မိူဝ်ႈၼႆႉ ဝၼ်းတီႈ 5/10/2022 ယၢမ်းၵၢင်ၼႂ် 9 မူင်း ယူႇတီႈ သင်ၶၸဝ်ႈလႄႈ တၵ်ႉၵႃႇသတ်ႉထႃး လုၵ်ႈၼွင်ႉပွင်ႈပၢႆ ႁူမ်ႈၵၼ် ၵၢပ်ႈသွမ်းသင်ၶၸဝ်ႈလႄႈ လူႇတၢၼ်းပၼ် ၸဝ်ႈတူၼ်ၶူး ၵလျႃႇၼဝမ်သ တီႈၵျွင်းယွတ်ႈ ပွၵ်ႉ 7 ဝဵင်းၵျွၵ်ႉ မႄး ၸိုင်ႈတႆး ပွတ်းႁွင်ႇ ၊ ၶုၵ်းထူပ်းၸဝ်ႈလူႉလွၼ်ႇ ၶွပ်ႈတဵမ် 4 ပီ။
လုင်းၸၢႆးလႅင်းႁၢၼ် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ တွၼ်ႈၵၢင်ၼႂ် ႁဝ်းၶႃႈ ၵၢပ်ႇသွမ်းသင်ၶၸဝ်ႈလႄႈ လူႇတၢၼ်း ယိုၼ်ႈထိုင် ၸဝ်ႈၶူးၵလျႃႇၼဝမ်သ တီႈလႆႈလူႉလွၼ်ႇၵႂႃႇ ၶွပ်ႈတဵမ် 4 ပီ။ ႁူဝ်ၶမ်ႈ 6 မူင်း ႁဝ်းၶႃႈ ႁူမ်ႈၵၼ် တႆႈတဵၼ်းယွၼ်းသူး ၸတ်းႁဵတ်းပၢင်ၶုၵ်းထူပ်းၵႂႃႇ တီႈၵျွင်းယွတ်ႈ။ ပၢင်ၶုၵ်းထူပ်းၼႆႉ လႆႈၸတ်းႁဵတ်းမႃး ၵူႈပီ မီးၶၢဝ်းတၢင်း 4 ပီယဝ်ႉ”- ဝႃႈၼႆ။
ယၢမ်းႁူဝ်ၶမ်ႈ 6 မူင်းၼၼ်ႉ ၸတ်းႁဵတ်းပၢင်ၶုၵ်းထူပ်း တႆႈတဵၼ်းယွၼ်းသူးထိုင် ၸဝ်ႈၶူးၵလျႃႇၼဝမ်သ တီႈ ၵျွင်းယွတ်ႈလႄႈ တီႈၵေႃလိၵ်ႈလၢႆးလႄႈၾိင်ႈငႄႈတႆး ။
ၸဝ်ႈတူၼ်ႈၶူး ၵလျႃႇၼဝမ်သၼႆႉ ထုၵ်ႇၵူၼ်းဢမ်ႇႁူႉၾၢႆႇ 2 ၵေႃႉ ၶဝ်ႈယိုဝ်း တီႈဝတ်ႉ/ ၵျွင်းယွတ်ႈသေ လႆႈလူႉလွၼ်ႇ ၵႂႃႇ မိူဝ်ႈဝၼ်းတီႈ 5/10/2018 ယၢမ်းႁူဝ်ၶမ်ႈ 6 မူင်း ၼႆယဝ်ႉ။
ပိုၼ်းၵႅပ်ႈ ၸဝ်ႈတူၼ်ၶူး ၵလျႃႇၼဝမ်သ –
ၸိုဝ်ႈပေႃႈမႄႈ – ၶိင်းယွတ်ႈငိုၼ်းသၢင်ႇသၢမ် + ၼၢႆးၶမ်းသွႆႈသူၺ်ႇၸိင်ႇ
ၵိူတ်ႇ – ပီၵေႃးၸႃႇ 1333
ဢွင်ႈတီႈ – ဝၢၼ်ႈသွၼ်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
ပီႈၼွင်ႉ – မီးပီႈၼွင်ႉႁူမ်ႈတွင်ႉၵၼ် 3 ၵေႃႉ။ ၸၢႆးသၢင်ႇဢၢႆႈ၊ ၸၢႆႈယီႈပီးလႄႈ ၸၢႆးသၢမ်ၶွင်ႇ။ ၸဝ်ႈပဵၼ်လုၵ်ႈၵေႃႉ ထူၼ်ႈသွင်။
