လူင်ပွင်ၸိုင်ႈသိုၵ်းမၢၼ်ႈ ၸႄႈဝဵင်းၵျွၵ်ႉမႄး သင်ႇၵူၼ်းပၢႆႈၽေးသိုၵ်း ပွၵ်ႈၶိုၼ်းႁိူၼ်းယေး ၼႂ်းလိူၼ်ဢွၵ်ႊထူဝ်ႊပိူဝ်ႊ ဝႃႈၼႆသေတႃႉ ပႆႇၸၢင်ႈပွၵ်ႈ ၵွပ်ႈၵူဝ်ဢမ်ႇမီးလွင်ႈႁူမ်ႇလူမ်ႈ ၸွမ်းသဵၼ်ႈတႃႈသၢႆတၢင်း။
မိူဝ်ႈလိူၼ်သႅပ်ႊထိမ်ႊပိူဝ်ႊပူၼ်ႉမႃးသိုၵ်းမၢၼ်ႈပိုၼ်ၽၢဝ်ႇဝႃႈ ၸွမ်းၼင်ႇၶေႃႈၸိသင်ႇၸိုင်ႈမိူင်း(နိုင်ငံတော်ညွန်ကြားချက်) သေ လိူၼ် ဢွၵ်ႊထိူဝ်ႊပိူဝ်ႊၼႆႉ ၵူၼ်းပၢႆႈၽေးသိုၵ်းတိုၼ်းတေလႆႈပွၵ်ႈမိူဝ်းႁိူၼ်းယေးၽႂ်မၼ်း- ဝႃႈၼႆဝႆႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ– “ ၶဝ်ပႆႇၸၢင်ႈပွၵ်ႈမိူဝ်းၶိုၼ်းၶႃႈ။ ၾၢႆႇၽွင်းငမ်း(ထွေအုပ်) ၶဝ်တႄႉ မႃးသင်ႇဝႆႉ ႁႂ်ႈမိူဝ်းၵၼ်ယူႇ ၵူၺ်းၼႃႇတေပႆႇၸၢင်ႈမိူဝ်း သဵၼ်ႈတၢင်းမိူဝ်ႈ ဝၢၼ်ႈၶဝ်သမ်ႉ ၸုမ်းယိပ်းၵွင်ႈၵၢင်ႇၶဝ်တိုၵ်ႉတူင်ႉၼိုင်ဝႆႉ ယူႇၼႃႇၼေႃႈ။ပေႃးပီ2022ၼႆႉသဵင်ႈၵွၼ်ႇ 2023မႃးၸင်ႇပိုတ်ႇပၼ်တၢင်းၵူၼ်းဝၢၼ်ႈၵူၼ်းသူၼ်ၶဝ်မိူဝ်းၶိုၼ်းၼႆဢေႃႈ ပေႃးၼႆတႄႉ ပီႈၼွင်ႉပၢႆႈၽေးၶဝ် တေလိူဝ်ၸႂ်ယၢပ်ႇၸႂ် တႃႇယူႇတႃႇၵိၼ်တႃႇမိူဝ်းၼႃႈတေႉတေႉ “ ဝႃႈၼႆ။
ယၢမ်းလဵဝ် တီႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၵျွၵ်ႉမႄးၼႆႉ မီးၵူၼ်းပၢႆႈၽေးသိုၵ်း မႃးသွၼ်ႈယူႇဝႆႉ ႁူဝ်ၵူၼ်းမီးဝႆႉ ႁိမ်းသွင်ပၢၵ်ႇ ပဵၼ်ၵူၼ်းဝၢၼ်ႈႁူးသူၼ်၊ ဝၢၼ်ႈတူၼ်ႈႁိူၵ်ႈလႄႈ ဝၢၼ်ႈၼႅမ်းသၢႆး ၸိူဝ်းၼႆႉ။တေမိူဝ်းသမ်ႉ ဢမ်ႇမီးလွင်ႈႁူမ်ႇလူမ်ႈ ၵူၼ်းမိူင်းၶၢင်းပွင်ႉၼင်ႇၼႆ။
“ တေမိူဝ်းၵေႃႈဢမ်ႇၸၢင်ႈ တေယူႇၵေႃႈ ၶမ်ၸႂ်ဝႆႉယူႇဢေႃႈ ၵွပ်ႈဢမ်ႇမီးလၢႆးလႆႈငိုၼ်းတွင်းသင် ။ တႃႇတေၵိၼ်တေယူႇၼႆႉ လႆႈၼၵ်းၸႂ်သေႇသေႇ ။ ပေႃးလမ်တိုဝ်လမ်တၼ်သေမိူဝ်းသမ်ႉ ၵူဝ်ယဵပ်ႇၺႃးမၢၵ်ႇႁႃႉသင်ႁႃႉၸိူဝ်းၼႆႉသမ်ႉလႆႈဝူၼ်ႉထႅင်ႈ။ ပၢႆးတူဝ်တႄႉ ၵႅၼ်ႇၶႅင်ယူႇဝႃႈၼႆသေၵေႃႈယဝ်ႉ ပၢႆးၸႂ်ပီႈၼွင်ႉပၢႆႈၽေးသိုၵ်းၶဝ်မိူဝ်ႈလဵဝ် ဝူၼ်ႉသင်ဢမ်ႇမႃးသင်သေ ထၢတ်ႈၸႂ်တူၵ်းဝႆႉ ႁင်းၽႂ်ႁင်းမၼ်းယူႇယဝ်ႉၶႃႈ ပဵၼ်ဢၼ်ယၢပ်ႇၵိၼ်းႁၢဝ်ႈႁႅင်းတေႉၶႃႈ ” – ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈထႅင်ႈၼင်ႇၼႆ။
မိူၼ်ၼင်ႇ ၵူၼ်းပၢႆႈၽေးသိုၵ်းတၢင်းၸိုင်ႈတႆးပွတ်းၸၢၼ်းၸိူဝ်းၼၼ်ႉၵေႃႈ သိုၵ်းမၢၼ်ႈ သင်ႇႁႂ်ႈပွၵ်ႈၶိုၼ်းဝၢၼ်ႈဝဵင်း ၸဝ်ႈ ၵဝ်ႇၵၼ်တင်းမူတ်း ၼႂ်းလိူၼ်ဢွၵ်ႊထိူဝ်ႊပိူဝ်ႊၼႆႉဝႃႈၼႆ။
 သေ လိူၼ် ဢွၵ်ႊထိူဝ်ႊပိူဝ်ႊၼႆႉ ၵူၼ်းပၢႆႈၽေးသိုၵ်းတိုၼ်းတေလႆႈပွၵ်ႈမိူဝ်းႁိူၼ်းယေးၽႂ်မၼ်း- ဝႃႈၼႆဝႆႉ။){kind=link}