ၸၢႆးထုၼ်း ႁႅင်းၵၢၼ်တႆး ပဵၼ်မၢၵ်ႇႁဵင်း (ၶႅၼ်ႊသိူဝ်ႊ) တီႈၶႃလူင်သေ ဢမ်ႇၸၢင်ႈပႆလႆႈၼၼ်ႉ  လူႉသဵင်ႈယဝ်ႉ တေပူၼ်ႉၶၢပ်ႈတူဝ် ဝၼ်းတီႈ 6/10/2022 ။

မိူဝ်ႈဝႃး ဝၼ်းတီႈ 4/10/2022 ယၢမ်းဝၢႆးဝၼ်း 4 မူင်း ၸၢႆးထုၼ်း ဢႃယု 20 ပၢႆ ၵေႃႉပဵၼ် ၶႅၼ်ႊသိူဝ်ႊဝႆႉ တီႈၶႃလူင် ၾၢႆႇသၢႆႉသေ ဢမ်ႇၸၢင်ႈပႆမႃးၶၢဝ်းတၢင်းႁိုင်ၼၼ်ႉ လႆႈလူႉသဵင်ႈၵႂႃႇ တီႈႁိူၼ်းဢႃ (ၼွင်ႉၸၢႆးပေႃႈ) တီႈဝၢၼ်ႈလူဝ်ႉ ဢိူင်ႇသၼ်တူၼ်ႈမိုဝ်ႉ ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး။

ၸၢႆးလႅင်း ၵေႃႉပဵၼ်ဢႃၸၢႆးထုၼ်း လၢတ်ႈတီႈၽူႈတွႆႇႁွၵ်ႈဝႃႈ -“လႆႈလူႉၵႂႃႇ မိူဝ်ႈဝႃး ယၢမ်းဝၢႆးဝၼ်း 4 မူင်း မၼ်းၸၢႆးၶၢင်း ႁူဝ်ၸဵပ်းၼႃႇၼႆသေ လူႉၵႂႃႇ။ ယဝ်ႉၵေႃႈ ၵွၼ်ႇၼႃႈၼၼ်ႉမၼ်း ဢမ်ႇၵိၼ်ၶဝ်ႈ ၵိၼ်သင် လႆႈၵႃႈႁိုဝ်။    ယၢမ်းလဵဝ် ၶၢပ်ႈတူဝ်မၼ်းၸၢႆး ဢဝ် ဝႆႉတီႈဝတ်ႉဝၢၼ်ႈလူဝ်ႉ။ ဢၼ်ယူႇတီႈပီႈၼွင်ႉႁဝ်းၶႃႈ ၵမ်ႉထႅမ်ၸွႆႈမႃးၵႃႈယူတ်းယႃ မၼ်းၸၢႆးၼၼ်ႉ ႁဝ်းၶႃႈ လႆႈမႃးယူတ်းယႃ မၼ်းၸၢႆးသေ ၵိုတ်းဝႆႉ ငိုၼ်း 1 မိုၼ်ႇဝၢတ်ႇ။ ငိုၼ်းဢၼ်ၵိုတ်းဝႆႉၼႆႉ တေဢဝ်လဵင်ႉလူ ၼႂ်းဝၼ်းပူၼ်ႉၶၢပ်ႈတူဝ် မၼ်းၸၢႆး။ ႁႂ်ႈ ၵုမ်ႇထူၼ်ႈတႄႉ ဢမ်ႇၵုမ်ႇၶႃႈ။ တိုၵ်ႉတေ ယၢပ်ႇၽိုတ်ႇဝႆႉဢိတ်းဢိတ်းၶႃႈဢေႃႈ တႃႇၵႃႈလဵင်ႉလူၸႃႇၵ လူႇတၢၼ်းတႃႇမိူဝ်ႈၽုၵ်ႈၼႆႉ။  ”- ဝႃႈၼႆ။

ယၢမ်းလဵဝ် ၶၢပ်ႈတူဝ်တၢႆ ၸၢႆးထုၼ်းၼႆႉ ဝႆႉတီႈဝတ်ႉဝၢၼ်ႈလူဝ်ႉသေ မိူဝ်ႈၽုၵ်ႈဝၼ်းတီႈ 6/10/2022 ၼႆႉ တေပူၼ်ႉၶၢပ်ႈတူဝ် ၵႂႃႇ ဝႃႈၼႆ။

“ပူၼ်ႉမႃးမွၵ်ႈပီပၢႆၼႆႉ မၼ်းၸၢႆးၵႂႃႇ ႁဵတ်းၵၢၼ် တီႈလၢၼ်ႉဢႃးႁၢရ် (ႁၢၼ်ႉတၢင်းၵိၼ်) တီႈၵုင်းထဵပ်ႈ။ မၼ်း လူမ်ႉၼႂ်းႁၢၼ်ႉၼၼ်ႉသေ ဢဝ်ၶႃမၼ်းၵႂ်ႈသေ ဢမ်ႇၸၢင်ႈၵႂႃႇႁဵတ်းၵၢၼ်။ မၼ်းၵေႃႈဢွၵ်ႇၵၢၼ်မႃး။ ၽွင်းၼၼ်ႉ ဢမ်ႇပေႃးၵႂ်ႈထၢၼ်ႇၼႆႉ။  ဢွၼ်ၵႂႃႇၼႄ မေႃယႃ တီႈမိူင်းၾၢင်ၼႆႉ ၊ မေႃၶဝ်ဝႃႈ တီႈၼႆႈ ၽႃႇတတ်းဢမ်ႇလႆႈ တေလႆႈမိူဝ်းၽႃႇတတ်းတီႈႁူင်းယႃပႃႇငႄႉ။ ၵမ်းၼႆႉ မိူဝ်ႈ ႁဝ်းၶႃႈ ၵႂႃႇၼႄတီႈႁူင်းယႃပႃႇငႄႉ မေႃၶဝ် တေၵူတ်ႇထတ်းသေ တႅပ်းၼႆလႄႈ ႁဝ်းၶႃႈ ဢမ်ႇႁပ်ႉပၢၵ်ႇ ယွၼ်ႉဢမ်ႇမီးငိုၼ်း တႃႇတေယူတ်းယႃ။ ႁဵတ်းၼၼ်သေတေႃႇပေႃးလူႉသဵင်ႈၼႆႉၶႃႈဢေႃႈ။  ယူႇႁိူၼ်းၵေႃႈၵႂႃႇၼႄသြႃႇတႆးဢေႃႈ။ ၶႃမၼ်းတႄႉ ဝႅပ်ႈၵႂႃႇဢိတ်းၼိုင်ႈဢေႃႈ။ ၵူၺ်းၵႃႈ ထိုင်မႃး မိူဝ်ႈဝႃးၵေႃႈ လႆႈလူႉၵႂႃႇယဝ်ႉ”- ၸၢႆးလႅင်း ၵေႃႉပဵၼ်ဢႃ သိုပ်ႇလၢတ်ႈၼႄၼင်ႇ။

ၸၢႆးထုၼ်း (ႁွင်ႉ) ၸၢႆးၶူၼ်ၼႆႉ ပဵၼ်လုၵ်ႈၸၢႆး ၸၢႆးဢုင်းလႄႈ ၼၢင်းဢိင်ႇ ပဵၼ်ၵူၼ်းဝၢၼ်ႈလီႈ ဝဵင်းၼမ်ႉလၼ်ႈ ၸႄႈဝဵင်း သီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။