တီႈယၢမ်ႈႁဵၼ်းလိၵ်ႈလေႃးၵီႇ – မိူဝ်ႈလဵၵ်ႉလႆႈၶိုၼ်ႈႁဵၼ်းၵျွင်းပၺ်ၺႃ မူလတၢၼ်း ၸၼ်ႉငဝ်ႈ တေႃႇထိုင် ၸၼ်ႉသွင် တီႈ ဝၢၼ်ႈသွၼ်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
လွင်ႈပဵၼ်သၢင်ႇပဵၼ်ၸၢင်း – မိူဝ်ႈပီ ၵေႃးၸႃႇ 1343 ၽွင်းဢႃယု ၸဝ်ႈလႆႈ 10 ပီ လႆႈၼုင်ႈသၢင်ႇ။ ထိုင်မႃး ပီၵေႃး ၸႃႇ 1353 သမ်ႉ ၶိုၼ်ႈပဵၼ်ၸၢင်း တီႈဝၢၼ်ႈသွၼ်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
တီႈႁဵၼ်းလိၵ်ႈလေႃးၵုတ်ႉတရႃႇ – ဝၢႆးသေၼုင်ႈသၢင်ႇယဝ်ႉ ယွၼ်ႉပိူဝ်ႈၶႂ်ႈမေႃလိၵ်ႈလေႃးၵုတ်ႉတရႃႇလႄႈ ၸင်ႇၵႂႃႇ ယူႇသဝ်း တမ်ႈတီႈၵျွင်းယွတ်ႈ ဝဵင်းၵျွၵ်ႉမႄး 3 ပီသေ လူင်းၵႂႃႇသွၼ်ႁဵၼ်းလိၵ်ႈ တီႈဝဵင်းလိူဝ်ႇ ၵျွင်းမႁႃႇၵုသူဝ်ႇ တေႃႇယဝ်ႉ။
ဝၢႆးၼၼ်ႉ ၸင်ႇၶၢႆႉၵႂႃႇၶိုၼ်းသိုပ်ႇႁဵၼ်းတီႈၵျွင်းမႁႃႇၵၢၼ်တႃႇရူင်ႇ ဝဵင်းဢမရပူႇရ တိူင်းတႃႈလိူဝ်ႇ (မၼ်းတလေး) ၼႂ်းၶၢဝ်း တၢင်း 13 ပီသေ ဢွင်ႇပူၼ်ႉၸၼ်ႉလူင် လူင်ပွင်ၸိုင်ႈမၢၼ်ႈ။
လိူဝ်ၼၼ်ႉ ၸင်ႇၶိုၼ်းမႃးႁၢပ်ႇၵၢၼ်သႃသၼႃႁဵတ်းပဵၼ်ၽူႈၵွၼ်းၵျွင်း ၵျွင်းယွတ်ႈၵေႃႇ ဝဵင်းၵျွၵ်ႉမႄး မိူဝ်ႈၽွင်း ဝႃႇၸဝ်ႈလႆႈ 3 ဝႃႇ။
ၸဝ်ႈလႆႈၵွၼ်းၵျွင်းယွတ်ႈ ၶၢဝ်းတၢင်း 3 ပီ။ ဝၢႆးၼၼ်ႉ ၸဝ်ႈသြႃႇလူင်ဢူးၼႃႇၵိင်ႇတဢမ်ႇယူႇလီလႄႈ ၶိုၼ်းပွၵ်ႈမိူဝ်း ၸေႊ လၢၼ်ႉလႄႈ တၵ်ႉၵႃႇသတ်ႉထႃးၸင်ႇပၢင်း ၸဝ်ႈတူၼ်ၶူးၵလျႃႇၼဝမ်သ ဝႆႉႁႂ်ႈ သိုပ်ႇပုတ်ႈႁၢပ်ႇၵၢၼ်သႃသၼႃ တီႈၵျွင်းထမ်း မမေႇၼီႇ ၵျွင်းယွတ်ႈ ဝဵင်းၵျွၵ်ႉမႄးယဝ်ႉ။
ၵႅၼ်ႇၸဝ်ႈ သိုပ်ႇႁၢပ်ႇၼႃႈၵၢၼ်သႃသၼႃ ပိုတ်ႇၽုၺ်ႇႁူင်းႁဵၼ်း “ပၵ” ပီ 2011 ယဝ်ႉ။ ၶိုၼ်းသိုပ်ႇႁၢပ်ႇၵၢၼ်ၶဝ်ႈပႃး ၼႂ်း ပဵၼ်ၽူႈၵေႃႇတင်ႈၸုမ်းယေးငိုၼ်း ၸုမ်းဝူင်းမႅတ်ႉတႃႇ ၼႂ်းမိူင်းတႆးၵူႈတီႈတီႈယူႇယဝ်ႉ ထိုင်မႃးပီ ၶရိတ်ႉ 2016 ၼၼ်ႉ တႄႇ ဢွၼ်ႁူဝ်ၵေႃႇသၢင်ႈၵျွင်းမႂ်ႇသၢမ်ၸၼ်ႉ။
