ပလိၵ်ႈ(ၵဝ်ႇ)ထႆး ၸၼ်ႉၶုၼ်သိုၵ်း ဢႃယု 34 ပီ ၶဝ်ႈယိုဝ်း ႁူင်းႁပ်ႉတူၺ်းလူလုၵ်ႈဢွၼ်ႇ တီႈၼိုင်ႈ တီႈဝဵင်းၼႃးၵၢင် ၸႄႈတွၼ်ႈ ၼွင်ၿူဝ်ႊလမ်းၽူး မိူင်းထႆး တင်းမူတ်းတၢႆ 38 ၵေႃႉ ။
မိူဝ်ႈၼႆႉဝၼ်းတီႈ 6-10-2022 ယၢမ်းၵၢင်ဝၼ်း 1 မူင်းပၢႆ ပလိၵ်ႈၵဝ်ႇၵေႃႉၼိုင်ႈၶဝ်ႈယိုဝ်းႁူင်းႁပ်ႉလဵင်ႉလုၵ်ႈဢွၼ်ႇ။
လုၵ်ႈဢွၼ်ႇတၢႆထင်တီႈ 22 ၵေႃႉ။ ၵူၼ်းလူင်တၢႆထင်တီႈ 12 ၵေႃႉ။ မၢတ်ႇၸဵပ်းထႅင်ႈ 10 ပၢႆ။
ၸွမ်းၼင်ႇၶၢဝ်ႇ Chiangmai News တႅမ်ႈဝႆႉဝႃႈတႄႉ ႁွင်ႈၵၢၼ်ပလိၵ်ႈပိုၼ်ၽၢဝ်ႇပဵၼ်တၢင်းၵၢၼ်ဝႆႉမိူဝ်ႈဝၢႆးဝၼ်း 5 မူင်းၶိုင်ႈၼႆႉ ၵူၼ်းတၢႆတင်းမူတ်း မီး 38 ၵေႃႉ ဝႃႈၼႆ။
ယၢမ်းလဵဝ် ၵူၼ်းမၢတ်ႇၸဵပ်းမီးတီႈႁူင်းယႃၼွင်ၿူဝ်းလမ်းၽူး။ လူဝ်ႇထႅမ်လိူတ်ႈတင်းၼမ် သိုဝ်ႇၶၢဝ်ႇထႆးပိုၼ်ၽၢဝ်ႇဝႆႉၼင်ႇၼႆ။
ဝၢႆးယိုဝ်းယဝ်ႉ ပလိၵ်ႈၵဝ်ႇ ၵူၼ်းႁၢႆႉၼၼ်ႉ လႅၼ်ႈပၢႆႈ။ ၶိုၼ်းပွၵ်ႈမိူဝ်းယိုဝ်းလုၵ်ႈမေးမၼ်းတီႈႁိူၼ်းတၢႆ။ ဝၢႆးၼၼ်ႉၵေႃႈ ၶိုၼ်းၽဝ်ရူတ်ႉၵႃး ၸဝ်ႈၵဝ်ႇယဝ်ႉ ယိုဝ်းတူဝ်တၢႆၶိုၼ်း။
လွင်ႈႁုၵ်ႉႁၢႆႉလူင်ၼႆႉ ႁဵတ်းႁႂ်ႈၵူၼ်းတင်းလုမ်ႈၾႃႉတူၵ်းၸႂ်တိုၼ်ႇၵူဝ်။
ပလိၵ်ႈၵဝ်ႇ ၵေႃႉယိုဝ်းလုၵ်ႈဢွၼ်ႇၼႆႉ ယွၼ်ႉသင်လႄႈယိုဝ်းၼႆ ပလိၵ်ႈထႆႈၵေႃႈပႆႇပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်။
ၼႂ်းပီၼႆႉမႃး ၵူၼ်းမိူင်းထႆး ႁႅင်းၸႂ်တူၵ်း ယွၼ်ႉပၢႆးမၢၵ်ႈမီးတူၵ်း ႁႃၵိၼ်လဵင်ႉတွင်ႉယၢပ်ႇ။ ဢၼ်ၶႃႈတူဝ်တၢႆၶိုၼ်းၵေႃႈမီးတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