မိူဝ်ႈၼႆႉ ဝၼ်းတီႈ 4/10/2022 ယၢမ်းၵၢင်ၼႂ် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢွၼ်တၵ်ႉၵႃႇသတ်ႉထႃး လုၵ်ႈၼွင်ႉ  ပွင်ႈပၢႆ ၵႂႃႇဝႆႈၽြႃး၊ သူင်ႇမႅတ်ႉတႃႇ၊ တႆႈတဵၼ်းယၢတ်ႇၼမ်ႉ တီႈထၢတ်ႈပုတ်ႉထၵႃႇယႃႇ ၼႂ်းဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း။

ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄငဝ်ႈငုၼ်းမုၵ်ႉ ၸုမ်းလူင်သင်ႇၶႃႇ ၸိုင်ႈတႆး ပွတ်းဢွၵ်ႇ ၶူင်း လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈယဝ်ႉ တၵ်ႉၵႃႇ ၸဝ်ႈၶူးဝႃးပေႃႈ မႃးတီႈၵွင်းမူး ပုတ်ႉထၵႃႇယႃႇ တီႈၼႂ်းဢိူင်ႇမိူင်းၽူင်းၼႆႉ။  မိူဝ်ႈၶူးဝႃးပေႃႈ ဢွၵ်ႇထမ်ႈမိူင်းၵႅတ်ႇမႃးၼၼ်ႉ လၢတ်ႈဝႃႈ   ပေႃးဝၼ်းၵိူတ်ႇၶူးဝႃးမႃးတေတၢင်ႇထီးထၢတ်ႈၼႆဝႃႇ။ ပီၼႆႉ ယွၼ်ႉပၢႆးယူႇလီ ၸဝ်ႈႁဝ်း ဢမ်ႇပေႃးၶႅမ်ႉသေ ယူႇတီႈမေႃယႃၶဝ်ၵေႃႈ ၵမ်းၵမ်းလႆႈမႃးထူပ်း ၵူတ်ႇထတ်းပၼ်။ ပူၼ်ႉမႃး ပႆႇႁိုင်ၼႆႉ ၸဝ်ႈႁဝ်း လႆႈၵႂႃႇၼႄမေႃယႃ တၢင်းမႄႈသၢႆၼၼ်ႉသေ တိုၵ်ႉပွၵ်ႈမႃးၽႅဝ် တီႈမိူင်းၽူင်း ၼႆႉ တိုၵ်ႉမီး 3 ဝၼ်း ပႃးမိူဝ်ႈၼႆႉၵူၺ်း”- ဝႃႈၼႆ။

ဢိင်ၼိူဝ် လွင်ႈပၢႆးယူႇလီ ၸဝ်ႈသိလ်ထမ်း ၶူးဝႃးဝုၼ်းၸုမ်ႉသေ တေသိုပ်ႇၵႂႃႇၼႄမေႃယႃ ၵူတ်ႇထတ်းပၢႆးယူႇလီထႅင်ႈၵမ်းၼိုင်ႈ ၼႂ်းလိူၼ်ၼႆႉ။ ဝၢႆးၼၼ်ႉၸင်ႇတေၶိုၼ်းသိုပ်ႇၶဝ်ႈၵမ် ၼႂ်းဝႃႇသႃ  ထႅင်ႈ။ ပီၼႆႉ ၶူးဝႃးၸဝ်ႈ တေဢွၵ်ႇဝႃႇသႃ ၼႂ်းလိူၼ် 12 မူၼ်း(ၾၢႆႇတႆး) ၼႆယဝ်ႉ။

“ၵူႈပီ ၶူးဝႃးပေႃႈ ပေႃးၶဝ်ႈဝႃႇသႃၼႆ တေဢမ်ႇလၢတ်ႈၵႂၢမ်း တႃႇၼႂ်းဝႃႇသႃ 3 လိူၼ်။ ပီၼႆႉ ဢိင်ၼိူဝ် ငဝ်းလၢႆးပၢႆးယူႇလီသေ ထႅင်ႈဝူင်ႈမႃး တေၵႂႃႇၼႄမေႃယႃထႅင်ႈသေ ဝၢႆးၼၼ်ႉမႃး တေသိုပ်ႇၶဝ်ႈတိုဝ်းၵမ်ၼႂ်းဝႃႇသႃၵႂႃႇ”- ၸဝ်ႈၶူးလူင် ၺႃႇၼသီႇရိ သိုပ်ႇလၢတ်ႈၼင်ႇၼႄၼႆ။

ဝၼ်းၵိူတ်ႇၸဝ်ႈသိလ်ထမ်း ၶူးဝႃးဝုၼ်းၸုမ်ႉ ပီၼႆႉ တေၸတ်းႁဵတ်း ၼႂ်းဝၼ်းတီႈ 5/1/2023 တီႈႁိမ်းထၢတ်ႈပုတ်ႉထၵႃႇယႃႇ ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်းၼႆႉ။