ႁၢင်လိူၼ်ပူၼ်ႉမႃး ၶၼ်ငႃးယင်းလႆႈၵႃႈသုင်ယူႇ ထိုင်မႃးႁူဝ်လိူၼ်ၼႆႉ ၶၼ်ငႃးၶိုၼ်းယွမ်းလူင်း  ၸဝ်ႈသူၼ်ငႃးၶိုင်ၵၢၼ်ယၢပ်ႇ။

ၸဝ်ႈသူၼ်ငႃးလၢင်းၶိူဝ်းၵေႃႉၼိုင်ႈလၢတ်ႈဝႃႈ -“မိူဝ်ႈႁၢင်လိူၼ်ပူၼ်ႉမႃး ယင်းတိုၵ်ႉၶၢႆလႆႈ 1 ၸွႆႉ 7000 ပျႃးယူႇ။ တလဵဝ် လႆႈ 1 ၸွႆႉ5000 ပၢႆၵူၺ်းယဝ်ႉၶႃႈ။ ၶိုၼ်ႈဝႆးလူင်းဝႆးလႅပ်ႈတေပဵၼ် ၸွမ်းၶၼ်ငိုၼ်း ၶႃႈဢေႃႈ”- ဝႃႈၼႆ။

ပေႃးပဵၼ်ၼမ်ႉမၼ်းငႃးသမ်ႉ လႆႈၶၢႆ 1 ၸွႆႉ 14000 ထိုင် 15000 ပျႃး ၊ 1 ပုင်း 150000 ပျႃးဝႃႈၼႆ။

ငႃးဢၼ်ဢွၵ်ႇတီႈဝဵင်းလၢင်းၶိူဝ်းၼႆႉသူင်ႇၶၢႆၼႂ်းမိူင်းၵူၺ်းဢမ်ႇၵႃး ၸိူဝ်းပဵၼ်ငႃးဢၼ်လီ ဢၼ်ၶႅမ်ႉၼႆႉသူင်ႇၶၢႆထိုင် မိူင်းၵျပၼ်ႊ ၊ မီးၵူၼ်းၵႃႉတၢင်ႇတီႈမႃးၵဵပ်းသိုဝ်ႉထိုင်လၢင်းၶိူဝ်း ၸဝ်ႈသူၼ်ငႃးလၢင်းၶိူဝ်း လၢတ်ႈၼင်ႇၼႆ။

“ မီးၵူၼ်းၵၢင် (ပွႆးၸႃး)မႃးႁပ်ႉသိုဝ်ႉငႃးထိုင်ၼႂ်းပိုၼ်ႉတီႈၵမ်ႈသိုဝ်ႈ။ ၶဝ်တတ်းမၵ်းၵႃႈၶၼ် ၸွမ်းဝၼ်းလႂ် ဝၼ်းၼၼ်ႉ။ ပေႃးယဝ်ႉ သူင်ႇၸူးၶၢႆတၢင်း ဝဵင်းလိူဝ်ႇ (မၼ်းတလေး) သေ လုၵ်ႉတီႈဝဵင်းလိူဝ်ႇ  တေႃႉသူင်ႇ ၶၢႆၸူး တၢင်းလႅၼ်လိၼ်ၶႄႇလႂ်၊ ၵမ်ႈၽွင်ႈငိၼ်းဝႃႈ သူင်ႇထိုင်တၢင်းၵျပၼ်ႊၸိူဝ်းၼႆႉလူးၵွၼ်ႇဢေႃႈ” – ၸဝ်ႈသူၼ်ငႃးၵေႃႉၼိုင်ႈလၢတ်ႈၼင်ႇၼႆ။  

မိူဝ်ႈႁၢင်လိူၼ်သႅပ်ႉထႅမ်ႊပိူဝ်ႊ ၶၼ်ငိုၼ်း 1 တေႃႊလႃႊ 2800  ပျႃး။ ပေႃးလႅၵ်ႈငိုၼ်းထႆးသမ်ႉ 1700 ဝၢတ်ႇတေႃႇ 1 သႅၼ် ပျႃး။

ယၢမ်းလဵဝ် ၶၼ်ငိုၼ်း 1 တေႃႊလႃႊ 2600 ပျႃး၊ ငိုၼ်းထႆးသမ်ႉ 1400 ဝၢတ်ႇတေႃႇ 1 သႅၼ်ပျႃး။

ၶၼ်ၶဝ်ႈၵၢပ်ႇၵေႃႈမိူၼ်ၵၼ်။ ပီၼႆႉ ၶဝ်ႈၵၢပ်ႇႁႅင်ႈ 1 ၸွႆႉ 800 ပျႃး ။ၶဝ်ႈၵၢပ်ႇလိပ်း 1 ၸွႆႉ 400 ပျႃးၵူၺ်း။ ၵူႈပီတႄႉ ၶဝ်ႈၵၢပ်ႇ 1 ၸွႆႉ လႆႈၶၢႆထိုင် 1300 ပျႃးၸိူဝ်းၼႆႉလူးၵွၼ်ႇ  လႆႈႁူႉၼင်ႇၼႆ။