႃႈၼႆ။
ဢူးရႃႇၸႃႇမိၼ်းၸူဝ်းၼႆႉ ဢမ်ႇၸႂ်ႈၵူၼ်းၸႃႇတိ မူႇၸေႊ။ လုၵ်ႉတၢင်ႇတီႈ ၶၢႆႉမႃးႁဵတ်းၵၢၼ်တိုၵ့်မီးမွၵ်ႈ 2ပီၵူၺ်း။ တင်းလုၵ်ႈမေးမၼ်းၸၢႆးသေ ယူႇသဝ်းတၢင်း သိၼ်ႇၽိဝ်ႇဢဵင်ႇယႃႇ လႆႈႁူႉၼင်ႇၼႆ။
