ႁွင်ႈၵၢၼ်ၾၢႆႇလိူမ်ႈလႆႇ ၸႄႈဝဵင်းသီႇသႅင်ႇ ပိုၼ်ၽၢဝ်ႇႁၢမ်ႈၵူၼ်းၶၢႆၶူဝ်းၼႂ်းၵၢတ်ႇ ၶၢႆမူၵ်ႇတႅၵ်ႇ၊ မွၵ်ႇၾႆး ဢၼ်လုၵ်ႈဢွၼ်ႇလဵၼ်ႈၽွင်းၶၢဝ်းဢွၵ်ႇဝႃႇ၊ ပေႃးထူပ်းႁၼ်ၸိုင်တေပၼ်တူတ်ႈတၢမ်ႇ ဝႃႈၼႆ။
မိူဝ်ႈဝၼ်းတီႈ 4/10/2022 ၾၢႆႇလိူမ်ႈလႆႇ ဝဵင်းသီႇသႅင်ႇ ဢွၵ်ႇလိၵ်ႈပိုၼ်ၽၢဝ်ႇဝႃႈ – ၵူဝ်ၵူၼ်းထဝ်ႈၵူၼ်းၵႄႇ တူၵ်းၸႂ် ၊ သုၵ်ႉသၵ်ႉၸႂ် လႄႈႁၢမ်ႈသိုဝ်ႉၶၢႆ၊ ႁၢမ်ႈၸုတ်ႇလဵၼ်ႈသဵင်လင် -ဝႃႈၼႆဝႆႉ။
ၵူၼ်းပိုၼ်ႉတီႈလၢတ်ႈဝႃႈ – “ဢၼ်ႁၢမ်ႈၵၼ်ၼႆႉတႄႉ ပိူၼ်ႈၵေႃႈႁၢမ်ႈၵၼ်မႃးယူႇၵူႈပီၼင်ႇၵဝ်ႇ။ ၸဵမ်မိူဝ်ႈတၢင်းပဵၼ်ၶူဝ်ႊဝိတ်ႉ-19 တႄႇၶဝ်ႈမႃးပုၼ်ႉ။ ၶဝ်ဢမ်ႇပၼ်ႁဵတ်းပွႆးသင်။ ၵူၼ်းၼုမ်ႇ လုၵ်ႈဢွၼ်ႇၶဝ်တႄႉ ၶႂ်ႈလဵၼ်ႈမူၵ်ႇၾႆးၼႃႇယဝ်ႉၶႃႈ ပေႃးဢွၵ်ႇဝႃႇၼႆႉ ”- ဝႃႈၼႆ။
ဝၼ်းတီႈ 9/10/2022 ၼႆႉ မႅၼ်ႈဝၼ်း လိူၼ်သိပ်းဢဵတ်းမူၼ်း ဝၼ်းဢွၵ်ႇဝႃႇသႃ။ ယၢမ်းလဵဝ်ၵေႃႈ ပဵၼ်ၽွင်းၵူၼ်းမိူင်းသီႇသႅင်ႇ ႁၢင်ႈႁႅၼ်းတႃႇၵိၼ်တႃႇလူႇ။
ၵူၺ်းၵႃႈ တၢင်းသီႇသႅင်ႇ ၊ပၢင်လွင်း၊ ၾၢႆၶုၼ် ၼႆႉ ငဝ်းလၢႆးပၢင်တိုၵ်းသိုၵ်းသိူဝ်လႄႈၵူၼ်းပၢႆႈၽေးသိုၵ်း တိုၵ်ႉမီးၼမ် လႄႈသိုၵ်းမၢၼ်ႈမႆႈၸႂ်လွင်ႈသဵင်ၵွင်ႈသဵင်မၢၵ်ႇသေ ႁၢမ်ႈဝႆႉ ၵမ်ၵိၼ်းဝႆႉၵေႃႈပဵၼ်လႆႈ ၵူၼ်းသီႇသႅင်ႇၵေႃႉၼိုင်ႈလၢတ်ႈၼင်ႇၼႆ။
ၼႂ်းၸႄႈဝဵင်းသီႇသႅင်ႇၼႆႉ မီးၵၢတ်ႇလူင်သီႇသႅင်ႇ၊ ၵၢတ်ႇၼွင်မွၼ်၊ ၵၢတ်ႇသၢႆးၶၢဝ်၊ ၵၢတ်ဝၢၼ်ႈယဵၼ်ႇ ၸိူဝ်းၼႆႉ။ သင်ဝႃႈ ၵူတ်ႇထတ်းႁၼ် လၵ်ႉၶၢႆ ဢမ်ႇၼၼ် မီးမူၵ်ႇတႅၵ်ႇ မူၵ်ႇၾႆး မွၵ်ႇၾႆး ဝႆႉၼႂ်းႁၢၼ်ႉၸိုင် တေဢဝ်လိူင်ႈပၼ်တူတ်ႈတၢမ်ႇၵႂႃႇၼၵ်းၼၵ်းၼႃၼႃ – ၾၢႆႇလိူမ်ႈလႆႇ ပိုၼ်ၽၢဝ်ႇဝႆႉၼင်ႇၼႆ။
